البوسة مش جريمة.. راغب علامة يهاجم قرار إيقافه عن الغناء بمصر (فيديو)
ردّ النجم اللبناني راغب علامة على قرار إيقافه من نقابة المهن الموسيقية، قائلا: "مش دوري أقول لحد ينزل من على المسرح، أنا أهلا وسهلا بكل معجب وكل معجبة اللي عايز يسلم اللي عايز يحضن، أنا بتصرف زي ما في بلدي وبعتبر العادات المصرية واللبنانية زي بعض بالظبط، القبلة ليست جريمة بالدليل أن فيه كلبيات فيها قبلات، ليه الأفراح فيها قبلات وأحضان ليه متطلعش قرار غير ده أنا فنان جمهوري بيسلم عليا».
وقال راغب علامة، خلال مداخلة هاتفية مع الإعلامية نهال طايل، ببرنامج «تفاصيل» على قناة صدى البلد 2، «أنا إيه الجريمة اللي ارتكبتها؟ قرار منع الغناء ده بمثابة قرار إعدام! أنا بحب مصطفى كامل جدًا، ويمكن يكون في خلاف في وجهات النظر، بس أنا سألته، لما فنان يعمل غلط، قولي الغلط بتاعه إيه؟ إنه كان لطيف مع الناس وبيتعامل معاهم بمحبة؟ النقابة المفروض تحميني أنا».
فين الجريمة
وتابع راغب علامة : «البنت اللي اتصورت معايا وبَاستني كانت ورا الكواليس، فين الجريمة؟ دي مصر.. هوليود الشرق! طول عمرها بلد الفن وعبدالحليم حافظ ونادية لطفي وسعاد حسني ومحمود ياسين.. عباقرة كانوا بيعبروا بقبلات حميمية مش خليعة».
وأضاف: «أول حاجة هعملها لما أنزل مصر الأسبوع الجاي، هروح على نقابة الموسيقيين، ده بيتي، أنا زعلت إن محدش كلمني. طب كنت عايزني أعمل إيه لما واحدة تتصور وتبوسني؟ الجريمة اللي ارتكبتها إيه؟ دي واحدة باستني مش أنا اللي بوست، وواحدة اتصورت على المسرح، فين المشكلة؟».
أكد الفنان مصطفى كامل، نقيب المهن الموسيقية، أن قراراته بشأن أزمة حفل الفنان اللبناني راغب علامة في الساحل الشمالي لها ما يبررها، رافضا التهوين من الأزمة.
ووجه مصطفى كامل خلال مداخلة هاتفية مع الإعلامية نهال طايل في برنامج «تفاصيل» على قناة صدى البلد 2،: رسالة حادة إلى منتقدي قرارات النقابة الأخيرة، قائلا:" ما حدث لا يمكن التقليل من شأنه وهو ليس مجرد إجراء إداري، وليست أزمة صغيرة كما يحاول البعض تصويرها، واللي بيهونوا من الأمر مش عايز أغلط فيهم».
وتابع مصطفى كامل: :«نحن تعاملنا مع الأزمة بكل احترام، كما نحترم المسارح في لبنان والرياض وكافة الدول العربية، ونؤكد أن مسرح مصر لا يقل شأنًا عن أي مسرح عربي».
لماذا يتم التهوين؟
وأردف :«هل من الممكن أن يحدث ما جرى في حفلة الساحل بأي دولة عربية؟ لماذا يتم التهوين؟ أعتذر للمشاهدين عن انفعالي، لكن ما حدث لا يمكن السخرية منه. لما نغلط لازم نعترف.. وإلا لا نستحق الحياة».