ابن الصبح.. ديوان جديد لميسرة صلاح الدين

صدر حديثا للشاعر والكاتب والمترجم ميسرة صلاح الدين، ديوان " ابن الصبح "، عن الهيئة المصرية العامة للكتاب.
ويعد الديوان هو  السادس للشاعر  بعد فترة من التوقف عن نشر الشعر لصالح الترجمات والمسرح.
ويحفل الديوان باستخدام الأساطير والشخصيات الشعبية والتراثية وتركيبها مع مفردات العصر للتعبير عن قضايا حديثة عن المدينة وأزمة الاغتراب.
وللشاعر خمسة دواوين سابقة، هي:
انا قلبي مش فارس، شباك خجل، ارقام سرية، الأسد الحلو
حرب الردة.
وننشر إحدى قصائد ديوان "ابن الصبح"، بعنوان "الخل الوفي":

لو لقيت الغول
ح اوقفه
فى مدخل العمارة
مكان السكيوريتى 
وألبسه بدله زرقا
وكاسكتة بشريط دهبى
يمكن يقدر يلم فلوس الصيانة
ويحافظ على نظافة المدخل
ويروض فواتير  الكهرباء 
ونزوات الجيران المستمرة
وقدسية ميعاد اتوبيس المدرسة
والسر الأزلى فى تأخير السباك
عن المواعيد اللى بيحددها بنفسه .

لو لقيت العنقاء
ح اربطها فى الجراﭺ
مكان العربية
يمكن  تنقلنى من عمر لعمر
ومن إحساس لإحساس
ومن جحيم اسئلة ملهاش اجابات
لجحيم أجابات  لونها
اغمق م التساؤل
لو لقيت الخل الوفى
مش عارف
أعمل بيه إيه ؟
اكتر حاجة
عملتها
فى حياتى
بمحبة واقتناع
هى الوحدة  والغياب