اعطوا الراجل فرصة

عقد مجلس برلمان المصطبة جلسة غير عادية للتعليق علي مرور سنة تولي الرئيس السيسي الحكم في مصر.

الرئيس: حضرات الزملاء والأهل في مصر مطروح علي مجلسكم الشعبي الوطني موضوع تقييم إنجازات الرئيس السيسي خلال السنة الأولي لحكمه مصر.

العضو الفلفوس: يا جماعة أي نظام حاكم يتولي السلطة لا يمكن أن نحكم عليه لكن الوضع في مصر مختلف فإن حجم المشروعات المطروحة للتنفيذ يفوق الخيال.

العضو النمرود: يا جماعة الرئيس السيسي تربي في مؤسسة منضبطة ومن قوانينها المحاسبة علي الإنجاز والمحاسبة علي التقصير يعني كده بالبلدي ما يعرفش المساومة والمراوغة علشان كده منظومة الشغل منضبطة زي الساعة وده حتكون نتائجه في نهاية المدة مبهرة وعظيمة وأقول اعطوا الراجل فرصة.

العضو زعيط: احنا يا جماعة عايشين عصر أنا عملت ونفذت ما وعدت به والبينة بالعينة في المشروعات اللي تحت التنفيذ العملي وعمار يا مصر.

العضو معيط: والله يا جماعة إحنا عايشين في عهد راجل مايعرفش كلمة حنعمل يعني عاوز اقول احنا بنعمل فعلا والدليل علي كده المشاريع اللي تحت التنفيذ من استصلاح مليون فدان مرة واحدة وقناة السويس وغيره وغيره يعني كده بالعربي مصر حتبقي حاجة تانية في عهد الراجل ده.

العضو نطاط الحيط: إحنا عايشين في عصر راجل مايعرفش كلمة «الحكومة حتعمل كذا وكذا» لكن نظامه بيقول بنعمل علي أرض الواقع كذا وكذا يعني فعل حقيقي مش وعود وأحلام في الهوا.

العضو النمرود: يا جماعة مصر بلد ربنا حارسها وكل ما تقع ربنا يهيئ لها الراجل اللي ينقذها وده اللي حصل دلوقتي.

الفلاح الفصيح