بسمة وهبة: أنا مش خرابة بيوت وحسن شاكوش "داير" وزوجته بريئة

تصدرت الإعلامية بسمة وهبة التريند خلال الساعات الماضية، وذلك بعد كشفها كواليس من حلقة حسن شاكوش وزوجته ريم طارق في برنامج العرافة والتي عرضت خلال شهر رمضان الماضي 2023.

وقالت بسمة وهبة خلال تصريحات تليفزيونية: "خدت شيخ العرافين على جنب واتخانقت معاه وقولتله أنا اللي باخد الكلام في الأخر وبيقولوا إن أنا خرابة بيوت.. ودا بقى خراب بيوت فعلا .. إنت مكنش ينفع تقول كده".

وأضافت: " لو كان طلاقهم بسببي كان إيه اللي هيخليهم قاعدين كل ده من بعد الحلقة كويسين؟".

ربنا عوضني عن تجربة عانيت فيها 

وتابعت بسمة وهبة قائلة: " في حاجة طالعة بتدين ريم وأنا هبرأها منها .. بيتقال إن ريم كذبت في إنها كانت متجوزة قبل كدة .. لا ريم مكذبتش .. وهي قاعدة لما هاجمتها وقولتلها ليه عملتي سجدة الشكر قدام الناس .. فقالتلي لا أنا كنت سعيدة وحاسة إن ربنا بيعوضني عن تجربة عانيت فيها.. هي التجربة دي إيه؟ ما أكيد تجربة جواز".

ووجهت بسمة وهبة رسالة لحسن شاكوش قائلة: " أنا عايزة أقول لحسن إنت أكيد كنت عارف إن ريم كانت متجوزة وأكيد القضية اللي هي رافعاها على طليقها هتبان وبعدين حسن داير .. إنت مش ممكن واحدة تضحك عليك وتقولك إنها أنسة وإنت متكونش عارف إنها اتجوزت قبل كده .. أكيد عارف حكايتها".

زفاف شاكوش وريم طارق

يذكر أن حسن شاكوش احتفل بزفافه في حفل كبير أقامه قبل أيام من شهر رمضان الماضي، وشهد الحفل حضور مجموعة كبيرة من الفنانين منهم تامر حسني، رامي صبري، مصطفى قمر، محمد نور، أحمد بتشان، محمود الليثي، حمو بيكا، عمر كمال ورضا البحراوي.

وكانت تسببت مقدمة البرامج بسمة وهبة فى دهشه كبيرة بعدما انهمرت دموعها ولم تتمكن من السيطرة على نفسها، عندما استضافت النجم محمد فؤاد في إحدى حلقات برنامجها " العرافة " في رمضان 2023، وذلك عندما فاجأها بأغنيته "طمني عليك"، لتبرر بعد ذلك سبب عدم سيطرتها على دموعها.

سبب بكاء بسمة وهبة في حلقة محمد فؤاد

أوضحت بسمة وهبة أثناء استضافتها في برنامج "ET بالعربي" عند سؤالها عن سبب بكائها في حلقة محمد فؤاد لتجيب: " كانت حركة ندالة جدا من محمد فؤاد وفريق عمل البرنامج، عارفين أن نقطة ضعفي هي أولادي، منذ انفصالي عن والدهم وهم في سن صغيرة، عشت في بلد وهم في بلد آخر مع والدهم، وأنا مت ولم أدفن".

وتابعت بسمة وهبة: " الأغنية دي كانت قهر لي، ومحمد فؤاد غناها لينكد علي ويكسرني قبل الحلقة، سألته جاهز؟ فقال لي أنتِ اللي جاهزة؟، واتفاجئت بالأغنية على الهواء، في كمية غدر في البرنامج دا".

محمد فؤاد يتوّعد لبسمة وهبة ويبكيها في "العرافة"

وداعب الفنان محمد فؤاد، بسمة وهبة في الحلقة قائلًا: "أنا جاي وعمال اقرأ قرآن عشان ربنا يهديكي ولوغلطتي معايا.. ده تهديد على الهواء، اللي قدامكم دي أوطنة وعاملة 7 رجالة، وكل الكلام ده هتش، انا عارف نقطة ضعفها وهوريهالكم دلوقتي، أنا هفرجكم عليها دلوقتي".

يذكر أن الإعلامية بسمة وهبة علقت على بكائها من قبل في فيديو نشرته عبر حسابها الشخصي بموقع تبادل الصور والفيديوهات إنستجرام، قالت فيه: "بص يا محمد يا فؤاد أنا بجد مش مسامحاك ومتشكرة ليك لان الأغنية بقيت اسمعها وعايزة أقول للسادة المشاهدين أن أغنية ممكن تكسر البني آدم من جوة، وتحسسه بحزن شديد، زمان الأغنية دي لما كانت بتشتغل مكنتش بحس بالضعف ده ولا بكسرة القلب ده والحزن ده لكن أنا كبرت في السن، كل ما أكبر كل ما مشاعري بتكبر".

وتابعت: "بحب ولادي وواحشني، بحلم اني اشوفهم وسعيدة لما بشوفهم، مش مسامحة انك اتكيت على الحتة دي ودموعي تنزل مش هو ده الصح زعلانة منك، مدربة نفسي، الاغنية شغالة، كلمات الأغنية صعبة للي مفتقد شخص، ولادي لما بيوحشوني بروح على صورهم واشوفها عشان تصبرني وانا ولادي مش عايشين معايا من صغرهم كل واحد في بلد، انا كبرت وعرفت دلوقت اني كبرت لان مشاعري مش بتتحمل، بيوحشوني أكتر من الأول وبشتاق لهم اكتر من الاول ونفسي أعيش معاهم اكتر من الاول".

واختتمت بسمة وهبة تعليقها قائلة: "أنا لولا اني بحترم المحطة كنت سبت الحلقة بس أنا كملت الحلقة، ومش مسامحاك يا محمد يا فؤاد ولا مسامحة كل واحد تآمر معاك عارف نقطة ضعفي".