ميار الببلاوي تهاجم بسمة وهبة.. أعرف السبب
هاجمت الفنانة والإعلامية ميار الببلاوي، الإعلامية بسمة وهبة، وذلك عبر صفحتها الشخصية على موقع التواصل الاجتماعي فيسبوك.
وكتبت ميار، عبر صفحتها قائلة: "كل الناس عماله تقولى غلطك طلعتى فى برنامج بسمة، طيب أقسم بالله ما كنت أعرف أانها هتكون هجومية كده اتلجمت مكنتش عارفة أرد خالص وكل اللى كان فى دماغى إنى ألغى الحلقة ليس كل منطوق مقصود، أنا مطلقتش ١١مرة، كان قصدى إن حوزى على طول بيقول عليا الطلاق".
وأضافت: "يا جماعة دا بتاع البطيخ بيحلف يمين طلاق إن البطيخة حمرا يبقى مراته طالق، الناس ماسكة على كلمة واحدة تستاهلى علشان طلعتى مع بسمة خلاص ارحمونى اعترفت بغلطتى، بس أنا صحبتى دعتنى لبرنامجها وأنا بحب بسمة ومن زمان وصورنا قبل رمضان بأسبوعين وأنا أقسم بالله عمرى ماشوفت برنامج العرافة دا قبل كده إلا هما حلقة شاكوش ومراته، وعارفة بسمة طيبة وبتحبنى.
وتابعت: “فوجئت بالكاركتر اللى كانت متقمصاه فى البرنامج، كان كل همى أحافظ على هدوئى واحترامى للمكان، وأرد على أى سؤال بصراحة علشان المصداقية انا كنت ضيفة فى برنامج متشاف مع مذيعة كبيرة على قناتين كبار ”النهار والمحور".
وأضافت: "أنا الفلوس والله اخدت مبلغ لا يذكر وكنت مصممة أرجعه وألغى الحلقة واسألوا أستاذ شريف، رئيس تحرير البرنامج، أرجوكم كفاية نقد واللى حصل فى الفيديو الناس اللى بتقول تمثيل ربنا يحسسكم بالقهر ويوجع قلب الشريفة الحرة المتقية وبها لما يتقال عليها زانية من شيخ، أنا غلطت لما قبلت أطلع مع بسمة ويشفعلى جهلى بالبرنامج وطبيعته، وغلط إنها لما قالتلى ١١مرة مفهمتهاش إنه حلف بالطلاق فوق الميه مرة يعنى أبقى مطلقة مية مرة.
واستكملت حديثها قائلة: "وبعدين محدش ليه دعوة بحياتى الشخصية جوزى وابنى وجوازى خط أحمر من هنا ورايح والناس اللى بتقولى انتى اللى اتكلمتى وقولتى وعاوزين يرجمونى، أنا كنت بأتسئل وبجاوب مش انا اللى فتحت اى كلام وكنت بحاول أتهرب من الإجابة بس بسمة كانت مستميتة على الترند من كلامى مكنتش مديانى فرصة نهائى غير اللى اتمنتج بصو انا كتبت لأنى مخنوقة من الكومنتات وفى النهاية انا طلعت فى برنامج على فضائيات محترمة على قناة كبيرةمش طلعت فى شقة مشبوهة.
وأضافت: "تعبت كفاية استحلفكم بالله متسبوش اللى عمله واللى قاله الشيخ، وتمسكوا فى غلطة انا معترفة بيها وبحكم شغلى كمذيعة بعرف أسأل كويس بس بحد معنديش ملكة الرد ومش هأقدر أوعدكم انى لو اتطلبت ضيفة فى أى برنامج هأرفض لأن دا شغلى بس حياتى الشخصية خط أحمر ودا هيكون شرطى أنا خدت كل الأدوية بس والله من النكد مقادرة أنام.
واختتمت حديثها قائلة: "وكمان بدأنا الإجراءات القانونية، سمعت انه مسح الفيديو بس خلاص سيفناه والمستشار القانونى بدأ شغله، وحسبى الله ونعم الوكيل، وبعتذر على عدم الرد على السادة الصحفيين لأن لم يعد لدى ما أقوله، والأمر ترك للقانون والقضاء المصرى، وعند الله تجتمع الخصوم.
وكانت تصدرت الفنانة والإعلامية ميار الببلاوي، تريندات محرك البحث جوجل، بعد حديثها عن عدد مرات طلاقها وزيجاتها في برنامج العرافة الذي تقدمه الإعلامية بسمة وهبة.
