إوعى القطر يا عم الحاج

 كل اللى كنت بتقول عليه معجزات ومستحيلات وخيال وشغل عفاريت ومصباح علاء الدين والفانوس السحرى وحواديت ألف ليلة وليلة يتضاءل ويتواضع أمام جبروت التكنولوجيا وكل السرعات لا تلاحق قطار التكنولوجيا، وما تعتقد أنه بعيد ستجده خلال سنوات قليلة جدا، خد عندك مثلا العربيات مش حتشتغل بنزين ولا جاز ولا حتى غاز إنما بالكهرباء وما يستجد من طاقة وعشان كده حتلاقى محطات البنزين وورش الصيانة والتصليح مفيش حتختفى وحيبقى تصليح العربية أسهل من عمل فنجان القهوة إزاى؟ أقولك ياسيدى، محركات البنزين والديزل مكونة من آلاف القطع وعاوز ميكانيكى شاطر إنما محرك سيارات الكهرباء 20 قطعة وبتشترى بضمان مدى الحياة وبسهولة تقدر إنت تصلح وتفك وتركب فى دقائق أو الروبوت يعمل الحكاية وتقدر كمان تدخل مكان الصيانة يتغير فى دقيقة.

يبقى كمان شركات إنتاج وصناعة السيارات حتفلس وتقفل إلا إذا يعنى باختصار كدة ممكن طفلك إللى عمره 5 سنوات أو أقل يرى السيارات اللى بتشتغل بنزين دى فى المتاحف وبعدين لو عارف إمكانيات الذكاء الاصطناعى يبقى إنت عارف الدنيا رايحة فين يعنى فاهم إن السيارات والقطارات والطيارات حتبقى ذاتية القيادة وإن الزراعة والصناعة والتجارة وكل حاجة حتبقى غير النهاردة خالص وده يمكن خلال أقل من 20 سنة وطبعا ستختفى وظائف وتندثر مهن وحرف كتير.

يمكن الطب والهندسة والمحاماة والصحافة وحاجات تانية كتير لأن الآلة حتبقى أذكى من الإنسان ومتسألنيش إزاى بقى البشر يخترعوا آلات أذكى منهم وبكدة حتقل الحوادث اللي سببها طيش وتهور البشر وكمان  ستنتشر الطاقة الشمسية ويمكن يقدر كل بيت ينتج حاجته من الطاقة والسيارات والمصانع وكله يشتغل بالطاقة الشمسية النظيفة وأكيد الدنيا حتبقى أهدأ وأقل ضوضاء وزحام وصخب وتلوث وطبعًا يمكن الإنسان لا يقوم بأى عمل إلا الرفاهية والأنتخة لأنه كل حاجة توماتيكى ومحدش حيضطر يروح الشغل فى موعد الحضور والانصراف والكلام العجيب ده.

طيب حد يسأل هو الجيل الحالى والناس العواجيز شوية حيقدروا يتعاملوا تكنولوجيًا يعنى حيفهموا الفولة ويتعايشوا.. الإجابة طبعا لازم وإلا عليهم أن يفسحوا الطريق لقطار التكنولوجيا الرهيب ونقولهم إوعى القطر يا عم الحاج.