شوبير عن عقوبات الرابطة ضد الأهلي: مفيش أي خروج عن النص أمام بيراميدز
أبدى الإعلامي أحمد شوبير، حارس مرمى الأهلي ومنتخب مصر السابق، استغرابه من قرار رابطة الأندية المحترفة بتغريم النادي الأهلي مبلغ 100 ألف جنيه بسبب ما اعتبرته "سبابًا جماعيًا من الجماهير ضد الفريق المنافس"، إلى جانب توجيه لفت نظر للنادي.
وقال شوبير في تصريحاته عبر برنامجه الرئيسي على شاشة قناة الأهلي: "أنا اتفاجئت من العقوبات اللي صدرت من رابطة الأندية. القرار بيقول إن جمهور الأهلي وجه سبابًا جماعيًا ضد الفريق المنافس، وبالتالي اتفرضت غرامة 100 ألف جنيه. لكن الحقيقة أنا مشوفتش أي خروج عن النص من الجماهير خلال مباراة بيراميدز الأخيرة السبت الماضي في الدوري"
.
وأضاف: "حتى الناس اللي بيكرهوا الأهلي، واللي عادة بينتظروا أي فرصة للهجوم عليه، مفيش حد نزل فيديو واحد يثبت إن جمهور الأهلي سب أو شتم المنافس. ولو كان فيه حاجة زي دي كنا شفناها على طول. الجمهور كله شاف الماتش، ومفيش أي دليل ظهر لحد دلوقتي."
غياب الأدلة
وأكد شوبير أن اتخاذ قرارات من هذا النوع يجب أن يكون مبنيًا على أدلة واضحة وموثقة، موضحًا: "أنا بقول الكلام دا دلوقتي، وأتوقع بعد ما أتكلم، يبتدوا يطلعوا فيديوهات مفبركة أو قديمة علشان يبرروا العقوبة. لكن الحقيقة إن مفيش فيديو واحد يوثق اللي اتقال في بيان العقوبة. القرارات لازم تبقى مبنية على حقائق مش مجرد تقديرات."
هل الهتاف ضد ريبيرو خروج عن النص؟
وتوقف شوبير عند الهتاف الذي ردده بعض جماهير الأهلي ضد مدرب الأحمر الراحل، قائلًا: "الجمهور هتف (يا ريبيرو امشي)، هل دا يعتبر سباب أو خروج عن النص؟ بالعكس، دا هتاف عادي بيحصل في كل الملاعب، والجماهير في العالم كله بتنادي بخروج مدرب أو لاعب من الفريق كتعبير عن عدم رضاهم الفني وهو أمر داخلي في الفريق.
هل مجرد إن الجمهور يطالب مدرب خاص به يمشي دا يتحسب سباب جماعي؟"
وأوضح: "لو دا هو السبب اللي استندت عليه الرابطة، يبقى عندنا مشكلة في تعريف معنى السباب. الجماهير لها حق تعبر عن رأيها في الملعب، طالما الموضوع بعيد عن التجاوز أو الشتائم المباشرة."
مقارنة بالمواقف السابقة
وأشار شوبير إلى أن هناك مواقف عديدة شهدت تجاوزات صريحة من جماهير بعض الأندية، ومع ذلك لم تُطبق نفس المعايير: "إحنا عايزين معايير واضحة تطبق على الكل ، مش معقول يبقى فيه جمهور بيشتم حكم أو لاعب بلفظ صريح، والعقوبات تبقى أخف، وفي نفس الوقت الأهلي يتغرم 100 ألف جنيه على هتاف (امشي يا ريبيرو)."
رسالة إلى الرابطة
وطالب شوبير رابطة الأندية بضرورة مراجعة لوائحها وتوضيح مفهوم "السباب الجماعي"، حتى لا يكون هناك مجال للتأويل، مؤكدًا أن القرارات التي لا تستند إلى دلائل قوية قد تفتح بابًا للجدل والاتهامات بعدم المساواة.
وختم شوبير حديثه قائلًا: "الأهلي نادي كبير، وجماهيره عندها وعي، ومش من مصلحتها تخسر فريقها بسباب أو تجاوز. العقوبات لازم تكون عادلة وبالأدلة، مش مجرد انطباعات. لو عندكم فيديو أو دليل قدموه، غير كده يبقى الموضوع محتاج إعادة نظر."