طيب ومن غير أمل نعرف نعيش إزاي.. الأمل سر الحياة.. سر الوجود.. من غير أمل ندبل ونموت.. من غير أمل الحياة تتسرسب من أيدينا.. حتى نفاجأ بقطار العمر وقد وصل لمحطته الأخيرة.. ومن أفضل ما كتب عن الأمل.. تعالوا نقرأ معا هذه الكلمات المعبرة.. والتى سطرتها يد أحد الحكماء:
في سنة ١٩٥٠ كان في دكتور علم نفس اسمه Curt Richter الدكتور دا عمل تجربه غريبة شوية.. جاب شوية فئران.. وحط كُل فار منهم في جردل مصنوع من الإزاز.. وملا نُص الجرادل ميه وولع سيجارته.. ومسك ساعته في إيده.. وفضل يحسب الوقت.. ويراقب الفئران وهي عمالة تعوم في الجرادل!!
كُل فار جوا جردل.. وليه إزاز بالذات؟ قالك عشان الفار ميعرفش يتسلق ويخرج. في فار قعد ٥ دقايق واستسلم للغرق التاني ٤ دقايق.. اكتر فار فضل يقاوم الغرق ١٥ دقيقة وبعدين استسلم.. الدكتور curt قرر يكرر نفس الحوار دا تاني بس بشوية تغييرات بسيطة.. حط الفئران جوا الجرادل الإزاز تاني بس كان بيراقبهم والفار اللي يحس إنه خلاص هيغرق كان يطلعه وينقذه وينشفه ويسيبه يرتاح.. كل الفئران عمل معاهم كدا اللي يحس انه هِمد وهيغرق يطلعه وينقذه قبل لما يغرق بشويه.. وبعد لما طلعهم ونشفهم وارتاحوا.. قام شايلهم وراميهم في الميه تاني! طبعًا إحنا قولنا إن اكتر فار قاوم الغرق قعد ١٥ دقيقة واستسلم!.. تخيلوا الفئران لما اترموا تاني قعدوا قد إيه؟ أقل فار فيهم قعد يقاوم ٦٠ ساعة! تخيلوا ٦٠ ساعة مش دقيقة! وفي فار منهم قعد يقاوم الغرق ٨١ ساعة.
يعني قعد حوالي ٤ أيام يقاوم الغرق من غير استسلام.. اشمعني يعني طولوا المرة دي في المقاومة أضعاف أضعاف المرة الأولانية؟ قالك لأنه فى المرة الاولي كانوا فقدوا الامل واستسلموا.. لكن في المرة التانية لما طلعهم وانقذهم قبل الغرق ونشفهم ورماهم تاني كان عندهم أمل أن في طوق نجاه هينقذهم.. بعد دقيقة بعد اتنين، حتى لو بعد ٨١ ساعة!!
عاوز أقول إن الامل هو الخيط اللي ممكن يتعلق بيه اي انسان، القشاية اللي بيتعلق بيها الغريق، فاوعي تعشم حد وتديله الامل وتخلي بيه، ممكن يقاوم الدُنيا ويتحدي العالم علشان عنده امل وثقه فيك، علشان مُتفائل انك يستحيل تخذله او تتخلي عنه.
الفئران قعدت تقاوم علشان عندها يقين ان في حد هينقذهم.. الإنسان ممكن يتغير ١٨٠ درجة لو إنسان علقه بحلم سواء جوازة.. شُغلانة.. يساعده يحقق حاجة معينة، والله ممكن ينام ويقوم يحلم باليوم دا!
متقولش لابنك لما تنجح هجيبلك كذا وابنك ياكل الكتب وترجع تخلف وعدك، في ناس ممكن تعلق أحلامها وطموحاتها علي كلمة ووعد منك!
وكمان حاجة تانية: ممكن الانسان قدراته تتغير وتبقي تهد جبال لو نفسيته حلوة.. أنا أمي ممكن تشيل البيت وتقلبه فوقه لتحته تنضيف لو ابويا باس دماغها وقالها الله يقويكي! بيديها زقة ودفعة تقويها.. وبيشحن بطارية السعادة جواها! العيل الصغير بيصحي بصعوبة للمدرسة وبطلوع الروح.. بس يوم العيد بيصحي الفجر وممكن يطبق! من فرحته. تخيل دكتور الكلية طبطب علي كتف الطالب وقاله انا متأكد انك قدها. تخيل واحد قال لمراته انا مقدرش استغني عنك وجاب لها ورداية دي ممكن تولع فى البيت من فرحتها.
فاوعي تدي الامل لحد وتقطعه.. جايز تكون انت الحبل الوحيد اللي غيرك شادد فيه.. واوعي تكون بإيدك تفرح حد وتحزنه وتكسر بخاطره كدا انت بتهده وانت مش داري.. اوفي بوعدك وفرح اللي منك.. لأن ربنا هيحاسبك علي كدا يوم القيامة.. الحُزن بيهد والاكتئاب بيدمر الإنسان من جواه.