أحمد مراد: «الست» كشف الجانب الإنساني لأم كلثوم وناس خرجت من السينما بتعيط
كشف الكاتب أحمد مراد، مؤلف فيلم الست، أن العمل الذى قدمه فى فيلم أم كلثوم استبعد الأحداث والحوادث المكررة، وفى النهاية تم إيصال الرسالة الإنسانية بدليل خروج بعض المشاهدين باكين بعد اكتشاف جوانب إنسانية فى شخصيتها، قائلًا: «ناس خارجة بتعيط وبتقول: «أنا مكنتش أعرف الست دى كده، وإزاى عملت المجهود ده كله لبلدها؟».
وواصل «مراد» خلال لقاء ببرنامج الصورة الذى تقدمه الإعلامية لميس الحديدى على شاشة النهار، قائلًا: «لو عاوز أحب بنى آدم لازم ما أشوفوش ملك، عشان نقدر نتعاطف معاه. الطبيب النفسى الشاطر لازم يقعد ببساطة ويتكلم مع اللى قدامه، ويحكى مثلًا إن عنده بنت عندها مشكلة، عشان يشجع اللى قدامه يتكلم، لازم يحصل ألفة».
أكمل: «عشان الناس تحب أم كلثوم لازم يشوفوا الست دى اتكسرت إزاى، وقلبها تعب إمتى، وإزاى داست على قلبها حفاظًا على مهنتها وكاريرها، وإزاى أخدت قرار ندمت عليه».
واختتم قائلًا: «الفيلم ده مش وثيقة تاريخية نقراها أو نشوفها ونعتبرها أم كلثوم، ده فيلم درامى بيحمل خيال، نقدر نقول فيه اللى إحنا عايزينه، ومن غير ما نشوه أى شيء، بالعكس تمامًا».
