ع المصطبة
عقد مجلس برلمان المصطبة بمنزل المهندس محمد توفيق خبير شبكات الري الحديثة بالتنقيط والرشات بالصحراء الغربية وجنوب سيناء، وقد جمعتنا الجلسة التي تضم خليطاً من أبناء الدلتا والصعيد والصحراء لتناول الشاي، وتناولت الجلسة مشروعات الدولة لاستصلاح ملايين الأفدنة.
وافتتح محمد توفيق الجلسة بطرح سؤال مهم جداً غاب عن أعيننا وهو «ليه الدولة ما تعملش نظام الري بالتنقيط في أراضي الدلتا طالما عندنا أزمة؟».
العضو الفلفوس: والله الفكرة ممتازة لكن التكاليف عالية مين يا تري حايقدر يعمل شبكة تنقيط ولوازمها إذا كان الفلاح عايش يدوبك علي ما يزرعه ومفيش عنده فايض مالي يقدر يدفع التكاليف.
العضو النمرود: يا جماعة الفكرة اللي طرحها علينا الأستاذ محمد توفيق للدراسة وكلام الفلفوس عن التمويل أقول له إن البنك الزراعي يمكن يمول المشروع بالتقسيط المريح وأقول وأعيد التمويل المريح بالتقسيط.
العضو بهلول: طيب عاوزين صاحب الضيافة وأقصد أخينا المهندس محمد توفيق يشرح لنا طريقة التنفيذ والتشغيل.
صاحب المضيفة: يا جماعة المسألة سهلة وطريقة تنفيذها مريحة للفلاح وحاتوفر مصاريف زي تطهير المصارف ويمكن في حالات تانية دون مواسير طلمبات للري منها والاستفادة من مياه الترع والمصارف اللي بيرموا فيها الصرف الصحي وكلنا عارفين كده وعلي كل حال ممكن نعمل تجربة حية في أحد مراكز وجه بحري وبعدها نحكم علي العملية ناجحة أم لا.
العضو بهلول: والله الفكرة عظيمة الله ينور عقلك يا باشمهندس لكن فيه نقطة مهمة خالص وهي فيه محصول زي الرز لازم يعيش في الميه دائماً لغاية ما نحصده، نعمل إيه معاه؟
صاحب الدعوة: يا جماعة العلم اتقدم وفيه حل لكل مشكلة لكن إحنا نايمين في العسل وكسلانين طيب إيه رأيكم أنا سمعت أن مركز البحوث الزراعية بكفر الشيخ نجح في زراعة الرز علي الناشف والمهندس اللي أشرف علي التجربة حسب ما سمعت اسمه سيد سليم لكن إحنا كسالي.
العضو بهلول: كفاية كده تعالوا نشوف مسلسلات الرقص والفرفشة.
الفلاح الفصيح