آلاء بنتى

من بين ثمار الإبداع المتناثرة هنا وهناك، تطفو على السطح قطوف دانية، تخلق بنضجها متعة تستحق التأمل، والثناء، بل تستحق أن نشير إليها بأطراف البنان قائلين: ها هنا يوجد إبداع..
هكذا تصبح "قطوف"، نافذة أكثر اتساعًا على إبداعات الشباب في مختلف ضروبها؛ قصة، شعر، خواطر، ترجمات، وغيرها، آملين أن نضع عبرها هذا الإبداع بين أيدي القراء، علّه يحصل على بعض حقه في الظهور والتحقق.

"سمية عبدالمنعم"

الورد خبط ع البيبان الصبح 
والنور ضحك فوق الشجر بشويش
ما اعرفش ليه حاسس (بقلبى طلع له ريش)
وكأنى لقمة عيش فى إيد جنّي
عيل فى عمر أقل من سنّي
وكأنى واحد غيرى وكأنى 
شمس الجناين قايمة بتغني
يا بنت يا طعم الندى استني
دق الجرس هربت هناك مني
فمشيت مبلل خدها حواديت
شامم ريحتها ف كل شيء فى البيت 
غاسل إيديا بضحكها الطازة
دق الجرس 
...... دخلوا الورود فاظه 
مكتوب عليها أولى منقوله
من مريلة بشراشيب لألماظة
تضوى ف حوارى القلب وتلالى
وتجيب لى من إيدها اللى يحلالى
يا بنت عاليه وبيكى انا هلالى
غاليه وغلاوتك حاجه مالهاش زىّ
سنه أولى عدت وابتدت أولى
كبرت فى عينهم حبة الفولة
لكنها فى عنيا نفس الضى
الأكسجين والمىّ 
حباية السكر فى بحر الشىّ
فى عينيا لسه آلاء
أم الضفيرتين اللى بتقول (واء)
وتقول كمكماية
أنا ماشى جنبك واللا ويايا
ماشيه ف ملامحى وصوتى واللا بعيد
نده المدرس من سنين عدت:
آلاء سعيد حامد شحاتة.... ترد
رديتى من فرط الجمال اتخض
طلّعت من جيب شنطتك حلمين
ووقفت أقول بشريطه وضفيرتين
وبضحكه تشبه ضحكتى امبارح
لحظة ما ابويا أخدنى وداني
وندهنى أستاذ يشبه الأستاذ
لكنه كان جاى من طابور تانى
غير الطابور اللى الملاك داخلاه
الصبح قاد من حصة الفيزيا
واللا انتى قلبك قاده من جواه
من يوم ما شفتك عضمى قال: الله
من يوم ما حس بضحكتك.... صلى
كانت شطوط القلب محتله
كانت غصون الروح ورق دبلان
الورد خبط ع البيبان بشويش
والنور ضحك من وردة الرمان
حط الحمام ع الصورة واستنى
كوز الدرة ف وسط الغيطان غنى
كبرت آلاء جوه القلوب سِنّه
لكنها جوايا لسة آلاء
أم الضفيرتين اللى بتقول (واء)
وتقول على البسبوسة (لحلالة)
وتقف تناغى ملايكة فى الصالة
وتكسّر الشياطين
ثانوية عامه ولسة بنت يومين
آلاء سعيد حامد شحاتة... ترد
رديتى من فرط المحبة اتخض
لا سد هذا المحترم ولا صدّ
هيكل جمال اتفض ع الشطين 
طلّعت من جيب شنطتك قلبين
رايحين معاكى المدرسه حراسة
شبّهت على قلبى اللى كان فيهم
طلّعته لازقه ف طرفه مصاصة
وعروقه م (اللحلالة) متعاصة 
يا بنت نور الشمس فى التختة
خبيتى قلبى إزاى فى كراسه

*كمكماية: طمطماية
لحلالة: حلاوة