نصائح ومعلومات للتعامل مع عداد الكهرباء مسبق الدفع

  أعلنت وزارة الكهرباء والطاقة المتجددة على صفحتها على الـ"فيسبوك" بعض النصائح والمعلومات للتعامل مع العداد مسبق الدفع.

١- عدم التلاعب نهائيًا فى غطاء العداد حتى لا يفصل العداد

٢- التأكد من وجود رصيد كافِ حتى لا تنقطع الكهرباء فجأة ورصيد العداد فى صفحة رقم ٢ سواء فى العداد الاسكرا أو الجلوبالترونكس .

٣- يعطى العداد إنذارات فى حالة وصول الرصيد ١٠ جنيهات لمبة الرصيد تعطى لونًا أحمر وهى أقصى لمبة على اليمين، وإنذار آخر لو الكهرباء قطعت يتم وضع الكارت فى العداد من دون شحن يعمل إلى أن تشحن.

٤- يفضل الشحن فى أول أسبوع من الشهر عند شريحة واحد والشريحة تظهر فى صفحة رقم ٧ فى العداد الجلوبالترونكس أو الاسكرا.......

٥- آخر أسبوع فى الشهر يفضل توفيرالطاقة على قدرالمستطاع لأنك بتكون على أعلى شريحة ليك

٦- الانتقال من شريحة إلى شريحة يتم خصم مبلغ من الرصيد على حسب الشريحة إللى هتوصلها

٧- عدم تشغيل العداد نهائيًا أو لا يوجد علية حمل يتم خصم ٩ جنيهات من الرصيد

٨- تأكد من ضبط الوقت والتاريخ عند شحنتك الكارت ودا مهم جدًا جدًا

٩- العداد الكارت زى العداد العادى طريقة الحساب التجارى واحد ....

١٠- لو الكارت مبيشحنش > روح اشحن من شركة الكهرباء مرة علشان يتفعل، ولو الكارت بايظ بيتغير من الشركة بـ٣٠ جنيهًا. 

١١- لو الكارت ضاع وعليه شحنة لم تفرغ بالعداد؟!
 لا داعي للقلق كل عملية شحن بتسجل في ذاكرة العداد برقمها وقيمتها ولو ضاع الكارت وعليه شحنة لم تفرغ بالعداد بيتم استخراج كارت وعند برمجته بتسجل كل بياناتك وكذلك عمليات الشحن بأرقامها وقيمتها وعند تركيب الكارت بالعداد لو ذاكرة العداد وجدت عمليه لم تفرغ بالعداد يتم استقبالها بالعداد وتنفذ فورًا..

١٢- هناك حل لو فصل العداد إنذار والكارت غير موجود بجانب العداد؟
لو حضرتك في الشغل والكارت معاك وفصل العداد إنذار ممكن اللي في البيت يقوم بإدخال بطاقة رقم قومي أو فيزا بنك في العداد فيعود التيار الكهربائي فورًا حتى عودتك بالكارت.

١٣- لو فتحت غطاء العداد سوف تدفع غرامة فتح الغطاء طبقًا للرسوم المقررة بالشركة.

١٤- لا يمكن تبديل مكانه أو تغيير الأسلاك المرتبطة به دون الرجوع لشركة الكهرباء

١٥- في حالة زيادة الأحمال عن المسموح به والمقدر بـ 80 أمبير يفصل التيار الكهربائي تلقائيًا، ولو تكرر لثلاث مرات يفصل التيار الكهربائي بالكامل، ولا بد من العودة لشركة الكهرباء لتشغيله مجددًا ...،

باستخدام الزر الضاغط يستطيع المستهلك الحصول على عدد من البيانات تظهر على الشاشة، مثل:
"الرصيد المتبقى مع التاريخ والوقت، استهلاك الشهر الحالى بالكيلو وات ساعة، أقصى حمل بالأمبير والكيلو وات، استهلاك الشهر السابق و12 شهرًا سابقًا، الاستهلاك الكلى التراكمى من وقت التركيب، التاريخ باليوم والشهر والسنة والوقت، إظهار آخر حالة عبث وتلاعب بالوقت والتاريخ، رسائل نصية من شركة الكهرباء على الشاشة مثل قبول الكارت وزيادة حمل المشترك عن التيار المبرمج للعداد".