"انتي بتدلعي".. كارثة طبية وراء حجز ابنة الفنان شريف عواد بالعناية المركزة
كشفت بهية طالب زوجة الفنان شريف عواد عن تعرض ابنتهما لأزمة صحية خطيرة استدعت حجزها في العناية المركزة، بسبب الإهمال الطبي، مطالبة الجمهور بالدعاء لها بالشفاء العاجل، وذلك خلال منشور عبر حسابها الشخصي بموقع التواصل الإجتماعي الأشهر “فيسبوك”.
شروق ابنة الفنان شريف عواد تدخل العناية المركزة بسبب الإهمال الطبي
كشفت بهية طالب قصة ابنتها المأساوية بسبب الإهمال الطبي قائلة: “شروق شريف عواد ابنتى وابنة الفنان شريف عواد كانت يوم الجمعة اللى فاتت اللى هو اليوم اللى قبل افتتاح المتحف والتنقلات داخل الجيزة صعبة”.
وتابعت: “كنا كعيلة قاعدين نفكر هنتغدى إيه وفجأة لقيتها بتصرخ أنا حاسه بصداع وعينى مش شايفة بيها كل الحاجات اللى حواليه بعيدة، أبوها نزل وخدها بسرعه على أقرب مستشفى لينا ف الهرم”.
وأضافت: “قاسوا ضغطها لقوه واطى علقولها محاليل وسألوها انتى متضايقة من حاجه ؟ حد مزعلك ؟ ولما قالتلهم لأ خلصت المحاليل والوضع متحسنش قالولها روحى نامى، أبوها قلق خدها وداها طوارئ فى مستشفى ف العجوزة سألوها نفس الأسئلة ولما قالتلهم لأ قالولها انتى بتدلعى روحى نامى من غير ماحتى يقيسولها الضغط”.
وواصلت: “واحنا تقريبا صدقنا وخدناها تنام صحيت الصبح تانى يوم فى حالة أسوء الصداع مخلصش وحركتها بقت صعبة ومش مدركة للمسافات أبوها خدها وداها مستشفى ثالثة أصر يعملها رسم مخ فعملولها أشعة مقطعية على المخ واكتشفوا إن عندها نزيف في المخ وإنها مش بتدلع وحاجزينها بقالهم أسبوع فى العناية المركزة لمحاصرة النزيف”.
والدة شروق شريف عواد: الدكاترة بيتعاملوا مع الشباب فى السن ده إنهم بيتدلعوا الحمدلله مسمعناش كلامهم
وأردفت والدة شروق شريف عواد: “المحزن إن الدكاترة بيتعاملوا مع الشباب فى السن ده إنهم بيتدلعوا واحنا كأهل لو كنا فضلنا مصدقين الدكاترة وممشيناش ورا خوفنا على ولادنا الله أعلم كان هيجرى إيه أسوأ من كده”.
واختتمت بهية والدة شروق المنشور بالدعاء لإبنتها قائلة: "أنا قلقانه على بنتى أوى وهيه خايفة عليه إنى مش ماشية فى مشوار علاجى من السرطان وأنا مش شايفة أى أهمية لحياتى إلا عشان شروق ، هيه دايرة مش عارفة هتخلص إمته ربنا وحده اللى هيحلها
دعواتكم".