موال البنفسج

من بين ثمار الإبداع المتناثرة هنا وهناك، تطفو على السطح قطوف دانية، تخلق بنضجها متعة تستحق التأمل، والثناء، بل تستحق أن نشير إليها بأطراف البنان قائلين: ها هنا يوجد إبداع..
هكذا تصبح "قطوف"، نافذة أكثر اتساعًا على إبداعات الشباب في مختلف ضروبها؛ قصة، شعر، خواطر، ترجمات، وغيرها، آملين أن نضع عبرها هذا الإبداع بين أيدي القراء، علّه يحصل على بعض حقه في الظهور والتحقق.

"سمية عبدالمنعم"

في بيوت الشعر ممكن
تلقى حلق الباب ملامحه شويّتِين متغيَّرةْ
والمداخل للمرور تدّيك إشارة قصيّرة
والغريبة انك لو اتقدّمت خطوة، تلاقي ضيف ..
بيرجعك خمسين ورا
تمسك المحمول، ينطّ التُّكْتكالي وْكنّه راكب في الحواري مسيّرة
هات يا رمز وْخد يا ورد من البنفسج 
والحكاية بـ تبتدي بموال حنيّن
أو عبارة بتترسم من ألف كلمة ونقطة في الٱخر تدور
بعدها السلك الموارب يتْلسع من غير ماتور 
بس خد بالك يا صاحبي الشطرة لازم تنْكتب تحت فـْ سطور
والشُّطور تصبح قهاوي معمّرة البوست فْـ بروجرز
أو عبارة  مشيّرة الباب ع الساطور
والكياس شغّالة بتعبّي السواقي فـْ قرْن تور
وعشان رنة حنين م السنترال حتما تغني لـ عبحليم والست ثومة

كنت بتعاطى الشريط لاجلن أبلبع لانهيار
كنت بتحجّج بتغيير المسار
وامتحنت ف لجنة جواها المراقب ..
غطى وشه و قال تغشوا بمنتهى الذوق والتحوّل
النتيجة اتعلقت .. بس التقيتني ف أولى أوّل
مش مفاجأة بجد، لكن ..
كنت باسمع في الحضانة الميس بتضحك من شقاوة الكنترول 
كنت لما اسألها عن إمته هروّح
تبتسم وتقول يا بَخْتَكْ
بس مافهمتش ساعتها الـ .. 
مش مهم 
المهم إني افتكرت الشكوى كانت
مِ البيرول
يعني إيه مَوَّال بيدخل جوّا رُول؟
يعني حاجب يرفع الجلسة بإشارة
يعني حكم بدون أمارة
والحرارة تزيد يا بختك
شوفت صُرة بتتنفخ عند الخسارة؟
شوفت مرة التوكتُكالي بيصطبح من غير ستارة؟
شوفت يوتيوبر بيتغزل فـ جارة؟
طب خد التايهة البنفسج 
م الورود طلَّع شرارة
قال وإيه.. 
بيّاع عطور
شوفت أكتر م التريند الأوّلاني
بنت ريس عنكبوت 
حاطة راسها فـ نعل بوت
والجنايني بيشتري السيستم كلاوي وفص كبدة 
كله عايش بالروبوت
مش مهم
المهم ان العقارب تلدغ الثانية فـ تابوت
واللي عايز عمره يطْوَل 
يستعد لأي موت.. 
يمكن الأيام تهنج
والبيوت ترجع بيوت!