سفير التضامن: مشروع تنمية المرأة الريفية يغير حياة إيمان للأفضل .. فيديو
شاهج
السعادة.. كلمة جميلة و احساسها أجمل وانا فهمت وحسيت بمعنى السعادة والرضا لما عديت بصعوبات مجاش على بالى في يوم تحصل .. انا إيمان أيوب.. من الشرقية .. وبطلة حلقة النهاردة من سفير التضامن.
تقول إيمان :" أنا عندى بنت جميلة عندها 9 سنين.. انفصلت عن جوزي من فترة.. لكن بنتي عايشة معايا .. بنتى هي الشخص الوحيد اللى لما ببص في عينها بحس اني ست قوية .. وهي الدافع ليا في أي هدف عايزة احققه .. هى السبب بعد ربنا في النجاح إللى أنا وصلت له دلوقتي".
وتابعت ايمان قائلة :" لما انفصلت عن جوزي أهلي كانوا بيساعدوني ماديا.. ومسابونيش لحظة .. لكن أنا كنت حابة استقل بنفسي ومش عايزة أمد إيدي لحد .. وفي يوم سمعت عن مشروع تنمية المرأة الريفية التابع لوزارة التضامن الاجتماعي عندنا في البلد. .. و عرفت ان المشروعات دى بتتنفذ فى 25 محافظة.. المشروعات دى زى تطوير دور المرأة فى إنتاج الغذاء و تدريب المرأة فى التنمية و السكان
وأضافت :" و من هنا بدأت أهم خطوة في حياتي.. قدمت على القرض وبقى عندي محل ملابس جاهزة وبشتغل فيه كويس علشان أكبر اسمه.. الحمد لله بقى عندى زباين بيجولى بالإسم .. و لما بحتاج اى حاجة من وزارة التضامن الاجتماعي الناس بيساعدوني وماشيين معايا خطوة بخطوة .. الحمد لله المكسب إللى بيجيلي مش مخليني شايلة هم حاجة.. بيكفينى وبيكفى بنتي ومبقتش محتاجة لحد من أهلي يساعدني.. ونفسى يجى اليوم و يبقى عندى اكتر من محل.. وأعيش بنتي العيشة إللى بتحلم بيها".
انتظروا كل يوم بقصة جديدة مع بطل جديد من سفير التضامن.