متحدث الزمالك يهاجم شوبير بعد اتهامه بمفاوضة أحمد عبدالقادر

شن أحمد سالم، المتحدث الرسمي باسم نادي الزمالك، هجومًا حادًا على الإعلامي أحمد شوبير، منتقدًا الزج باسم الزمالك في كل الأزمات الخاصة بالنادي الأهلي، بحسب تصريحاته عبر قناة الشمس.

وقال سالم: "كابتن شوبير بيتكلم كل يوم في برنامجه، وبيننا كل احترام، والاختلاف في الرأي لا يفسد للود قضية، لكن فوجئت به يتحدث عن أحمد عبدالقادر، ويشير إلى تفاوضه مع مسئول من الزمالك، رغم أن النادي لا علاقة له بالأمر".

وأضاف: "مش فاهم ليه الزمالك دايمًا لازم يدخل في جملة مفيدة؟ حضرتك عندك مشاكل في الأهلي، ما تتكلم عنها بدل ما تحشر الزمالك في كل حاجة! هو غياب أخبار الزمالك عامل قلق؟ ولا القفلة اللي عاملها الزمالك مضايقاكوا؟".

سالم استشهد بتصريحات معتز إينو، قائلًا: "إينو قال إنه قبض فلوس من رئيس الأهلي وقت ما كان مرتبط بعقد، محدش علق، ولا حضرتك يا كابتن شوبير علقت، إما ترفعوا قضية على إينو، أو تعترفوا إن التفاوض وارد أثناء سريان العقود".

وتابع: "الغريب إن شوبير داخل في أزمة مع محمد عمارة بسبب تصريح عن أوضة اللبس، وبيهدد بإجراءات قانونية، وده حقه، لكن في نفس الوقت بيتكلم كل يوم عن مروان ووسام وغيرهم في الأهلي، عادي! ليه أي نقد للأهلي يبقى خيانة، وأي موضوع لازم يتقال فيه اسم الزمالك؟".

واختتم سالم تصريحاته قائلًا: "حتى في البرامج والقنوات اللي المفروض تكون محايدة، نلاقي نفس الإعلاميين اللي بيهاجموا الزمالك، بيدافعوا عن الأهلي في مواقف مشابهة، زيزو مشى من الزمالك وما التزمش، محدش اتكلم، لكن لو لاعب في الأهلي عمل كده، يتحول لموضوع للنقاش والهجوم، نفس الفعل، لكن رد الفعل بيختلف حسب اسم النادي، للأسف".