سهلة ومش مستاهلة!

يُسعدنا، أعزائى مُشاهدى برنامج «خُش فى الممنوع» أن نستضيف على الهواء مباشرةً، الدكتور» فصيح خُف الريح « كبير كُبراء مكافحة الغلاء، وتخفيف العناء.

وبما أن شعار برنامجنا «قُل الصراحة وفُز بالتفاحة» يمكنكم أعزائى المُشاهدين، استقبال مكالماتكم على أرقام البرنامج، الموجودة الآن على الشاشة.

< آلووووه.. معانا أول اتصال

- معاك «عاطل» وده أسمى الحقيقى مش هزار.. بصراحة بدون لف ولا دوران.. بقالى 7 سنين متخرج من الجامعة.. وكُل ما أروح لأى شغلانه يقولولى: معاك واسطة.. أقـــولهم : لأه.. يردوا عليّا: روح بسرعة أشترى طابع دمغة من البوستة.. ولما أرجع آلاقى الجواب باين من عنوانه!

< معانا تانى اتصال على الهوا

- معاك أم العيال "تعبانة" من كفر "كُل واشكر" عايزة أقول للبيه «فصيح» اللى منور الشاشة، كلام فى التمام: أنا والعيال ولادى نفسنا نأكل البروتين المتين.. علشان إحنا شبعنا من البروتين النباتى اللى حدانا فى الكفر!

< آلووووه.. مين معانا؟!

- معاك الفلاح «ناصح» من بلد المليون قمحة: حدانا جزارة الأمانة وصاحبها المعلم «حنكورة « بيعرض علينا كيلو اللحمة بــ 100 جنيه، واحنا رافضين العـرض ده!

< تُرفضه ليه يا عم «ناصح»!

- أصلها يا فندم لحمة حصاوى، ومدبوحة خارج السلخانة!

< معانا اتصال من كفر «الهنا»

- آلوووه، وحياتك يا ابنى عاوزاكِ تبعتلى عشر أرغفة من مشروع «الـ 100 رغيف»علشان فلوس المنحة الشهرية، خِلصت من أسبوع، وعيالى السبعة جاعوا قوووى!

< يا ست الهنا.. إحنا مش طابونة عيش!

< الإتصال اللى بعده

- معاك جوز الست اللى طلبت عشرة أرغفة من مشروع «الـ 100 رغيف».. ياريت تبعتوا معاهم زلعة «مِش» بدوده !

< دِى طلبات، سهلة ومش متساهلة.. بس الكلام الغلط فى اللى قولتهُ.. إحنا قناة «فضاحية» مُحترمة، مش مطعم «أبو ظريفة» الشعبي!

< مش سامع كويس يا جماعة.. ميين بيتكلم؟

- بصراحة أنا واحد من الناس، زعلان من الضيف اللى جنبك.. عايز أصارحك بمشكلتى وأمرى لله.. عندى «حداشر» عيّل وأمهم وعايشين فى أوضة بحمامين إيجار قديم.. ياريت البيه ضيفك، يوصى علينا بتوع الإسكان الشعبى، يحجزوا لينا غرفتين «ستوديو» بدون مقدم فى مشروع «الكمبوند الجديد»!

< فى شوشرة يا جماعة.. الصوت مش واضح.. مين معانا؟!

- (عبر المايك الداخلي): معاك مراقب عام البرنامج.. ياريت يا «شطورة بك» تخرّجنا من الكلام الممنوع، وتنهى البرنامج حالًا، علشان البيه «فصيح» مزنوق أوى من حِوارات الناس، وعايز يُدخل الـwc)

آَخِر شَوْكَشَة

يسامحها حكومتنا، العيشة بقت نار، والغلابة بقوا فى سوق النخاسة بأرخص الأسعار، وعجبى ع الزمن العجبى !!