إيهاب عبدالواحد: أحضر مفاجأة ضخمة مع أحمد سعد وبحب شغل تامر حسني
كشف الملحن إيهاب عبدالواحد كواليس تعاونه مع الفنان تامر حسني بأغنية مولعينها، ومع الفنان أحمد بتشان، بجانب مفاجآت أعماله الجديدة.
قال إيهاب عبدالواحد في لقائه مع الإعلامية شيرين سليمان ببرنامج سبوت لايت، على قناة صدى البلد: «بحب تامر حسني أوي نجم الجيل مبهج ورجل شامل واستعراضي وبحب شغله».
وأضاف: «أحمد بتشان من الأصوات القوية وشايف مش واخد حقه ومتوقع له نجاح رهيب، وأغنيتي معه مهمة ومختلفة عنه، وأي حد هيغني معايا هتكون مختلفة لأني بحب أقدم جديد».
وفيما يخص أعماله الجديدة، أعلن أنها يحضر لعمل جديد مع الفنان أحمد سعد، معلقًا: «طبعًا فيه مفاجأة جاية كبيرة جدًا وعمالين نطبخلها وهو من أول الناس اللي صدقتني يغيّر طريقة غناه».
هيفاء وهبي وإيهاب عبدالواحد
وتابع إيهاب عبدالواحد: «الفترة الجاية هننزل أغنية جديدة لهيفاء وهبي وحمزة نمرة، وبجهز لمسرحية مهمة جدًا وستُعرض في موسم الشتاء».
وأشار إيهاب عبدالواحد إلى أنه أُعجب بلحن أغنية نانو لتووليت وسانت ليفانت، رغم أنها ليست ألحانه، معلقًا: «بشغلها في العربية علطول رهيبة وطاقتها مميزة».
وتحدث إيهاب عبدالواحد عن ميوله الكروية، قائلًا: «أنا أهلاوي بس بحترم الزمالك وحسيت لأول مرة بعد اللي عملوه أبطالنا في كأس العالم إن الخناقة أكبر من كده ونشجع بعض ورا الزمالك يروح ياخد الكاس ويرجع والأهلي ياخد الكاس ويرجع».
سر نجاح «زمن الشقاوة»
وتحدث الملحن إيهاب عبدالواحد عن نجاحه في موسم ألبومات صيف 2026، وكواليس تعاونه مع النجوم عمرو دياب، وأنغام وتامر حسني.
قال إيهاب عبدالواحد عن تقديمه أغاني مبهجة وحزينة درامية في نفس الوقت: «مصر يا تفرحها وتهيصها، أنا بعشق أضحك الناس وأفرحهم يا إلا يالا بينا نعيط بجد وكمان بنحب نرقص على أحزاننا ولينا طرق خاصةً نعدي بيها المشاكل وده بيعجبني في المصريين».
وفيما يخص النجاح الكبير الذي حققه بأغنية إعلان وربطه بالفنان حسين فهمي وجملة «راح فين زمن الشقاوة»: «أغنية الإعلان أصعب من الأغنية العادية لأن معاك منتج وإزاي تعمل المعادلة بين منتج تعلن عنه وفي نفس الوقت أغنية تمس قلبك وتسمعها في كل الأوقات، وهي معادلة صعبة والحمدلله إني من رواد أعمل الحاجتين مع بعض وأربط المنتج بالناس».
واستكمل إيهاب عبدالواحد: «مافرقش معايا إن أستاذ حسين فهمي مبيغنيش، أنا دايمًا بقول اللي بيعرف يمثل كويس جدًا هيعرف يغني ويؤدي لأن عنده بصمة، والإعلانات بالنسبة لي مسرحية غنائية تحتاج مؤدي وممثل بارع ومش شرط مغني، ولما حسين فهمي ومصطفى فهمي غنوها مكنوش متوقعين النجاح الكبير لكن سمعوا كلامي وصدقوني».
واختتم: «بسعى دائمًا لما أعمل أغنية متكونش موسمية وتستمر وتعيش مع بنتي وبنت بنتي، محدش هينسى راح فين زمن الشقاوة، ومحدش هينسى رمضان في مصر حاجة تانية والسر في التفاصيل، وبحب أجي عند الثوابت وأغيّرها والتغيير والتجديد مهم ويكون لجيلنا بصمة مثل الأجيال السابقة».
تابعوا آخر أخبار بوابة الوفد الإلكترونية عبر نبض
