شواكيش
آلووووووه.. مين معايا بيتكلم؟!
ـ أنا واحد من شعب «كفر الجميز»!!
< تؤمر يا شعب؟!
ـ أنا واحد من الغلا بلالى.. ومن خفض عملة الجنيه بعانى.. ومن رفع سعر الدولار آآآه يااااانى!!
<.. وإيه اللى تعبك يا شعب؟!
ـ دِى أسعار اللحمة فى أسواق الغلاء مكنتش على بالى.. ودلوقتى بآكل لحمة «وقيع» مذبوحة خارج السلخانة ولا أوبالي!!
<.. وإيه تانى؟!
ـ أسعار الفراخ والبيض راحت فى حتة تااانى.. والسمك محروم من فسفوره ونسيت طعمه من تااااانى!!
<.. وإيه اللى تعبك يا شعب؟!
ـ نسيت أقول لك: فواتير الكهربا بقت مولعة نار نااار.. واللى مش طبيعى الغاز الطبيعى مشعلل أنفوخى.. والميه مغرقانى ومش قادر من الغرق أصحى وأفوق!
< عايزك تستحمل يا شعب «الجميز».. ده أنا اللى قعدت أشرب ميه بـ«الكوز» من بطن الزير تلت سنين!
ـ يا «سيدى العمدة» ما إحنا شربنا المُر طول العمر من ميه الترعة والزير.. ولحد إمتى هنشرب المية بطعم المُر!
< شوف يا شعب «الجميز».. زمااااان قالولك: «شد الحزام».. وإحنا دلوقتى بنقولك: «فُك الحزام» علشان بلدنا «كفر الجميز» على كف ورقة الدولار!
ـ بصريح العبارة يعنى يا سيدى العمدة: الدولار طالع واكل ونازل طحن فى الجنيه.. وإحنا اللى سايبنا نموت فى سويقة الأسعار!!
< قُلت لك: استحمل شوية يا شعب الجميز.. قُدامك سبع سنين.. وهتبقى عيشتك معدن وحياتك فُللى!!
ـ يا حلاوة سكر النبات والعسل المُر.. دِى العيشة هتبقى معدن والحياة فُل الفُل.. بس لا مؤاخذة يا سيدى «العمدة» مش مصدق كلامك!!
< كلامى صح الصح يا شعب «الجميز».. لازم أحلفك بسماهها وترابها علشان تصدق كلامى!
ـ بسمع كلامك أصدقك.. أشوف الغلا والكوا أستعجب وأمشى فى سوق البلد تلسعنى نار «محرقة العناء»!!
< بتقول يا شعب الجميز: «محرقة العناء» يا حرااااااام.. إنتو جوه عنينا!!
ـ إحنا شعب الجميز نؤمر.. وطبعًا دوار العمدة لازم يستجيب!!
< تؤمر يا شعب الجميز.. أحلامكم أوامر!
ـ الشعب يأمر برحيل حكومة العناء!
< (بنرفزة): مين اللى بيتكلم؟!
ـ أنا خريج «التوك التوك» اللى فوضنى شعب الجميز لأقول لحكومته: نسألكم الرحيل!
شَوْكَشَة الأسبوع
على طريقة غناء فنان الشعب سيد درويش: «علشان نِعلا ونِعلا ونِعلا.. لازم نطاطى نطاطى نطاطى».. يا ترى الدنيا حتروق وتحلى.. ولا هتبقى من مية السيول طينة وحله.. ونشوفكم حلوين وأحلى!!