طارق يحيى يفتح النار على إدارة الزمالك
شن طارق يحيى لاعب الزمالك السابق هجوماً لاذعاً على إدارة النادي الأبيض بعد اقتراب عبد الناصر محمد من منصب مدير الكرة بالفريق الأول لكرة القدم بالنادي.
وقال طارق يحيى في تصريحات تليفزيونية: "أنا مصدوم ومذهول من اللي بيحصل داخل نادي الزمالك.. نفسي مسدودة، وقرفان من القرارات والتغييرات اللي بتحصل. حاجات كتير جداً مفيهاش منطق."
وأضاف: "مع كامل احترامي للأسماء اللي دخلت النادي مؤخرًا زي حسن جمعة والكابتن عبد الناصر محمد، لكن السؤال هنا: فين أبناء الزمالك الحقيقيين؟ وائل القباني مشي، عبد الواحد السيد مشي، إسماعيل يوسف فين؟ هوية نادي الزمالك بتروح، والله بتروح!"
وأشار إلى أن الصمت لم يعد خيارًا، قائلاً: "إحنا صابرين على بلاوي وكوارث كتيرة جوه النادي وبنسكت وبنساند عشان إحنا ولاد النادي، بس مفيش ولاد نادي دلوقتي. أنتم بتضيعوا الزملكاوية وهويتهم."
وتابع: "أنا بتكلم لمصلحة النادي، ورب الكعبة لا طامع في منصب ولا وظيفة. بيتقال محسوب على فلان أو علان؟ أنا بتكلم كزملكاوي حقيقي"
واكمل لاعب الزمالك السابق: "أنا مش معترض على فكرة تعيين مدير رياضي من خارج النادي، زي إدوارد مثلًا لأن ده منصب إداري لكن مدير الكرة لازم يكون من لعيبة الكورة، وعبد الناصر محمد، مع احترامي له مش هو الشخص المناسب للموقع ده."
كما أعرب عن دهشته من بعض التغييرات المرتقبة داخل النادي قائلاً: " اللي بيتقال إنهم هيمشوا حتى بعض عمال أوضة اللبس! هو ده اللي فاضل؟ نجيب عمال من الأهلي كمان؟"
واختتم طارق يحيى تصريحاته :"عندنا أسماء تدريبية زملكاوية قوية زي طارق مصطفى، مؤمن سليمان، خالد جلال، محمد حلمي، محمد صلاح، سامي الشيشيني، ومع ذلك أنتم مش واثقين في أي حد من أبناء الزمالك؟ حتى التشجيع بقى صعب بقينا مترددين بسبب اللي بيحصل إحنا ساكتين وبندعم، بس مش للدرجة دي."