حسين الشحات عن فرصة إنتر ميامي: دماغي وقفت.. وقرار اللاعب غير المتفرج
كشف حسين الشحات، لاعب النادي الأهلي، عن كواليس اللحظة التي أضاع فيها فرصة محققة أمام إنتر ميامي الأمريكي، في مواجهة شهدت كثيرًا من الجدل واللوم تجاهه، مؤكدًا أنه شعر بخيبة أمل شديدة بعد اللقاء، لكن ما حدث كان خارج عن إرادته تمامًا.
وفي تصريحات لمنصات الأهلي الإعلامية، قال الشحات: "زعلت جدًا بعد ماتش إنتر ميامي. كنت حاسس إننا كنا ممكن نكسب بسهولة، يمكن 5 أو 6 أهداف، لكن التوفيق ماكنش معانا، وكلنا ضيعنا فرص مش بس أنا". وأضاف: "في الكرة اللي الناس مسكوا فيها عليا، كنت بفكر في حاجتين في نفس الوقت. أفشة شاور ليّا، وطاهر كان فاضي في الناحية التانية، فضاع مني القرار، ودماغي وقفت. ده بيحصل، واللي في الملعب غير اللي بيتفرج".
وتابع الشحات موضحًا استياءه من تحميله وحده مسؤولية نتيجة اللقاء، قائلًا: "الناس قالت حسين هو اللي ضيع المباراة! طيب إزاي؟ أنا لاعب في فريق وبسعى نفوز كلنا، مش معقول أكون بتعمد أخسر الأهلي. والمباراة اللي بعدها خسرنا برضه، فبقى أنا السبب؟! دي كورة، وساعات ربنا بيكتبها إنها متدخلش، حتى لو كنت شوطتها كان ممكن تخرج".
أما عن اللاعبين الذين كان يتمنى اللعب بجوارهم في تاريخ الكرة المصرية، فلم يتردد الشحات في تسمية الأسطورة محمد أبو تريكة دون تفكير، بل كرر اسمه ثلاث مرات، في إشارة إلى عشقه الكبير له.
وأوضح نجم الأهلي: "أبو تريكة، أبو تريكة، أبو تريكة! الماجيكو، اللاعب اللي كل مصر بتحبه، وأنا واحد منهم. كان نفسي ألعب معاه حتى ماتش واحد بس، ويعمل لي أسيست".
وأضاف: "اللي كان بيميز أبو تريكة إنه مبتسم دايمًا، وكان عنده حاجة مش موجودة في أي حد، بلمسة واحدة يوصلك للجون، وكان عنده رؤية مش طبعية".
تصريحات الشحات تكشف جانبًا إنسانيًا وواقعيًا من مشاعر اللاعبين في الميدان، وتؤكد أن الأخطاء جزء لا يتجزأ من اللعبة، مهما بلغ حجم الضغوط أو التوقعات.
كما أنها تلقي الضوء على حجم التأثر الذي يتركه لاعبون مثل أبو تريكة في نفوس الأجيال الجديدة، حتى بعد اعتزالهم.