محمد مهران: مباخدش أي نقد على صدري وبنتقي منه اللي يفيدني ويخليني أطور نفسي
تحدث الفنان محمد مهران عن كواليس لأول مرة تخص أعماله الأخيرة، كما علق على الانتقادات التي تعرض لها مسلسل فهد البطل ضمن موسم دراما رمضان 2025 الماضي، وذلك خلال استضافته في بودكاست “وفيها إيه” على منصة "ستوري بالعربي".
محمد مهران: مسلسل فهد البطل حقق نجاح كبير وحلو، ولمست ردود الفعل في الشارع
قال محمد مهران: “مسلسل فهد البطل حقق نجاح كبير وحلو، ولمست ردود الفعل في الشارع وقت عرض المسلسل، أنا إنسان بتعامل في الشارع كتير بحب في مناطق شعبية ومنها مصر القديمة وهناك لقيت العمل متشاف بشكل كبير والناس كانت مبسوطة”.
واستكمل: “زي ما قُلت لك ما بتوقعش بس تمنيت من ربنا الدور يعمل حاجة والمسلسل ينجح والتيسير من عند ربنا”.
كما علق محمد مهران على انتقادات مسلسل فهد البطل، قائلًا: “مش دايمًا بتظهر لي الانتقادات قوي ولما بيظهر النقد سواء من شخص مشاهد أو متلقي أو من شخص ناقد ولديه وعي بقرأه سواء على دوري أو على المسلسل بشكل عام وأفلتر كل الكلام وآخد اللي يفيدني سواء حد بيتفرج كتب كومنت أو كتب بوست أو عمل فيديو أو أيا ما يكون بسمعه، لأن عملية النقد عملية مهمة جدًا”.
وأردف: “يعني فيه قسم عندنا في معهد الفنون المسرحية اسمه النقد والدراما وإحنا جزء من دراستنا في قسم التمثيل والإخراج ندرس النقد، وسواء جه بالفطرة أو عن دراسة شيء مهم قوي لازم تسمعه وتعرف تنتقي منه الحاجات اللي تفيدك مش تاخده على صدرك زي ما بنقول كده، أي رأي نقدي تقرأه لا تتعالى عليه”.
واختتم حديثه بقوله: “وأوقات كتير في اللوكيشن أحب أسأل المخرج أنت شايف حاجة؟ أو الناس اللي بتتفرج شايفين حاجة محتاجة تتعمل بس الرأي الأول للمخرج يعني لأنه صانع العمل، فالنقد ده تحب تسمعه عشان تعدل وتطور من نفسك”.