ع المصطبة
عقد مجلس برلمان المصطبة أولي جلساته الرمضانية وكان موضوع الجلسة، المسلسلات التليفزيونية اللي بينتجوها مخصوص علشان تتعرض في شهر رمضان اللي ربنا خصصه للعبادة والإنتاج.
الرئيس: لدينا إجماع علي أن هذه المسلسلات في رمضان حرام حرام حرام، فما رأيكم يا جماعة مع إن كلامنا بعيد عن السياسة فلسنا من أي جماعة من إياهم لكننا مسلمون نعبد ربنا.
العضو الفلفوس: والله أصحاب القنوات الفضائية حسابهم عند ربنا لأنهم بيشتروا المسلسلات ويتسابقوا علي إذاعتها في قنواتهم ويقبضوا إعلانات بالملايين ونسوا تماماً أن شهر رمضان هو أفضل الشهور عند ربنا.
العضو النمرود: لو كان أصحاب القنوات مسلمين يبقي حسابهم عند رب العباد، ولا يملك واحد مهما كان أن يمنعهم، لكن الواجب علينا أننا نقاطع القنوات اللي بتذيع المسلسلات المكشوفة في هذا الشهر الفضيل.
العضو زعيط: يا جماعة الشباب وحتي العواجيز بتجري بعد صلاة المغرب وتفتح علي المسلسلات في القنوات وساعات نصلي في البيت ومنهم لله أصحاب القنوات اللي بتذيع الحاجة الجارحة في هذا الشهر الكريم لكن نعمل إيه.
العضو معيط: يا جماعة ربنا قال إن النفس أمارة بالسوء، فلازم ولابد إن أصحاب القنوات يحطوا شوية ملح في عينهم ومنهم لله لأنهم عارفين إن النفس ضعيفة قدام الممثلات اللي لبسهم بالي بالك خلاف كلامهم.
العضو نطاط الحيط: إياك واحد يطلع ويقول فين الأزهر وفين الدولة، لأن إحنا دلوقتي دولة ديمقراطية بحق وحقيق ولا حجر علي أي مواطن فيما يقول وفيما يعمل مع عدم المساس بأمن البلد واللي بتقولوا عليهم دول حسابهم عند ربنا وإحنا كمان نمتنع عن المشاهدة لأنها تفسد الصيام والله أعلم.
الرئيس: كفاية وتعالوا نصلي التراويح.
الفلاح الفصيح