آمال ماهر تبكي على الهواء وتكشف أصعب لحظات حياتها بعد رحيل والدها
فتحت الفنانة آمال ماهر قلبها للمرة الأولى لتتحدث عن أكثر فترات حياتها ألمًا، مستعيدة ذكريات فقدان والدها التي تركت جرحًا عميقًا في وجدانها، خلال ظهورها في برنامج «عندي سؤال» مع الإعلامي محمد قيس على قناة «المشهد». كلماتها الصادقة لامست قلوب الجمهور وأظهرت جانبًا إنسانيًا نادرًا من شخصيتها.
وأوضحت آمال ماهر قائلة: "لو كان والدي على قيد الحياة، كانت حاجات كتير اتغيرت في حياتي، لأن الأب بالنسبة للبنت ضهر وسند، مرّ عليّا وقت صعب جدًا، خصوصًا بعد وفاة والدي وعمتي، وكانت وفاتهم ورا بعض، ودي كانت من أصعب الفترات اللي عدّت عليّا قبل وفاة والدي، حسيت إن ربنا بيهيأني، وده كان في شهر يناير 2016".
واستكملت الفنانة حديثها بقولها: "كنت حلمت حلم غريب، وصحيت الفجر على تليفون من أخويا بيقولي والدك عايزك، جريت على طول وأنا مش قادرة أتنفس من كتر الخوف، ولما وصلت لقيته تعبان شوية، بعد كده سألت عن معنى الحلم، وقالولي إن اللي يشوف الحلم ده والده هيتوفى. دخلت بعدها في حالة اكتئاب حاد، وقعدت شهرين قافلة على نفسي، ومكنتش برد على حد".
وأضافت آمال ماهر متأثرة: "في أول مارس، جالي تليفون تاني، وروحنا المستشفى وأخدنا والدي، ودخل في غيبوبة وهو في حضني، كانت أيام صعبة جدًا، كنا في دوامة من الحزن والتعب".
واختتمت آمال ماهر حديثها والدموع في عينيها قائلة: "الحاجة اللي عمري ما هنساها، إن في آخر أيامه مكنش بيعرف حد غيري، المرض خلاه ينسى كل الناس، لكنه كان بينادي اسمي، وفي آخر يوم اتكلم فيه، كان بيناديني، واللحظة اللي توفى فيها كانت نفس الصورة اللي شفتها في الحلم، وتوفى أول يوم العيد".
