وفاة لطفي لبيب.. اللحظات الأخيرة في حياته وآخر كلماته (فيديو)
كشف الأب بطرس دانيال رئيس المركز الكاثوليكي المصري للسينما، تفاصيل اللحظات الأخيرة في حياة لطفي لبيب، الذي رحل عن عالمنا اليوم الأربعاء 30 يوليو الجاري.
تحدث الأب بطرس دانيال عن حالة بنات الفنان لطفي لبيب بعد وفاته، في مداخلة هاتفية مع الإعلامي شريف نور الدين، ببرنامج أنا وهو وهي، المذاع على قناة صدى البلد، قائلًا: «طبعًا كانوا مسلمين كل شئ لربنا».
واستكمل: «إمبارح كنت مع الفنانة نهال عنبر وإحنا راجعين من ندوة بتطمئن على صحته، وبنته ردت عليها وطبعًا قالت إنها بتشكر الكل اللي بيسألوا عن والدها وقالت ادعوا له، يعني مسلمين الأمر لربنا لأن حالته كانت صعبة وكان يعاني من نزيف داخلي».
واختتم رئيس المركز الكاثوليكي للسينما: «كان الوضع الصحي حرج امبارح، وإحنا بنطلب لهم دلوقتي كلهم التعازي من ربنا لأن أكتر واحد بيعزي الشخص هو ربنا أكتر مننا كلنا».
وتابع: «كان كاتب كتاب عن بطولاته في القوات المسلحة ووقت الحرب، وعامل معلومات مهمة جدًا عن الكتيبة اللي كان فيها وفي نفس الوقت مثقف جدًا».
وتابع: «آخر مرة كنا معه مع الفنان حمزة العيلي، قال: أنا هبطل تمثيل دلوقتي بس الفترة الجاية هبدأ أكتب كام سيناريو عشان نعمل فيلم ومسلسل، هو شخص رائع دائمًا مثقف يفكر في الفن عايز يعمل أحلى ما عنده».
واستكمل الأب بطرس دانيال حديثه عن اعتزال لطفي لبيب: «ابتعد عشان ميبقاش عبء على حد، وبسبب المجهود الكبير لكن في نفس الوقت، كانوا يطلبوه في أدوار حتى يكون ضيف شرف، دور بسيط، مكنش يقول لأ، كان دايمًا يحب ميحرجش حد».
واختتم: «في الفترة الأخيرة كان يحضر مسرحيات شباب، يدعوه شباب للحضور ويروح يشجعهم، كان ممكن يقول مقدرش صحتي متسمحش، بس يقول لأ أنا لازم أقف مع الشباب، أقف مع الكل، وزيارتنا له أنا وحمزة العيلي كانت من أسبوعين لما خرج من المستشفى، وشجع الفنان حمزة العيلي أول ما شافه وقاله: أنت فنان مبهر، أنت رائع، أنت فنان جميل جدًا شاطر، قعد يشكر فيه جامد وقعد يطبطب عليه ويبوس كتفه، فهو محب وبسيط ومتواضع».
اقرأ المزيد..
