الإعلان عن اكتشاف كوكب شبيه بالأرض ويصلح للحياة بالتأكيد هو الخبر الأهم على الإطلاق ليس فقط للحالمين بدنيا جديدة ولا اتباع الأخ مدحت صالح اللي قالها من 20 سنة عاوز أعيش فى كوكب تاني فيه الإنسان لسه إنسان عايش للتاني.
وبقدر اهتمامي الشخصي بالخبر وما وراء هذا الموضوع إلا أنني اعترف بأني لم اتمن العيش هناك حتى لو كان الراحة والرفاهية والروقان كله هناك ويمكن حضرتك تقول أنت راجل فقرى حد يطول يسيب الأرض بزحمتها وتلوثها وقرفها ويروح يعيش في كوكب تاني اقول لك يبدو أننا كمصريين بصراحة كده ادمنا الزحام والتلوث والدوشة حتى أنك كمصري لما تسافر مكاناً آخر هادئاً وجميلاً ومريحاً بعد يومين بالكثير تحن للدوشة والزحمة، ويمكن تسرح وتسأل نفسك هو الكوكب الثاني فيه «صافيناز» وافلام «السبكي» وفيه الأهلي والزمالك وعك الدوري من غير جمهور طيب أنا أعيش كده من غير الزمالك ما ينكد علينا، لا لا لا الحياة لازمها شوية نكد وزحمة ودوشة ومعاناة، يعنى ما ينفعش نعيش في عالم ساكت
ويمكنك أن تسأل ونحن كمصريين بصراحة كده مطلوبين اوى فى الكوكب الجديد ولا الأمريكان الأوروبيين يلاقوا انها فرصة ذهبية للخروج من خنقة الأرض وإرهاب المتخلفين وأفكارهم ولا يعنى مش حيقدروا يسيبوا الأرض بالمغفلين إللي فيها إللي هم العرب يعنى أو الهنود الحمر الجدد ويصعب على الأمريكان والاوروبيين يتركوا الفلوس اللي عند العرب قبل ما ياخدوا آخر دولار وآخر برميل بترول وبعد ذلك يتركوا المتخلفين يخلصوا على بعض، الحقيقة أن هذا الخبر ألهب خيال كل الناس سواء من يحلم بأن يعيش في كوكب تاني أو إللي مبسوط معانا هنا، والسؤال الذي يطرح نفسه هل لا يوجد مخلوقات في هذا الكوكب بشر أو حشرات حتى، طيب لما هو صالح للحياة مفيش حياة ليه، وهل هناك كائنات أخرى لا نراها بأعيننا القاصرة وهم يروننا ويضحكون منا، والله أنا أشك أنها افتكاسة أمريكاني زى حكاية رفع العلم الأمريكي في المريخ وعلى القمر والعلم بيرفرف رغم أنه مفيش هوا مش مهم ادينا بنتسلي ونندهش ونحلم.
ما يهمنا هنا على الأرض وفى مصر تحديداً أن الدنيا حر جداً والجو نار ودرجة الحرارة تصل إلى الغليان ومع ذلك الزحام والمرور زى ما هو والناس كلها مش متضايقة ولسه بيغيظوا بعض بالأهلي والزمالك ومين ياخد البطولات المحلية والأفريقية، وأخبار «زكريا» و«مؤمن» ومش عارف مين، ومكتب التنسيق والحكومة حتتغير قبل الانتخابات البرلمانية ولا بعدها، وهو أصلاً فى انتخابات ولا إيه، وأخبار أسعار الإنترنت إيه والنت قاطع ولا إيه، والحمد لله النور ما بيقطعش، والحقيقة أراهنك لو لقيت حد فى مصر كلها مهتم بحكاية الكوكب الجديد ولا فى الدماغ يا باشا.
المهم عربية الفول والعيش والبصل والشاي التقيل والسيجارة أو الشيشة ونقعد ندردش، وتغلب في الطاولة أو الدومينو، وسلم لي على مدحت صالح وكوكبه التاني.
فكرة للتأمل هو الكوكب التاني فيه إخوان.