مودي ناصر: علاء عبدالعال كلمة السر في تألقي.. وكلام أحمد فتحي وسام على صدري

 أكد مودي ناصر، لاعب نادي إنبي الحالي ونجم إيسترن كومباني السابق، أن الموسم الحالي يمثل محطة مميزة في مسيرته الكروية، مشيرًا إلى أن التجارب الصعبة التي مر بها في السنوات الماضية صقلت شخصيته داخل وخارج الملعب، وساعدته على تقديم مستوى مميز مع الفريق البترولي. 

 وأشاد ناصر بدور عدد من المدربين الذين كان لهم الفضل في تطوره، على رأسهم الكابتن علاء عبدالعال، الذي وصفه بأنه “كلمة السر” في تألقه، بالإضافة إلى إشادته الخاصة بالكابتن أحمد فتحي الذي وصف حديثه عنه بـ”الوسام على صدره”.

تجارب صقلت الشخصية والمستوى:

 بدأ مودي ناصر حديثه في مداخلة إذاعية مع الإعلامي أحمد المصري ببرنامج “نجوم دوري نايل” عبر أون سبورت إف إم، بالإشارة إلى أن مشواره في كرة القدم لم يكن سهلًا، وأن التجارب التي خاضها في أندية مختلفة منحته خبرة كبيرة انعكست على أدائه هذا الموسم.

 وقال: “مررت بمحطات كتير في مشواري، وكل تجربة كان لها تأثيرها، السنة اللي قضيتها في إيسترن كومباني كانت نقطة تحول كبيرة في مسيرتي، لأنها كانت أول مرة ألعب موسمًا كاملًا وأكون عنصرًا أساسيًا في التشكيل”.
 

 وأضاف: “ثقة الكابتن علاء عبدالعال كانت كلمة السر في كل حاجة، الراجل وقف جنبي جدًا، وكان بيؤمن بقدراتي من أول يوم، وفضل يشجعني حتى لما الأمور ما كانتش ماشية كويس، هو اللي خلاني أرجع ثقتي في نفسي من تاني”.

 وأوضح ناصر، أن الموسم الذي قضاه تحت قيادة علاء عبدالعال كان الأهم في مسيرته من الناحية الفنية والنفسية، قائلًا:

 “في الموسم ده ساهمت في 6 أهداف خلال 32 مباراة، وكنت بلعب بأريحية كبيرة جدًا، علاء عبدالعال كان بيكلمني دايمًا ويقول لي (إنت لاعب كبير ومكانك في فرق المقدمة)، وده خلاني أشتغل على نفسي أكتر”.
 

بداية قوية مع إنبي: 

 فيما يتعلق بتجربته الحالية مع إنبي، أشار مودي ناصر إلى أنه يعيش واحدة من أفضل فتراته الكروية تحت قيادة الجهاز الفني بقيادة الكابتن حمزة الجمل.

وأوضح:

 “لعبت 10 مباريات هذا الموسم وسجلت هدفين، أهمهما في مرمى زد إف سي، وده كان هدف مهم جدًا لأنه جاب لنا 3 نقاط غالية في توقيت كنا محتاجين الفوز فيه بشدة”.

وأضاف:

 “أنا بحب دايمًا أهاجم وأشارك في الأدوار الهجومية حتى لو مش ضمن مهامي الأساسية، ودي فكرة أنا مؤمن بيها، بعض المدربين بيحبوا اللاعب يلتزم بمكانه، لكن أنا بحب أكون مؤثرًا في الهجوم وأسجل أهداف، وعلشان كده قدرت أحرز 10 أهداف في الدوري حتى الآن”.

 وأشار لاعب إنبي إلى أن الجهاز الفني الحالي يمنحه حرية في التحرك داخل الملعب، ما جعله يشعر بثقة كبيرة في نفسه، مؤكدًا أن الدعم المتواصل من زملائه كان له دور كبير في هذا التألق.

