ع الطاير
إيه السكوت ده؟ إيه الراحة والرحرحة دي؟ للدرجة دى كانوا مزعجين طيب ليه بقى ما نستمر على كدة وكل واحد يروح لحاله.. أكيد كان شعور الناس مختلفًا ومتبايًان ليلة الثلاثاء عندما وقع الطلاق للأربعة الزنانين فيسبوك وواتساب وماسنجر وانستجرام وأكيد كمان إن معظم الناس لم تنتبه فى بداية الأمر إلى السقوط الجماعى لهذه التطبيقات ظنًا أن العيب فى النت وطبعًا اقفل الراوتر وشغله واقفل الموبايل وافتحه مفيش فايدة وضحكنا كلنا لما كلمنا بعضنا واكتشفنا إنه مش النت ياجماعة ده ليلة سقوط جماعى أو طلاق مؤقت ولما طال الوقت تحول الأمر إلى نكتة حلوة واتضح للبعض إن الدنيا أحلى من غير الأربعة الزنانين ولقينا فرصة نشوف بعض ونعيش العالم الحقيقى بعيد عن الافتراضى واستمر السكوت والراحة نحو 6 ساعات كانت كافية للوقوف على أهمية أو عدم أهمية الأربعة وبقى تويتر وحده للمغردين يضحكوا ويتريقوا براحتهم على رواد الواتس والفيس والماسنجر والإنستا وجاءت تعليقات فنانين ونجوم تحمل سخرية لاذعة ومنهم من قال عشان تبطلوا تقولوا عليه واطس أهو اتقمص ووقع.
المهم أن الأقاويل والفتاوى اشتغلت على القهاوى فمن قائل إن عيل صغير عنده نحو 13 سنة كده هو اللى هكر المواقع ووقعها وحد تانى يقول لك أصل مارك عامل باسورد واحد وناس ربطت الحكاية بأحداث ملهاش علاقة خالص وكانت ست ساعات لطيفة خالص مليئة بالفتاوى والضحك والتريقة وافتكرت رباعية صلاح جاهين العبقرية لما قال على الدنيا
أحسـن مـا فيهـا العشـق والمعشـقة
وشـويتين الضـحــك والتـريقـة
شـفت الحيـاة، لفيـت، لقيـت الألـذ
تغييـرهـا وده يعنـى التعب والشـقا
عـجبى
طيب لما اتغيرت الدنيا ومبقاش فيها فيسبوك واخواتها الزنانين واتس وماسنجر وإنستا إيه اللى حصل تعب وشقا ولا كانت الحياة ألذ ألذ ألذ.
يبقى السؤال بعيدًا عن حسابات خساير مارك من هذا التوقف أو السقوط وده كمان كان محل فتاوى كتير وصل الرقم إلى 70 مليار دولار وخد عندك بقى يعنى كم بالمصرى يعنى كل ده فى ست ساعات وحد تانى يقول لك لا يا سيدى دى حسبة سبعة تمانية مليار بس يعنى فكة إنما السؤال هو كيف وقعت السوشيال ميديا فجأة لمدة 6 ساعات متواصله وهى اطول فترة سقوط منذ اختراعها وكيف كانت الحياة بدونها وماذا يضمن عدم تكرار السقوط أسئلة تبحث عن إجابات وسط غموض وحكاوى القهاوى.