مناشدة عاجلة من تامر حسني لوزارة الصحة والأطباء ومجدي يعقوب.. التفاصيل كاملة
ناشد المطرب تامر حسني وزارة الصحة بضرورة حسم الجدل حول مدى صحة بعض الأطعمة الشهيرة مثل البيض والفراخ، خصوصًا بعد انتشار نظام “الطيبات” للدكتور ضياء العوضي بعد وفاته، وذلك خلال منشور عبر حسابه الشخصي بموقع التواصل الاجتماعي الأشهر “فيسبوك”.
قال تامر حسني: “في ظل الفتنة الغذائية اللي حاصلة في مصر وحديث كل الناس دلوقتي عن إيه المفيد لينا وإيه المضر هل ممكن أناشد وزارة الصحة المصرية وكبار الدكاترة المختصصين وأصحاب المستشفيات بردود كافية فيها شرح مفصل عن إيه الأكل المفيد لينا وإيه اللي مش مفيد، ويا ريت يكون شرحًا مفصلًا يفهمه الشخص العادي من غير أي مصطلحات طبية أجنبية؟؟؟”.
وتابع: "أولاً الخضار أمثال الخس والجرجير وورق العنب وكل الورقيات مفيدة ولا لأ، وإزاي نطمن إنها مش مرشوشة مواد تمرض الناس… ثانيًا البيض والفراخ اللي في بلدنا ناكله إزاي وإزاي نميز ونطمن إنه مش محقون وإزاي نعرفه لو محقون".
وأردف: “ثالثًا شرب المية بكثرة كما تعلمنا مفيد ولا لأ.. رابعًا الحليب مضر ولا كويس وإيه الصح اللي نشربه.. خامسًا الأدوية لازم تتاخد ولا مش لازم ولا مش أي أدوية تتاخد!!!”.
واستكمل تامر حسني: “أناشد وزارتنا المصرية تعملنا ڤيديوهات حد يطلع يكلمنا بالعامية ويرد بالتفصيل وبالأدلة العلمية على كل ده ويا ريت يساعدني صديقي المحترم الأستاذ الفاضل أيمن عباس، بما إنه صاحب أكبر المستشفيات، يا ريت يطلعلنا دكاترة من عنده مختصة يعملوا ڤيديوهات ترد على كل اللي حاصل في مجتمعنا وبناشد برضو الدكتور العظيم مجدي يعقوب يدينا من خبرته العظيمة، والدكتور الكبير حسام موافي، ويساعدونا الفترة دي كشعب ويريحونا من الجدل الفظيع ده، لأن محدش بقى عارف ياكل إيه ومياكلش إيه وثوابت كتير اتغيرت بين يوم وليلة… أرجوكوا متسيبوناش كده لا إحنا ولا ولادنا”.
واختتم منشوره قائلًا: “وارجع وأقول محتاجين حد يكلمنا بطريقة بسيطة عامية يشرح فيها بالتفصيل وبالأدلة إيه غلط وإيه صح وأنا ليه بقول محتاجين أكتر من جهة تتكلم!!؟ عشان كلنا نطابق الكلام ببعضه مع المنطق ونحكم صح.. وشكرًا”.
تابعوا آخر أخبار بوابة الوفد الإلكترونية عبر نبض