لية بنرجع للذنب رغم التوبة أكثر من مرة؟.. سببان أحذر منهم
أجاب الداعية الإسلامي مصطفى حسني عن سؤال يتكرر كثيرًا بين الشباب والفتيات: "ليه بنرجع نعمل نفس الذنب رغم إننا تبنا منه قبل كده؟"، موضحًا أن السبب الأساسي في العودة للذنب هو التعلّق النفسي به وعدم الانتباه لخطوات الشيطان.
لية بنرجع للذنب رغم التوبة أكثر من مرة؟
وقال حسني:"إحنا بنرجع للذنب لسببين كبار؛ أولهم التعلّق بالذنب نفسه، والمشاعر اللي حواليه، واللذة اللي بيجلبها، التعلّق ده بيخلق نوع من اللهفة، كل ما تبعد عنه، تشتاق له تاني بسبب الشهوة أو المتعة المؤقتة التي يروّج لها الذنب".
وأضاف:"السبب التاني هو فقدان السيطرة على الخطوات اللي بتؤدي للذنب، ربنا قال: يا أيها الذين آمنوا لا تتبعوا خطوات الشيطان، لأن الشيطان ما بياخدكش على الذنب فجأة، ولكن يتم الأمر من خلال خطوات متتالية صغيرة، تترك وردك من الأذكار، ثم تترك صلاتك، ثم تضعف علاقتك بربنا، فتبدأ تنحدر شوية بشوية".
خطوات الشيطان
وحذر حسني من الانسياق وراء هذة الخطوات، لأنها خطوات الشيطان للوقوع مرارًا في الذنب، مؤكدًا أن الذنب قد يبدو ممتعًا لحظة ارتكابه، لكنه يخلّف وراءه ألمًا نفسيًا وروحيًا:"فيه ألم في البعد عن الذنب، وألم في البعد عن ربنا.
ولكن اختار الألم اللي تقدر تتحمله، ألم مقاومة الذنب مؤقت، ووراه لذّة القرب من الله، إحساس بالنصر على النفس، أما ألم البعد عن ربنا فهو دائم، وبيزيد كل ما بعدت".
وأنهى حديثه بنصيحة مهمة:"أكثِر من الدعاء، وخلّي حواليك صحبة صالحة تشجّعك على الثبات، وجود ناس بتذكّرك بربنا هي سلاحك ضد خطوات الشيطان، والزم لا إله إلا الله، ليكرمك الله ويثبّتك ".
