يُتم العمر (شعر)

                          يُتم العمر

كان قاعد ع القهوة لوحده
ومركز جدا وبيحسب
كام ضحكة يعيشها 
ليتم العمر
كان شايل م الحسبة 
القهوة وسجايره 
وآخر حاجة هيكتبها 
مفضلش كتير
يمكن لو كان وفر علبة
كان زاد ف العمر دقيقة كمان
يشبه لقصيدة كتبها زمان
أو يمكن حتى مكتبهاش
هل عدى العمر حقيقي بلاش 
ولا احنا اللي مبقناش بنشوف
بنداري جروح 
ونوزع ضحكة على الحاضرين
على مين ولمين هتوزع روحك 
من مين هيجيك السهم الجاي
أنفاس الناي تشبه كتير لانفاسك
الشتاء ونّاس 
الليلة مكنش وناسك
أصحابك طوب 
رصيتهم سد 
وبصوت فيروز
انكتب العهد
لما الشتاء يدق البيبان
ينطلق السهم
ينهار السد
تسكت فيروز 
فيموت الناي
مشتاق للموت

أكيد طبعا
لكن عمرك ما هتقبلو غير فعيون صحابك

 وانت بتفارق
وجودك كان أكيد فارق معاهم يوم
أكيد في واحدة هتدمع عليك بالليل
هترفض ضم طفلتها 
عشان الحضن مش منك
في كاس فوديكا هيبكي عليك وعلى سرك
ونومك انت وصحابك على الناصية

 ف طلعت حرب
على الحرب اللي بين نفسك وبين نفسك
ومهما كنت راح تكسب 
تطب الكفتين خسران
رهان روحك على روحك أكيد ظالم