الروبوتات الغامضة وألالغام الإيرانية

لك ان تتخيل حجم المشكلة الان من وراء غلق مضيق هرمز واننا بنسمع عن سفينة بريطانية بتتحرك من جبل طارق وتوقيت تحركها في منتهى السرية ولم يعلن حتى الآن ولم يتم الإعلان عن إعداد الطاقم الذي سيبحر على متن تلك السفينة، لذلك لازم نفهم إن مضيق هرمز ده هو عبارة عن الحنفية اللي بتغذي العالم كله، وهو ممر مائي ضيق ومحصور بين إيران وبين السعودية والإمارات، بس الممر الصغير ده هو اللي بيعدي منه يومياً من 20 الي 30% من نفط الكوكب، يعني ببساطة لو الممر ده حصل فيه قلق أو اتقفل انسى استقرار الأسعار والبنزين هيغلى في كل حتة والاقتصاد العالمي كله هيترنح، والأزمة الحقيقية دلوقتي إن إيران بدأت تزرع ألغام أو قنابل تحت المية في المضيق ده عشان تمنع السفن من المرور، وده طبعاً كارت ضغط بتستخدمه بسبب حالة التوتر الكبيرة اللي بينها وبين أمريكا وإسرائيل، والنتيجة إن السفن التجارية بدأت تخاف وتوقف حركتها والدنيا بقت في خطر حقيقي، وهنا بقى بييجي دور بريطانيا اللي مش عايزة تدخل في حرب مباشرة ولا تدور على صدام عسكري، فهي كل هدفها إنها تنضف الممر ده من الألغام في أسرع وقت عشان ترجع حركة السفن لطبيعتها، وعشان كدة بتلعب دور المنسق وشغالة مع حوالي 30 أو 40 دولة تانية زي أمريكا وفرنسا وغيرهم كأنهم فريق كورة واحد، كل هدفهم إنهم يأمنوا المجرى الملاحي ده ويرجعوا الحياة لمجاريها من غير ما الأمور تنفجر أكتر من كدة. 
القصة وما فيها إننا قدام تحول مرعب في شكل الحروب البحرية، بطلته سفينة بريطانية اسمها "RFA Lyme Bay"، السفينة دي مش مجرد قطعة حديد ماشية في البحر، دي وحش طوله 180 متر، يعني بتتكلم في مساحة ضخمة جداً بتجمع بين كونها فندق عائم بيشيل 500 جندي ومستشفى ميداني متكامل فيه غرف عمليات وأشعة، يعني قاعدة عسكرية مجهزة لكل الظروف، بس اللي يهمنا بجد هو الدور اللي هتلعبه الفترة الجاية، لأنها ببساطة تتحول الي ما يسمى بماما الروبوتات أو السفينة الأم، الفكرة هنا إن بريطانيا قررت تنهي عصر الغواصين اللي بينزلوا يدوروا على الألغام ويخاطروا بحياتهم، وبدلتهم بروبوتات وطيارات مسيرة تحت المية  زي SeaCat و Remus، الحاجات دي بتنزل تمسح قاع البحر وتكشف الألغام وتفجرها والسفينة بتتحكم في كل ده من بعيد ومن غير ما بشري واحد يلمس المية، والوضع دلوقتي إن السفينة دي مرابطة في جبل طارق جنوب إسبانيا بيتعملها Update أخير وبيتركب عليها أنظمة الروبوتات دي، والوزير جون هيلي باعتباره وزير الدفاع البريطاني فعلاً أعطى الأمر بالتحرك، ورغم إن مفيش تاريخ وصول محدد لمضيق هرمز عشان السرية لكن الكلام إنها مسألة أيام أو أسابيع وتكون في قلب المنطقة، واللي بيدير الليلة دي جيش صغير قوامه بين 350 الي 500 جندي بريطاني ومعاهم فريق تخطيط في أمريكا شغالين في صمت تام لدرجة إن مفيش اسم قائد واحد معلن ولا أرقام وحدات عشان التعتيم الأمني يفضل في أعلى مستوياته، إحنا حرفياً بنشوف مستقبل تأمين الممرات المائية وهو بيتحول لفيلم خيال علمي واقعي على الأرض.

