فينا اللى مكفينا!

بعد ترقب وإنتظار لإستقبال العام الجديد 2026.. وبناءً على رغبة نواب برلمان «كفر حلاوة» الأخيار.. عُقدت هذا الأسبوع جلسة استفتاحية تخللها شُرب القهوة السادة فى كوفى شوب «السعادة»!

> ولأن الجلسة شعبية لمناقشة أحوال الرعية فى ظل العيشة الهبابية فأن «زرزور» زعيم الأغبائية.. فاجئنا بالحضور «بسحنته» العبثية.. وأخبرنا بأن كل شىء فى « كفر حلاوة» عــن الأسعار على ما يرااااام.. خصوصًا علاج الغلابة على « نفحة الزاوية « تمام التماااام.. حتى أزمات السولار وأنبوبة البوتاجاز انطفئت من زمااان.. وأسعار شرائح الكهرباء تحت السيـطرة.. وكل الأمور تمام التمام فى « كفر حلاوة» بدون أى كلام !

> فجأة.. تكهرب جو جلسة برلمان «كفر حلاوة».. وطلب الوزير المخضرم «فالح المسلطح» التعقيب حتى تكون حكومته اللى جاية فى « كفر حلاوة» صوت وصورة فى التمام.. ويدرج اسمه فى التشكيل الوزارى اللى جاى وتكون أموره تمام التمام !

> ووسط احتجاجات جبهة «المستقتلين» بـــدأ الوزير «فالح» يتنحنح قائلًا: أطلب منكم يا إخوانا التريث والهدوء حتى تتضح أمامنا كل الأمور بعيدًا عن المشاكل والهموم.. علشان من الآخر حكومة بلدنا « كفر حلاوة» اللى عايزااااااه تعمله هتعمله!

> ويبدو أن النايب « زعلان على طول الخط « لم يعجبه تصفيق أعضاء برلمان» كفر حلاوة» ووقف والغيظ يمتلكه محتجًا:» ازاى يا أخوانا تصقفوا على الفاضى والملياااان.. والناس بتوع «كفر حلاوة « بيناموا ويصحوا يلاقوا أسعار الغلاء نار ومش فى التماااام!

> وطلبت النايبة «هبهبه أم نص لسان» الميكرفون علشان تقول رأيها بصراحة.. وبعد أن شربت فنجان القهوة السادة.. بدأت تقرأ الفنجان وتُخبركل الحاضرين بقرب الإطاحة بنُص أعضاء حكومة « كفر حلاوة « الكُرام !

> وبدون مقدمات.. ثار النايب الهمام.. رئيس كُتلة مجتمع الأعمال محتجًا: أزاى تتهمنا النائبة «هبهبه» بأن حكومتنا–يطول عمرها–إنها حكومة « تنضيف الجيوب وتجويع البطون.. احنا لا مؤاخذة.. معانا فلوس زى الرُز.. واللى مش عاجبه هنقوله بكل أريحية: طظ!

> فجــأة انتاب النايب «حلق حوش» حالة معفرتة ومفيش حد يقدريحوش وانتزع الميكرفون ثائرًا: «ازاى يا إخونا يقول النايب الهُمام أن الفلوس عنده زى الرز.. والحكاية مش محتاجة عد ولا فرز!

> وعندئذًا أدرك «كشكش افندى» أن الأمور بدأت تدخل فى سكة الممنوع.. فأسرع بإعلان السؤال التوقيفى: الموافق من السادة نواب «كفر حلاوة» على قفل باب المناقشة يتفضل برفع صُباع رجله الشمال.. الأغلبية تمام ومفيش بعدها أى كلام!

شَوْكَشَة الأسبوع

فى بلدنا «كفر حلاوة».. فينا اللى مكفينا.. واللى مكفينا حكومة ملهاش فينا..غير بطاقة التموين والعيش اللى مش مكفينا.. وعجبى عليك يا زمان!!