ع الطاير
يمكن كثير من شبابنا يعرف يعنى إيه الأمن السيبرانى.. ويعرف كمان إنه حاجة مهمة جدًا وإن تقريبا أهم وظيفة فى المستقبل القريب أو بكرا يعنى ويمكن دلوقتى هى وظيفة رجل الأمن السيبرانى.. إنما العواجيز اللى فى سنى يمكن ما يعرفوش حكاية الأمن السيبرانى دى أو يعرفوا المصطلح من غير تفاصيل.. وفى كل الأحوال يبقى موضوع الأمن السيبرانى ده خطير لأقصى درجة ويكفى أن نعرف أنه مرادف ومصاحب دايما للمعلومات والبيانات ونجاح أى مؤسسة أو شركة أو بنك مرهون بكفاءة الأمن السيبرانى لأن طبعا الهجمات والسرقات والهاكرز وكل عمليات سرقة البيانات تهدد المنظومة وهناك دائما سباق محموم بين الهاكرز وبين رجال الأمن السببرانى كل ساعة فى جديد يعنى كل ما الهاكرز يخترعوا حاجة يهكروا بها المعلومات لازم الأمن السيبرانى يلحق ويسبق وهو سباق لا ينتهي.
طيب الاول نعرف يعنى إيه الأمن السيبرانى ده أقول لك
طبعا بعد الإنترنت والأون لاين العالم كله بقى فى العالم الافتراضى والبيانات متخزنة وكل شيء أصبح يحمل معه مخاطر الاختراق يعنى الشبكة العنكبوتية الجهنمية دى اللى بتلف العالم الافتراضى خلت الدنيا مربوطة ببعضها وبقدر ما أتاحت هذه الشبكة فرص التواصل والمعرفة بقدر ما حملت من مخاطر الاختراقات التى تضر ضررا بالغا بمصالح الأفراد والشركات والدول.
طيب أين موقع العالم العربى من الأمن السيبرانى الذى يشغل العالم؟ هل احنا ملناش دعوة بالكلام ده يعنى؟ وهل نحن محصنون بما فيه الكفاية أمام هذا الخطر؟ أم أن أمننا السيبرانى فى خطر؟
أقولك طبعا إحنا متقدمين جدا ويكفى أن تعرف أن السعودية فى المركز الثانى عالميا ومصر فى المركز 23 عالميا ولدينا وعى كبير بأهمية السيبرانى.
والأرقام تتحدث عن حجم سوق الأمن السيبرانى فى العام الماضى فقط ما يقرب من 177 مليار دولار وأكثر من 3 ملايين وظيفة مطلوبة فى مجال الأمن السيبرانى.
طيب مصر فين من الكلام ده الدكتور عمرو طلعت وزير الاتصالات وتكنولوجيا المعلومات أكد أن مصر تؤمن بأهمية الأمن السيبرانى خصوصًا مع تزايد الهجمات الإلكترونية التى أصبحت أكثر خطورة على شركات ومؤسسات ودول عظمى بأكملها فقد باتت الحرب الآن تكنولوجية، مع اعتماد العالم كله على التكنولوجيا وأصبح الأمن السيبرانى إحدى أهم ركائز الاقتصاد الرقمى فى العالم لأن التحول السريع نحو الاقتصاد الرقمى العالمى وما يتم خلاله من رقمنةٍ للعمليات والخدمات والمعاملات التجارية قد أدى لزيادة هائلة فى حجم الهجمات السيبرانية فى ضوء التطور الكبير فى تقنيات الإنترنت المظلم، حيث يمكن لمرتكبى الجرائم السيبرانية جعلها عابرةً للحدود.
وطبعا الوزارة تحرص على توفير بنية معلوماتية رقمية مؤمنة وهناك اهتمام بالغ بالأمن السيبرانى وتأمين البيانات وفقًا للاستراتيجية الوطنية.