إشادة أحمد فتحي “وسام على صدري”:

 تحدث مودي ناصر بفخر عن إشادة الكابتن أحمد فتحي، المدرب المساعد في الجهاز الفني لإنبي، مؤكدًا أن كلماته كانت بمثابة دافع كبير للاستمرار في التألق.

 وقال: “كلام كابتن أحمد فتحي عني وسام على صدري، الراجل شايف فيا حاجة كويسة، وده بيديني حافز كبير جدًا، هو دايمًا بيكلمني في التدريبات ويقول لي لازم تكون عندك طموح تلعب في فرق كبيرة”.

 وأضاف: “الجوكر بيطالبني دايمًا بالتقدم للأمام، وبيشجعني على التسجيل، بيقول لي ما تخافش من المخاطرة، خُش وسدد، ودي نصايح بتفرق جدًا لأن جايه من واحد عنده خبرة مش طبيعية في الملاعب”.

 وتابع: “كابتن أحمد فتحي بيشاركنا في التدريبات بنفس الجدية اللي كان بيلعب بيها زمان، ما بيحبش يخسر خالص، وده بينعكس على روح الفريق كله، نفس الحكاية مع كابتن محمد حمص وكابتن أحمد عبدالظاهر، التلاتة بيشتغلوا بقلبهم وبيحاولوا يطلعوا من كل لاعب أحسن حاجة فيه”.
 

الجهاز الفني ودور الدعم النفسي:

 أشاد مودي ناصر بالدور الذي يقوم به الجهاز الفني لإنبي في التعامل مع اللاعبين نفسيًا وفنيًا، مشيرًا إلى أن قربهم من اللاعبين أحد أسرار نجاح الفريق هذا الموسم.

 وقال: “الجهاز الفني كله على أعلى مستوى، مش بس في الناحية الفنية، لكن كمان في التعامل الإنساني، الكل قريب من اللاعبين وبيتكلم معنا بشكل دايم، وده بيخلينا نحس بالراحة ونركز في الملعب بس”.

 وأضاف: “أي لاعب بيغلط بيتكلموا معه بهدوء، وبيحاولوا يصلحوا الغلط من غير ضغط، وده بيخلي الفريق كله في حالة هدوء نفسي، دي حاجات صغيرة لكن بتفرق جدًا في النتائج”.
 

دعم إداري غير محدود من أيمن الشريعي:

 وفي ختام حديثه، وجه مودي ناصر رسالة شكر لرئيس نادي إنبي، المهندس أيمن الشريعي، مؤكدًا أنه نموذج فريد في الدعم والمتابعة.

 وقال: “كابتن أيمن الشريعي قريب جدًا من اللاعبين، وده بيدينا دفعة كبيرة، بيحضر كل المباريات، بيتكلم معانا باستمرار، ودايمًا في ضهرنا زي ما بنقول. هو مش مجرد رئيس نادي، هو كمان بيشجعنا كأنه واحد من الفريق”.

 وأضاف: “وجود رئيس نادٍ متابع ومهتم بكل التفاصيل بيدي طاقة إيجابية لكل المجموعة، وإحنا عايزين نرد الجميل ده بنتائج قوية في الدوري إن شاء الله”.
 

طموحات المرحلة المقبلة:

 اختتم مودي ناصر حديثه بالتأكيد على أن إنبي يسير في الطريق الصحيح، وأنه يطمح لتقديم موسم استثنائي مع الفريق، قائلاً:

 “الطريق لسه طويل، لكن عندنا طموح كبير جدًا، إحنا بنشتغل بضمير وبنحلم إن إنبي يكون في المربع الذهبي، الفريق عنده كل مقومات النجاح، والإدارة والجهاز الفني بيوفروا لنا كل حاجة”.

 وختم قائلاً: “أتمنى أواصل التألق وأكون عند حسن ظن الناس اللي وثقت فيّ، سواء كابتن علاء عبدالعال اللي بدأ معايا المشوار، أو كابتن أحمد فتحي اللي دايمًا بيدعمني، لأن وجود ناس زيهم في حياتي الكروية هو السبب في إني أوصل للمرحلة دي”.