حتخرج افراج صحي

كنا قبل التمام بحوالي ساعة حينما دخل علينا شخص هجمة ولابس بدلة بني.. انا الاول تصورت انه ضابط من مباحث أمن الدولة لكن خدنا وادينا معاه في الكلام فاتضح انه «هاشم سليمان عزت» كبير طياري مصر للطيران وهو ابن اللواء سليمان عزت قائد سلاح المدفعية لهذا لزم التنويه لأن فيه لواء تاني اسمه سليمان عزت قائد البحرية

وعرفنا ان تهمته التخابر مع العدو الصهيوني وانه محكوم عليه بالاعدام شنقا وان اوراقه احيلت الي مفتي الجمهورية وصدق عليها فضيلته يعني الآخ جاي ينتظر تنفيذ الحكم.. طيب وبعدين انا حاموت واعرفه ده جندوه في الموساد ازاي! وليه؟ واكبر طياري مصر للطيران ودخله يكفي عشر  اسر بحالها يعني مش محتاج وابوه جنرال في القوات المسلحة المصرية المشتبكة الآن مع العدو الصهيوني في معركة حياة أو موت! وكان بيمنعني من الاقتراب منه لمعرفة الاجابة علي اسئلتي كان يمنعني عرف يلزمنا جميعا بعدم التعامل مع الجواسيس يعني لا صباح الخير ولا مساء النور ولا سلام ولا كلام ولذلك كنت انتهز فرصة نزول الزملاء طابور الشمس مثلا أو العيادة أو الحمام واروح ناطط عنده وهات يا سلامات وهات يا مجاملات وهات يا دردشة لحد ما احصل منه علي اكبر قدر من المعلومات لكن ابن الحرام كان صاحي وكان بيديني المعلومات بالقطارة يعني في عيد ميلاده الاخير أهداه أبوه  اللواء سليمان عزت عمارة في المنيل تحتوي علي 10 شقق وعرفت كمان أنه زير نساء وبرم وأن السيدة زوجته مدام

راجية كانت في الأصل زوجة أحد أصدقائه وكلها منه بحرفنة - حسب تعبيره - وذات يوم عاد من الزيارة ومر علي زنزانتي ووقف علي الباب قائلاً:
- ياساتر
قلت له:
- اتفضل طريقة اخضر
قال لي:
- لا أنا مستنيك في اوضتي عندي كلام طازة عاوزك تسمعه.
قلت له:
- حالا اسبقني وانا وراك
وفعلاً انصرف فانتظرت حبتين من باب اللؤم والتمويه ثم ذهبت إليه في زنزانته.
- خير اللهم اجعله خير
احتضني وانا لا اطيق حتي مجرد تنفسه وقال:
- خلاص يا بو النجوم حنتقابل بره ان شاء الله
حسيت ان الارض بتلف بيا فاصطنعت الفرحة وقلت:
-  خير يا حبي طمني يا هيشو.
قال لي وهو يضحك ضحكة شيطانية:
- راجية امبارح قابلت مدام جيهان وجابت لي احلي خبر واحلي بشارة.
قلت له:
- ومستني إيه طمني يا هاشم
قال لي:
- رسالة من الرئيس شخصياً بيقول فيها طمنوا هشام وقولو له بابا انور بيقول لك الحكم لم يصدق عليه من رئيس الجمهورية وانه حينزل الحكم للسجن المؤبد وبعد سنة ولا اتنين حتخرج افراج صحي.