ياسمين صبرى.. وفن الهمبكة

فرصة تانية.. ده اسم المسلسل اللى عامل قلق فى السوشيال ميديا وخناقة حامية ضد بطلة المسلسل ياسمين صبرى جميلة الجميلات الجديدة زى ما بيقولوا عليها، ورغم هذا الإجماع على جمالها إلا أن الخناقة على أنها مبتعرفش تمثل، ومين قال لها تمثل لا لا طيب يا جماعة الخير كلكم مخرجين يعنى ولا أساتذة نقد فنى، طيب ممكن نديها فرصة تانية ده حتى اسم المسلسل كده فرصة تانية.. أبداً.. هى مبتعرفش يعنى مبتعرفش طيب ليه سيادتك بتشوف المسلسل أكتر من مرة، وكل ما يخلص فى قناة تدور عليه فى حتة تانية؟!.. معلش أصلها تجنن حلوة أوى أوى أوى.

طيب يعنى شكلها حلو وأنيقة ومريحة ومبهجة وكل ده، وواخد بالك إنها مبتعرفش تمثل، طيب هى اللى بتعرف تمثل بتبقى إزاى يعنى، المفروض تتشنج وتزعق وتعمل شقلبات وتعيط من جواها وتقطع هدومها وتلطم على وشها وكده يعنى، ولا إيه طيب المفروض تمثل زى مين كده.

أسئلة كثيرة من غير أجوبة كلما تابعت السوشيال ميديا تتبادر إلى ذهنى، وأعود وأسأل نفسى، هى صحيح مبتعرفش تمثل ولا ده كلام فاضى ونفسنة من بنات غيرانين من حلاوتها، وولاد حيتجننوا  مش عارف، إنما على الأقل أنا عارف بحكم دراستى فى كلية الإعلام قسم الإذاعة والتليفزيون إن التمثيل ليس فناً أو إبداعاً حتى معهد السينما ليس به قسم تمثيل يعنى فى أقسام إخراج وديكور وإضاءة ومونتاج وحاجات كتير فنون يعنى إنما التمثيل ده همبكة وده مش رأيى الشخصى ده رأى أعظم ممثل مصرى رشدى أباظة نفسه، لما سألوه عن عظمة تمثيله، قال هو ده فن ده همبكة، يعنى الراجل العظيم ده يرى أن التمثيل همبكة وده كلام واضح وجرىء وصادق جداً.

ليه بقى لأنه لو رشدى أباظة نفسه لا يتمتع بهذا الجمال والتناسق الجسدى والعضلات والقبول لم يكن نجماً أبداً.

إذن الحكاية ببساطة قبول، وطبعا ياسمين صبرى جميلة ووجه مقبول جداً، ورشاقة وشياكة وحيوية وحضور قوى، طيب تمثيل إيه بقى، والله العظيم دى شغلة المخرج، ويوسف شاهين وكبار المخرجين كانوا بيمثلوا المشهد للنجم أو النجمة عشرات المرات عشان ياخدوا اللقطة اللى عاوزينها.

وبعدين نشوف تاريخ الجميلات فى السينما العربية والأجنبية كمان، يعنى مثلاً شوف تمثيل كيت وينسلت فى فيلم تيتانيك وشوف شمس البارودى وسهير رمزى وليليان كوهين أو كاميليا قمر 14، كل هؤلاء النجمات الجميلات يعنى كن ملكات الجمال وليس ملكات التمثيل.

الخلاصة يا سادة أنا مش فاهم حاجة خالص، إيه المطلوب من ممثلة مصرية غير إنها تكون حلوة ودمها مش تقيل وصوتها مش منفر وملامحها مش مزعجة ومكياجها مش زاعق وجسمها متناسق ورشيق.

على أية حال أرى أن السوشيال ميديا وخناقة ياسمين صبرى جميلة ومسلية وبتعمل دعاية للمسلسل وللبطلة.

وسلى صيامك بقى فى رمضان على السوشيال ميديا، وكل عام وأنتم بخير.