شواكيش
الحكومة هترجعنا للتوقيت الصيفى 25 أبريل، وطبعاً موجات الغلاء اللى جاية، ساعة تروح وساعة تيجي!
< فى الموازنة الجديدة، هدية الحكومة للغلابة «دعم نكدي»، وكل طفل هيتولد مديون بـ105 آلاف جنيه، وطبعاً المنحة الاستثنائية علبتين لبن بودرة!
< الدنيا تيكا بولتيكا، وإحنا فى زمن الخلطبيطة، كده كده هندفع للحكومة الجباية من غير شوشرة ولا زيطة!
< آآآه يا زمن خلطبيطة، أصبحنا نمشى تاتا تاتا جنب «الحيطة»، ونفطر فول «خلطبيطة»، ونتغدى «أورديحي» عند «عم أوطة»!
< إحنا اللى دهنا الهوا دوكو، وعبينا البنزين فى أزايز، وأكلنا اللحمة عالنار نيَّة، وحلينا بحلة ملوخية، ويا خوفى على طشة الغلا الجاية!
< يا عزيزى كُلنا لا ننسى أيام «الكحرتة»، إلا أن الفنان «نمبر زيرو»، غنى ببدلة الرقص الشرقى على واحدة ونص.. ورقصنى ياااااا!
< على رأى عم «عوكل»: إيه اللى جاب القلعة جنب البحر، وعلى رأى الناس الغلابة: إيه اللى جاب الأسعار جنب محرقة الغلاء؟!
< نحن نعيش فى زمن الشوكولاتة، وعلى رأى أغنية السندريلا: «الشوكولاتة ساحت، راحت مطرح ما راحت»!
< بصراحة والصراحة راحة: محدش فينا فاهم حاجة، واللى فاهم ناسى اللى فاكره، علشان إحنا كلنا بنعيش فى زمن التووووهان ومحدش فاهم حاجة!
< صحيح، محدش فاهم حاجة، ومفيش صاحب يتصاحب، علشان إحنا بنعيش فى زمن «المصالح بتتصالح»!
< على نغمات أغنية إسماعيل ياسين: ناس بتكسب وما بتدفعش، وناس بتدفع الجباية وما بتتكلمش!
< فى هذا الزمان نتذكر الحكمة الصينية: إذا كنت تخطط لكى تعيش أسبوعاً فأزرع فاكهة، وإذا كنت تخطط لكى تعيش شهراً فأزرع خضراً، وإذا كنت تخطط لكى تعيش سنة فازرع شجرة، وإذا كنت تخطط لكى تعيش إلى الأبد فازرع عقولاً، وطبعاً إذا كُنا نخطط لنزرعها «كرنب زبادي» هتطرحلنا رز بـ «لبن»!
< ظاهرة ارتفاع حالات الطلاق بين المتزوجين حديثاً، تأكيد بأن الزيجات فى أيامنا الغابرة تتم على «كف مأذون»!
< الناس أجناس، ناس فضة وناس نحاس، وناس دهب مالوش قياس، وناس وسواس خناس، يزرعوا الفتنة بين الناس، ومن الناس إحنا فى زمن الغلبان ينداس!
آَخِر شَوْكَشَة
< فينا اللى مكفينا، واللى مش مكفينا حكومة ملهاش فينا، دى مستكترَة الغلا لينا، وسايبة نار الأسعار تولَّع فينا، والناس الغلابة تُصرخ بالآهاااات، ودُول يا ناس من أهالينا، ويا عينى على حكومة الأسعار الحرة والعيشة المرة!!
تابعوا آخر أخبار بوابة الوفد الإلكترونية عبر نبض