ع الطاير
أكيد مش مناسب أبدًا فى زمن تكنولوجيا المعلومات والاتصالات والسوشيال ميديا والحاجات دى كلها نلاقى فى المدارس تعليم على شاكلة محو الأمية اللى كان بيدرسه اللمبى ويحفظ نشيد القطة المشمشية حلوة بس شقية.. ومش طبيعى أبدًا نلاقى فى مناهج تتوارثها الأجيال سواء فى مراحل ما قبل المدرسة أو فى مراحل التعليم الأساسى أو غيره لأن كل ثانية فى جديد فى الحياة ولازم أولادنا يتعلموا إزاى يتعلموا بمعنى إنه لازم يفهموا معنى الفهم ومفيش حاجة اسمها حفظ وتلقين وتسميع إما فى قدرات مهمة أولها القدرة على التعلم الذاتى والبحث عن المعلومات والتطبيقات، ولا يجب أبدًا أن يظل التعليم فى المدارس يمثل أعباء نفسية على الأولاد لأنه بعيد كل البعد عن حياتهم وعن مستوى إدراكهم، يعنى إزاى يبقى الطفل قادر على التعامل مع معطيات التكنولوجيا بكفاءة كبيرة ومتابعة أحدث التقنيات ويلاقى نفسه فى المدرسة يتلقى علومًا منفصلة عن الحياة، وإزاى نقدر نخليه يرتبط ويحب المدرسة ويلاقى فيها تنمية قدرات وتعليم شيق وجذاب ونافع.. وإزاى نغير مفهوم التعليم العالى والبحث العلمى ورسايل الماجستير والدكتوراه بحيث تمثل إضافة حقيقية وليس مجرد نقل من الكتب.
حاجات مهمة كتير جداً لازم تتغير بسرعة البرق لأن العالم كله يتحدث حاليًا بلغة تكنولوجيا المعلومات والاتصالات والحلول الرقمية والأون لاين، وكل شيء مميكن والذكاء الاصطناعى وإنترنت الأشياء القادم بقوة أيضاً ويشكل خطرا داهما على الجمود والفكر التقليدى بمعنى إن الآلات سوف تكون أكثر ذكاء من الإنسان وقد لا تطيعه فى كثير من الأمور باعتبار أنه محدود الذكاء والفكر وكثير جدًا من المهن والأعمال والوظائف مهددة بالانقراض بسبب تكنولوجيا الذكاء الاصطناعى ولكن هناك عشرات الآلاف من الفرص المستقبلية لوظائف جديدة تتعلق بالذكاء الاصطناعى وبالأمن السيبرانى أمن البيانات والمعلومات وهناك فرص وظيفية غير محدودة تعتمد على الابتكار التطبيقى والإبداع والفكر والتجريب وهناك عالم لا محدود فى الألعاب الإلكترونية وأكيد سوف يكون هناك احتراف وبطولات عالمية وكأس العالم وسيكون البحث عن لاعب متميز للاحتراف وسوف يكون أكثر شهرة وثراء من مو صلاح وكرستيانو رونالدو وميسى.. لازم نفهم إن الدنيا اتغيرت خالص وجه عاليها واطيها يبقى إنت لو ناوى تستمر فى دراسة الحاجات القديمة التقليدية والتخصصات العتيقة باعتبار اللى نعرفه أحسن تبقى كده مغيب وعايش فى الوهم.. ولازم تصحصح وتصحح مفاهيمك ولازم أولادك يلحقوا اللى إنت ملحقتوش.