أحمد عز: وسامتي سبب شهرتي في البداية

أقيمت منذ قليل، ندوة للنجم أحمد عز، على هامش تكريمه بمهرجان القاهرة السينمائي 2024، وذلك ضمن فعاليات النسخة الـ 45 والمقرر تستمر حتى 22 نوفمبر الجاري.

قال أحمد عز: "وسامتي وشكلي سبب نجاحي في البداية ودخولي التمثيل لكن بعدها الأهم هو ايه اللي هقدمه بعد كده عشان أكمل نجاحي وأقدر اترك بصمة في السينما والتلفزيون".

تحدث “عز” عن  الدراما التلفزيونية التي تدور أحداثها في إطار 30 حلقة، قائلًا: "أنا ضد المسلسلات الـ 30 حلقة خاصة وسط الفكر الموجود حاليًا والجيل الجديد اللي طالع لكن الأفلام أقدر اعمل فيلم واتنين وثلاثة في فترة قصيرة ده نجاح في حد ذاته".

تكريم أحمد عز بحفل افتتاح مهرجان القاهرة السينمائي 2024

كرم مهرجان القاهرة السينمائي النجم أحمد عز بمنحه جائزة فاتن حمامة للتميز وقال: "من حوالي ٢٤ سنة خيروني بين أكمل في شغلي وبين بطولة أول فيلم سينمائي واخترت دخول مجال التمثيل دون رغبة أهلي وأنا بصور كان مهرجان القاهرة هيشتغل وكنت مستني يجيلي دعوة لمهرجان القاهرة عشان أفرح أهلي ودخلت على الريد كاربت محدش عرفني وتلف الايام واجي اقف هنا واتكرم واخد جائزة اسم صاحبها لوحده جايزة ومن الوزير الثقافة ونجم النجوم اللي مفيش زيه حسين فهمي وللأسف التكريم جه وأبويا وأمي مش موجودين".

وتابع أحمد عز: "التكريم مش اجتهاد مني دا تكريم لكل واحد علمني وليه الفضل عليا واعتبر الجائزة حافز لي فيما هو قادم وأنا حاسس أني لسة معملتش حاجة وأهدي تلك الجائزة للنجم عادل إمام".

مهرجان القاهرة السينمائي

وتشهد الدورة الخامسة والأربعين من مهرجان القاهرة السينمائي، مشاركة 190 فيلمًا من 72 دولة بالإضافة لحلقتين تلفزيونتين، بينما تشمل الفعاليات 16 عرضًا للسجادة الحمراء، و37 عرضًا عالميًا أول، و8 عروض دولية أولى، و119 عرضًا لمنطقة الشرق الأوسط وأفريقيا.

مهرجان القاهرة السينمائي الدولي، هو أحد أعرق المهرجانات في العالم العربي وأفريقيا وينفرد بكونه المهرجان الوحيد في المنطقة العربية والأفريقية المسجل ضمن الفئة A في الاتحاد الدولي للمنتجين بباريس "FIAPF".