ع الطاير
السيف أصدق أنباء من الكتب.. وأى كلام بيقولوه لنا عن الأقوى والأسرع والأعلى والأهم والحاجات دى ده كلام زعيق وخلاص لأن فى النهاية لازم إنت تحس بإن ده واقع وحقيقى مش بس كلام وحكاية بقى الشهادة العالية وكليات القمة ومكتب التنسيق والثانوية العامة ده كلام فاضى ما يجيبش همه ولا هى شهادة ولا عالية ولا حاجة دى ورقة مالهاش أى تلاتين لازمة ويفاجأ الشاب بعد التعب والمذاكرة والامتحان والامتياز وجيد جداً والحاجات دى أنه ضيع فى الأوهام عمره وهنا تكمن المشكلة الحقيقية فى أنه أيها الشاب إذا كنت تدرى فتلك مصيبة وإذا كنت لا تدرى فالمصيبة أعظم يعنى سيادتك لو عارف إن حكاية الشهادات التقليدية والتخصصات القديمة دى مش حلوة ومبقاش لها سعر وإنت مستمر فى الضحك على نفسك فتلك مصيبة فعلًا، أما إذا كنت مش عارف أن الدنيا اتغيرت خالص وجه عاليها واطيها يبقى إنت كده مغيب فى عالم تانى من الأوهام والتخلف،
طيب إيه الحكاية دى، أأقول لك الدنيا دلوقتى ما يهمهاش معاك شهادة التخرج المهم سيادتك بتعرف تعمل إيه «جاية اشتغلى إيه» وهل الشغل اللى بتعرف تعمله ده مهم لحد وإيه مدى ندرته ومدى كفاءة حضرتك وطبعًا إنت عارف إن تكنولوجيا المعلومات حاليًا هى كل شيء وحتى الأمن بقى سيبرانى يعنى أمن البيانات والمعلومات فإنت لازم تشوف تقدر تنبغ فى إيه حلول رقمية متكاملة مؤمنة وألعاب إلكترونية وكل ما هو له علاقة بالحاضر والمستقبل وعندك فرص مجانية للدراسة والتدريب المهم إنك تدرك أن الدنيا اتغيرت وإن الدراسة التقليدية بتاعة الحفظ والتلقين والامتحان والشهادة ده كلام وخلاص وتفاخر زى كده التفاخر بالأنساب والملابس الغالية القديمة.. حاول تاخد الحكاية بجدية أكثر وابدأ فورًا عشان تلحق يمكن بسرعة البرق تحقق أحلامك فى الثراء والمجد وتبقى موظف مهم جدًا تحل أى مشكلة تقنية أو تحمى أجهزة وبيانات الشركات أو البنوك بالأمن السيبرانى أو يمكن مع مجموعة من الشباب الواعى تصبح صاحب شركة تعمل فى عالم رقمى.
وطبعًا عارف إنه مؤخرًا أعلنت وزارة الاتصالات وتكنولوجيا المعلومات عن فوز 16 شركة صغيرة ومتوسطة بتنفيذ 15 مشروعًا للتحول الرقمى بالجهات الحكومية بقيمة 43.5 مليون جنيه ضمن مبادرة «فرصتنا.. رقمية» يعنى إيه الكلام ده، يعنى الفرص كلها أفضل رقمية فى ظل التحول الرقمى الكامل مع حرص الوزارة على تحفيز الإبداع لدى الشركات العاملة فى مجال تكنولوجيا المعلومات وإتاحة فرص لها للمشاركة فى ضوء تنفيذ استراتيجية بناء مصر الرقمية.
إذن تستطيع أن تقول إن نصف فرص العمل حاليًا للتخصصات المتعلقة بالتحول الرقمى وكل الفرص المتاحة فى المستقبل القريب العاجل ستكون بالتأكيد لهذه التخصصات التى تفتح كل الأبواب للمجد والثراء والإبداع والانطلاق.