نجم يد الزمالك يعلن إعتزاله برسالة مؤثرة
أعلن عمر الوكيل "بكار" نجم الفريق الأول لكرة اليد بنادي الزمالك ولاعب منتخب مصر اعتزاله بشكل رسمي.
ويعد بكار أحد المرشحين للإنضمام للجهاز الفني الجديد للفريق الأبيض كمساعد للمدير الفني باسم السبكي.
ونشر عمر بكار رسالة وداعية عبر حسابه الرسمي على موقع التواصل الإجتماعي "فيسبوك" جاء نصها كالتالي:
“لكل رحلة بداية… ولكل بداية، يوم بيجي ويبقى ذكرى.”
من حوالي 27 سنة، بدأت طفل ماسك كرة، كله أحلام وشغف، حلم طفل كان بيروح النادى كل يوم من الصبح و يرجع بليل عشان بيحب الهاندبول.
ومكنتش متخيل إن اللعبة دي هتديني عمر كامل من الذكريات، والنجاحات، والدروس، والعلاقات اللي هتفضل معايا طول حياتي.
واضاف: طفل حلم إنه يمسك كرة ويبقى لاعب منتخب مصر، و بعد مجهود كبير و تعب ربنا كرمه وحقق حاجات عمره ما كان يتخيل و هو طفل انه يعملها ، لو حد قال للطفل ده وقتها إن كل ده هيحصل، غالباً مكانش هيصدق.
وواصل بكار: كبر الحلم و كان ليا الشرف إني أمثل منتخب و اكون جزء من جيل من اعظم اجيال منتخب مصر .. تعبنا و حلمنا و ضحينا سنين عشان نحاول نحقق احلامنا .
بس بعد كل السنين دىي ادركت حاجه مفهمتهاش غير دلوقتى، أن البطولات جميلة والميداليات غالية والإنجازات تُكتب في التاريخ لكن أعظم حاجه الرياضيه بتديها هى الناس.
الاخوات اللى فعلا عشت معاهم سنين من اجمل سنين عمرى ، وكل واحد فيكم كان سبب إني أبقى أفضل. كنت محظوظ إني لعبت معاكم، واتعلمت منكم.
شكرا لكل انسان شاركني الملعب، أو معسكر، أو رحلة سفر، لكل منافس خلانى أقاتل عشان اكون احسن، لكل مدرب، وكل إداري، وكل دكتور، وكل عامل، وكل شخص كان جزء من رحلتي.
وشكراً لكل الجماهير ولكل حد شجعنى، فرح لفرحي، وزعل لزعلي، وجودكم كان دايماً حافز إني أقدم أفضل ما عندي.
واليوم بعد رحلة 27 سنة، جه وقت أقفل أجمل فصل في حياتي الرياضية.
مش لأن الشغف انتهى، لكن لأن لكل رحلة توقيتها، ولكل بطل لحظة يعرف فيها إن الوقت جه يبدأ تحدي جديد.
وأتم: أنا مش بودع الذكريات، أنا باخدها معايا، لأنها صنعت الشخص اللي أنا عليه النهارده، والمرحلة الجاية بداية جديدة، بحماس جديد، وأحلام جديدة.
أتمنى بس إن اسمي يكون ساب أثر طيب، وإن أي حد لعبت معاه أو قابلته يفتكرني بالخير.
فخور بكل حاجه عشتها وإلى لقاءٍ جديد خارج الملعب، لكن بنفس الشغف.
تابعوا آخر أخبار بوابة الوفد الإلكترونية عبر نبض