ع الطاير
لو سألت حد عن سرعة الإنترنت يقول لك فورًا حلوة كدة مش عاوز سرعات أكتر لأن الباقة بتخلص بسرعة لما يكون النت أسرع ده طبعا بالنسبة للمستهلك العادى اللى هو النت بالنسبة له فيسبوك وإنستجرام وواتس والحاجات دى مع شوية يوتيوب على أفلام ومسلسلات خصوصًا إن رمضان على الأبواب والفرجة تحلى يعنى أكتر مع كم مسلسلات رهيب وبرامج تسلية زى رامز وكدة.
أما بالنسبة للناس اللى الإنترنت عندها حياة وشغل ودراسة وداون لوود ومشروعات وتجارة إلكترونية وتسويق وكلام كبير من ده فيمكن يقولك هى السرعة حلوة كدة بس يعنى هل من مزيد وياريت كمان يعملوا لنا أوفرات عروض قوية يعنى بمناسبة رمضان وكمان بمناسبة الصيف بأى مناسبة المهم يبقى فى عروض جبارة مثلاً شحن ببلاش أو ضعفين الشحنة أو إنترنت طول الشهر بسعر مرتاح كدة المهم فى الموضوع إن سرعة الإنترنت فى مصر أصبحت جيدة جدًا وترضى كل الناس سواء للترفيه أو للدراسة أو العمل ويبقى الكلام على الأسعار.
وطبعاً قد لا يعرف الكثير من الناس أن رحلة الوصول إلى هذا المستوى اللائق من الإنترنت فى مصر وراءه جهود جبارة تبذلها وزارة الاتصالات وتكنولوجيا المعلومات بقيادة الدكتور الوزير عمرو طلعت واستثمار ضخم جدا وعمل متواصل لمدة ثلاث سنوات استطاعت جهود الوزير وفريق العمل المتميز معه خصوصًا فى الشركة المصرية للاتصالات تحقيق معجزة حيث أصبحت مصر فى المرتبة الأولى أفريقيا فى سرعة الإنترنت وفقاً لمقياس أوكلا سبيد العالمى وقد كانت قبل ثلاث سنوات فى المركز رقم 40 فى أفريقيا من بين 43 دولة أفريقية.
وما زالت الجهود تبذل والاستثمارات مستمرة ليصل الإنترنت فائق السرعة إلى كل مكان فى مصر ويكون فى متناول الجميع كالماء والهواء وطبعاً لأن التحول الرقمى ومحو الأمية الرقمية مسألة حتمية لا اختيار فيها يعنى لازم وحتما ولا بد ولا محيص ولا مناص من التحول إلى مجتمع رقمى وتقديم كل الخدمات الحكومية مميزة مميكنة خلاص قضى الأمر لم يعد ممكنا الدلع والتلكؤ والتماس أعذار كل شىء فى الدنيا سيتحول إلى ديجيتال وكل المجتمع الدولى خلاص رقمى وعصب الحياة الرقمية الإنترنت ولذلك الخطة تسير وفق جدول زمنى محدد لنشر الإنترنت فائق السرعة فى كل قرى مصر من خلال مبادرة حياة كريمة لتوصيل الإنترنت فائق السرعة إلى 3.5 مليون منزل لخدمة 60 مليون مواطن تخيل حجم الإنجاز وتأكد أنه مهما قال الناس عن سرعة وكفاءة شبكه الإنترنت إنها حلوة كدة إلا أن الوزير وفريقه لا حدود لطموحاتهم ويسعون سعياً إلى أن تكون سرعة النت وكفاءة الشبكة من أفضل دول العالم وسوف يتحقق الحلم بالعمل الجاد والأسلوب العلمى والإرادة وحسن وكفاءة الإدارة.