والموضوع مش مجرد سفينة ماشية وخلاص ده فيه تربيط دولي كبير بيحصل في الكواليس والمنظم للموضوع ده هو رئيس الوزراء البريطاني كير ستارمر اللي بيجمع حالياً حوالي 40 دولة في اجتماعات مكثفة في لندن عشان يرسموا خطة مشتركة للتحرك والرسالة اللي بيحاولوا يصدروها للعالم طول الوقت هي إننا دفاعيين وبس، بمعنى إن هدفهم تأمين نفسهم ومش ناويين يبدأوا بالهجوم على إيران وفي نفس الوقت البنتاغون في أمريكا بيأكد إن كل التجهيزات والترتيبات دي محتاجة كام أسبوع كمان عشان كل حاجة تكون جاهزة بالملي والهدف النهائي والوحيد من كل الزحمة دي هو إنهم يفتحوا الطريق للسفن التجارية اللي شايلة بضائع للعالم كله عشان تمشي في أمان ومن غير ما حد يتعرض لها يعني نقدر نقول إنهم بيجهزوا درع تكنولوجي ضخم في البحر عشان يضمنوا إن حركة التجارة العالمية ما تقفش تحت أي ظرف.

ولما نيجي للجانب الإيراني طبعاً مش قاعدة تتفرج، ورد فعلهم فيه كمية غضب مش طبيعية ورافضين اللي بيحصل ده تماماً، لأن هما شايفين إن وجود السفن دي وتدخل بريطانيا هو اعتداء صريح على سيادتهم وأرضهم، لدرجة إنهم وجهوا رسالة مباشرة وواضحة لبريطانيا مضمونها إنكم لو ساعدتوا أمريكا في التحركات دي فأنتم كدة بقيتوا شركاء رسميين في الحرب ضدنا، وحتى وزير خارجيتهم عباس عراقجي اتكلم مع وزيرة خارجية بريطانيا بلهجة حادة جداً وحذرهم من استخدام قواعدهم العسكرية في العمليات دي، والموضوع ما وقفش عند مجرد التهديد بالكلام، لا دول حاطين شروط تعجيزية عشان يفتحوا المضيق، وبيقولوا إن الممر ده مش هيتفتح إلا لما إيران تاخد تعويضات مالية ضخمة عن اللي سموه أضرار الحرب، ورئيس البرلمان عندهم طلع صرح بكل ثقة إن السفن اللي هتوافق على شروط إيران بس هي اللي هيكون ليها حق المرور، وده كله يخليك تفهم ليه هما متمسكين بالمضيق ده أوي، لأنهم باختصار بيعتبروه سلاحهم النووي السياسي اللي يقدروا يلووا بيه ذراع العالم كله ويضغطوا على أي حد وقت ما يحبوا.

وعلى كدة إحنا دلوقتي بقينا قدام مباراة شطرنج حقيقية في قلب المياة وفيها طرف بيراهن على ذكاء الروبوتات وسفينة اللايم باي المتطورة بكل إمكانياتها اللي حكينا عنها عشان يفرض واقع جديد ويفتح الطريق غصب عن أي لغم، وطرف تاني زي إيران شايف إن المضيق ده ورقة ضغطه الوحيدة وسلاحه النووي السياسي ومش هيسيبها بالساهل حتى لو كلفه الأمر صدام مباشر وتهديد صريح لكل اللي هيشارك مع أمريكا، فالسؤال اللي بيطرح نفسه دلوقتي هل ماما الروبوتات والدرع التكنولوجي اللي بريطانيا بتبنيه مع عدد 40 دولة في لندن بالتنسيق مع البنتاغون هيقدروا فعلاً يفككوا عقدة هرمز وينضفوا الممر من غير ولا طلقة ولا العناد السياسي والشروط الإيرانية التعجيزية والمطالبة بتعويضات الحرب هيسحبوا المنطقة كلها لمواجهة الكل كان بيحاول يهرب منها؟!

وفي الحقيقة إن الأيام الجاية هي اللي هتقول لنا السلاح الأقوى في الميدان هيكون الروبوت والتكنولوجيا ولا الجغرافيا والسيطرة الإيرانية والحدود الفاصلة بين الحرب والسلام دلوقتي محبوسة في ممر مائي ضيق والعالم كله حاطط إيده على قلبه ومستني يشوف أول سفينة تجارية هتعدي بسلام فعلاً وتنهي كابوس الأسعار اللي بتهددنا ولا الألغام والسياسة هيكون ليهم رأي تاني خالص يقلب الطاولة على الجميع.