كريم فهمي: الجمهور انتظر بشغف المشاهد الرومانسية في "وتقابل حبيب"
كشف الفنان كريم فهمي عن تخوفه من خوض تجربة درامية تمتد لـ30 حلقة في مسلسل "وتقابل حبيب"، مشيرًا إلى أنه يفضّل الأعمال الأقصر زمنيًا، سواء كانت 15 أو حتى 10 حلقات فقط.
وقال خلال حواره مع الإعلامية لميس الحديدي في برنامج "كلمة أخيرة" عبر قناة ON:"أنا من محبي المسلسلات القصيرة، 15 أو حتى 10 حلقات، وكنت قلقان من تجربة الثلاثين حلقة، ".
رغم القلق، أكد كريم أنه شعر بالاطمئنان بسبب وجود صناع عمل يثق في قدراتهم، وعلى رأسهم الكاتب عمرو محمود ياسين، قائلاً:"الكاتب عمرو محمود ياسين بيعرف يلعب لعبة الـ30 حلقة صح، ده ملعبه وكنت واثق إنه هيعمل حاجة صح، وكمان وجود كوادر محترفة في العمل طمّنني".
وأضاف:"كممثل مش بس بنفذ، لازم يكون ليا رأي وبصمة، والنقاش مع المؤلف بيكون دايمًا جزء من شغلي".
تحدث كريم عن توازن المسلسل بين الجانب الاجتماعي والرومانسي، مؤكدًا أن هذا التوازن كان مصدر قلق في البداية:"الناس كانت مستنية اللقطات الرومانسية، بس هي جت بجرعات محسوبة، وده زود تشويق المشاهدين. الناس بقت بتستنى كل اللقطات الرومانسية علشان بتوحشها ، وده فرق جدًا".
أوضح كريم أن النهاية السعيدة للمسلسل لم تكن ارتجالًا أو قرارًا لحظيًا، بل تم الاتفاق عليها منذ البداية، قائلاً:"من أول يوم اتفاقنا أنا وياسمين عبد العزيز وعمرو محمود ياسين إن النهاية هتكون سعيدة، "
واختتم حديثه :"حتى لو فيه جانب من الانتقام، فده كان انتقام إلهي، مش تصفية حسابات.. وده بيدي طابع مختلف ومميز للمسلسل".
وعبّر الفنان كريم فهمي عن مخاوفه التي رافقته خلال عرض مسلسل "وتقابل حبيب"، مؤكدًا أن نجاح العمل كان تدريجيًا، وبدأ بشكل قوي منذ الحلقات الأولى، وازداد مع تصاعد الأحداث، لكن القلق لم يفارقه.
وقال: “من أول المسلسل والناس كانت متفاعلة، بس قلقي كان أكبر من أي حاجة، لأني كنت خايف من المقارنة مع مسلسل ونحب تاني ليه؟، وده بسبب إن نفس الثنائي موجود: أنا وياسمين عبد العزيز، وكمان الكاتب عمرو محمود ياسين وعدد من نفس فريق العمل”.
أوضح كريم أنه بذل مجهودًا مضاعفًا لضمان نجاح "وتقابل حبيب"، لضمان تجاوز نجاح التجربة السابقة، مضيفًا:"كنت عاوز ننجح أكتر من ونحب تاني ليه؟، عشان كده تعبت جدًا، وتعبت عمرو محمود ياسين أكتر، كنت دايمًا خايف وبدور على كل شيء في كل تفصيلة، ومكنتش بسيب حاجة تعدي من غير نقاش طويل".
وتابع بابتسامة:"أنا تعبت عمرو كتير في الشغل، ودايمًا كنا بنتخانق بسبب آراء مختلفة، بس إحنا أصحاب جدًا في الحقيقة. ونفس الشيء بيني وبين ياسمين عبد العزيز، إحنا أصدقاء، لكن في الشغل كل واحد بيفصل الصداقة عن المهنة".
عن شخصية "فارس أبو العزم"، قال كريم فهمي:"كنت شايل هم الشخصية جدًا.. عاوزها تطلع في أفضل صورة ممكنة، وده خلاني طول الوقت في حالة تركيز ومراجعة ونقاش مع عمرو وياسمين، لأن كنت نفسي .. النجاح هو إننا نقدم عمل حقيقي أفضل من اللي قبله".
اقرأ المزيد..
