شواكيش
من داخل ستوديو الهواء بإذاعة «إف.إف. إم» يستعد المذيع الشاب سمورة الأطرش، لتقديم حلقة استثنائية بمناسبة موسم إنتخابات بلدنا «كفر الجميز».. سيداتى آنساتى سادتى.. أهلًا بكم وحلقة جديدة من برنامجكم «على ميه بيضا»
> المُذيع: ضيفى وضيفكم النائب البركاوى «حنكوش شلاضم» ملك الحركات «الفنكوش»!
- الضيف: أهلا بيك يا سمورة وبالسادة المستمعين!
> المُذيع: عُقبال ما ييجيلك مشروبك، نبتدى نذيع أغنية « ما شربتش من زيرها تعالا نغنالها «!
- الضيف: أهلاَ بيك يا سمورة وأهلًا بالسادة المستمعين من أهلى وأبناء دائرتى!
> المذيع: أهلًا بيك يا دكتورحنكوش.. نبتدى منين الحكاية؟!
- الضيف: الحكاية دى، مش حكاية شعب بلدنا كفر الجميز، دى حكاية كل عاشق للبلد دى!
> المُذيع: ما رأيك فى مصطلح « نايب الفكاكا لازم يشحن بالطاقة «؟!
- الضيف: طبعًا، الإنتخابات مش محتاجة بس فلوس، دى محتاجة فكاكا يا ننوس!
> المُذيع: ليه فكاكا يا فندم؟!
- الضيف: علشان الفكاكا المصطلح الجديد لدخول برلمان «كفر الجميز»!
> المُذيع: أعزائى المستمعين، نطلع فاصل إعلانى طويل، ونرجعلّكم تاااانى!
> المُذيع (بعد الفاصل): بعد ما شربنا «الحلبة على ميه صفرا»، نواصل حديثنا مع ضيفى وضيفكم الدكتور «حنكوش» ونسألهُ: ليه مرشح نفسك سابع مرة لإنتخابات «كفر الجميز»؟!
- الضيف: معنديش مانع أقولك الحقيقة، علشان أنا النايب اللى معاه الأخضر ونابه أزرق!
> المذيع ً: منتهى « الفكاكا «يا فندم!
- الضيف: ده أنا أبوالشفافية وأبن أخت «النزاهة»!
> المذيع: كلامك ده زى فنجان القهوة المحوج!
- الضيف: هوه ده الكلااااااام المضبوط بصحيح!
> المذيع: أعزائى المستمعين، باقى عشر دقائق على برنامجنا،وهنستقبل مكالماتكم على تليفون زيرو تلت تلتات.. ست اصفار!
- الضيف: أنا تحت أمر أبناء دائرتى من المستمعين الكرام!
> مُستمع: ممكن أكلم الدكتور « حنكوش «؟!
- المُذيع: أتفضل، الدكتور سمعك ع الهواااا
> المُستمع: أنا فرحان قوى، لما سمعت صوتك يا دكتور حنكوش.. وحشتنى حركاتك البهلوانية على الشاشة الذهبية من ساعة الإنتخابات اللى فاتت!
- المُذيع: ومعانا تانى إتصال ع الهواااا
> مستمع ( بنبرة هادئة): ممكن أكلم ضيف الحلقة!
- المُذيع: أتفضل، ومتنساش الوقت المتبقى من البرنامج!
> المُستمع: عندى مقترح غنائى، ليه منعملش أغنية بمناسبة انتخابات عُمدية «كفر الجميز» تكون كلماتها: « خد بإيديا يا ولا وأنت ماشى، وأطلب الفلوس والهدايا وهقولك ماشى «!
- الضيف: هوه دى الغُنا الانتخابى الحر ولا بلاااااش!
> المُذيع: معانا اتصال أخيرمن الجنس اللطيف.. آلووو.. مين معايا؟!
- مُستمعة (بنبرات قروية): أنا أُم العيال من كفر الجميز قِبلى.. أنا بجه عايزة أسأل ضيفك المتنيّل البعيد جوزى.. هوه الليلة هيبيّت عند مراته «السنيورة « ولا أوكل العيال « دكرالبط «؟
> المُذيع (هامسًا فى حرج): إيه الفضايح دى.. إظاهرالإتصال غلط!
بينما كان الميكرفون مفتوحًا، والبث الإذاعى مستمر، والمذيع الشاب يتصبب عرقًا، أثناء تقديم اعتذاره للضيف.. فجأة نسمع صوت المُخرجة «نفوسة العنوسة» ينبهه عبر المايك الداخلى: يا أستاذ سمورة إحنا لسه عالهوااااااااا.. وحبايبنا الحلوين، بلغونى أن ضيفك النايب «حنكوش شلاضم»، مطلوب ضبطه وإحضاره فى بلاغات «كِذب غير مشروع«!!
شَوْكَشَة الأسبوع
لما تلاقى الشعب مبسوط، والعيشة حلوة، والحياة أحلى، تبقى أنت أكيد فى بلد العجائب.. وعجبى عليك يا زمن!!