أوراق مسافرة
كان من المفترض أن أكمل باقى سلسلة مقالاتى حول أكواد الإعلام التى أعدها المجلس الأعلى لتنظيم الإعلام لعمل وإرساء القواعد الأخلاقية والمهنية للتغطية الإعلامية، بغية التصدى لهذاالمنحدر اللاأخلاقى الذى هيمن على كثير من وسائل الإعلام بكل أنواعه، ولكنى أستسمح القارئ بإرجاء باقى السلسلة للأسبوع القادم، لأن هاموشا ظهر على سطح الحياة فجأة، وحاول ان يؤرق مؤسسات لها مكانتها وثوابتها المحترمة فى مصر بغية نشر الشائعات، وبث عدم الثقة، فى وقت نحتاج فيه الى كل جهد لاستكمال مسيرة البناء ومواجهة الفساد الحقيقى لا المصطنع.
وأقصد بهذا الهاموش هذا الشاب شبه الفنان، والشبه مشهور، محمد على الذى تحول الى بطل فجأة لدى قطر وكل أعداء مصر، وأصبحت كتائب الإخوان الإلكترونية تتغنى بما يقوله وكأنه ثوابت أو قرآن لا يقبل التكذيب أو التحليل، ولكنى والحق يرجع لأصحابه، وصلتنى رسالة واتس من مواطن مصرى حلل فيها قصة محمد على بعمق هائل، عمق قد يكون فات على كثير منا، يقول المواطن ان محمد على ووالده اشتغلوا مع المؤسسة العسكرية منذ 15 عاما فى مجال المقاولات، اى منذ عام 2002، وتوقف عملهم مع الجيش عام 2017.
ويتابع المواطن المصرى فى رسالته «محمد على ننوس عين أمه، اشتغل من كل الفترة دى عشرة أعوام فى عهد مبارك، وسنة فى عهد المشير طنطاوى، وسنة فى عهد محمد مرسى، وسنة فى عهد المستشار عدلى منصور، وسنتين فى عهد السيسى، وده بيعنى أن كل السنوات التى عمل فيها مع رؤساء ما قبل السيسى، كان شغله مع الجيش حلو وتمام وقشطة، وشيلنى وأشيلك ورشاوى وفساد والبك «محمد على» ساكت والدنيا مزهرة معاه وعمل ثروته الهايلة دى، ولما اشتغل سنتين فى عهد السيسى، اتفاجئ انه بيتعامل مع مقاولين صح وتمام، وان حنفية الفساد بدأت تتقفل أمامه، فزعل ننوس عين أمه، وطلع يخبط فى السيسى، ويشتم ويهرتل بهبل وعبط، وهى دى ثقافته وتعليمه، هو مش عيب ابدا إنك حاصل على دبلوم، لكن العيب إنك تتكلم عن إدارة دولة وإنت مش فاهم أى حاجة، بالضبط زى حلاق الصحة اللى بيفتى بعمليات جراحية، وكمان عايز المستشفى يمشى على مزاجه، وتعقيم ايه يا جدع.. حلاق بقى.
يعنى يا ننوس كان الشغل مضبوط الأول أيام مبارك، وطنطاوى، ومرسى وعدلى منصور وأيام السيسى بدأت تكتشف الفساد والرشاوى، فانت بقى عملت شريف وضميرك صحى ورفضت تلعب مع القذارة، وقررت تتوب وتستغفر وتنصح الشعب المصرى، طب يا ننوس ثروتك حوالى «»300 مليون جنيه، وده كلامك انت والسيد والدك، والملايين دى عملتهم إمتى، وفى عهد مين يا أمور، أكيد مش فى السنتين بتوع السيسى.
للأسف انت معتمد على إن كتير من الشعب بيحب الفتى والحكى بأى حاجة، وكتائب الإخوان بالسوشيال ميديا مستنياك إنت وغيرك عشان يولعوا فى الشائعات والفتاوى، طيب قول كلام يدخل العقل وبطل «صياعة» علينا، انت عليك فلوس للى حجزوا شقق عندك ولم يستلموها، وعليك ديون للبنوك، وفلوس للموردين وللعمال، وأخذت كل الأموال وهربت، ايه دخل الرئيس السيسى والجيش بالموضوع.
فيه فساد، اه فيه فساد، والجهات الرقابية بتقوم بدورها على قد ما بتقدر واللى بيتمسك بيطلع عين أمه، واذا عندك مستندات عن ناس فاسدة، قدم المستندات، ولا هو هرى وجعجعة، وبكده تظهر الحقيقة انك كنت بتسرق وتهلب قبل كده، ولما اتقفلت عليك الحنفية فى عهد السيسى، اتقرصت وصرخت.. فبلاش «صياعة» عشان اللى عنده عقل هيكشفك بشوية تحليل ومنطق.
هى دى رسالة مواطن مصرى شريف بيرد بيها على هرتلة محمد على الهارب ننوس عين أمه.