رئيس العمليات بأسمنت النهضة بقنا فى حواره للوفد: نصدر للسودان ونستهدف أسواق إفريقية جديدة

النهضة بقنا تصدر الاسمنت للسودان وتستهدف اسواق افريقية جديدة

ـ الشركة تستحوذ على 43 % من السوق القنائى

ـ نشارك بمنتجاتنا بكافة المشروعات القومية على مستوى الجمهورية

ـ ملتزمين بسداد كافة الديون المستحقة ونفذنا هذا الكلام على ارض الواقع

ـ نستعد لتوقيع بروتوكول لمد مشروعات مبادرة حياة كريمة بكل ما تحتاجه

ـ ألغينا التعاملات الورقية بالشركة بنسبة 90% 

ـ تحديد نسبة الإنتاج لمصانع الاسمنت من قبل حماية المستهلك كان  قرار حكيم

ـ نسعى لتصحيح المسار بداخل الشركة بكل قوة

ـ زيادة خطوط الإنتاج خطوة مستقبلية نطمح فيها  

ـ بدءنا فى إنتاج الكلينكر منذ أيام بعد إنهاء إجراءات رخصة وقود التشغيل

 

تعد شركة النهضة للصناعات الكيماوية واحدة من القلاع الصناعية الهامة العاملة على ارض محافظة قنا ومن منطلق حرص الوفد على متابعة تلك المشروعات الصناعية الوطنية ومدى كفاءتها كان للوفد هذا اللقاء مع المهندس إيهاب دويدار رئيس قطاع العمليات بمصنع النهضة بقنا.

 

فى البداية عرفني أكثر عن شركة مصنع أسمنت النهضة بقنا ؟

هي شركة مساهمة مصرية ينقسم المساهمين بها ما بين الشركة القابضة للصناعات الكيماوية بنسبة 50 %   وباقي النسبة موزعة بين شركة المقاولين العرب وصندوق تأمين المقاولين العرب، دول هم الملاك، وهى شركة مساهمة مغلقة لا تخضع لقانون 203 قطاع أعمال،  ولكن تخضع لقانون الاستثمار، ولذلك أحنا بالنسبة لنا كمنشئة  صناعية  تخضع لرقابة الصناعية  لهيئة التنمية الصناعية  فشركات قطاع الأعمال لا تخضع لقانون التنمية الصناعية ولا لرقابة الصناعية.

 

 

 الشركة بدأت إنتاجها فى شهر يناير من عام 2012 تقريباَ من 10 سنوات، العقد الخاص بالشركة هو الصادر له رخصة صناعية، تقدر بمليون و500 ألف طن فى السنة،  ووصلنا لمليون و900 ألف طن، ونجح المصنع فى إنتاج أكثر من طاقته الإنتاجية  فى سنة من السنين، المصنع أنتج وباع ما يقارب من 2 مليون طن، وأنتجنا ما يقرب من 6000 طن  فى اليوم  كلين كر، وتصل لـ 6500  من الاسمنت بأنواعه مختلفة كالاسمنت المقاوم للكبريتات، والاسمنت البورتلندى العادي واسمنت التشطيبات أو ما يعرف بالهضبة  واسمنت الصخرة  واسمنت السويتر المعد للأعمال التى تتم فى المياه التى يوجد فيها كبريتات عالية  ومشاريع الصرف الصحي  أو الكباري أو ما شابه ذلك.

 

إنتاج الشركة فى عام 2021  ومقارنته بالأعوام الماضية؟

 أولا إنتاج الشركة خلال عام 2021 بلغ مليون و500 ألف طن،  وده إلى تم إنتاجه وبيعه بالفعل فى السوق المصري وده إلى قفلنا بيه  خلال هذا العام،  رقم بفضل الله كويس جداً خصوصاً فى تلك الظروف الموجودة فى السوق،  يعنى حساب الاسمنت بالذات له آلية سوق معينة آلية السوق دى  تعتمد على  معدلات النمو فى الطلب، وكذا القوانين المنظمة لموضوع البناء سوق الأسمنت عامتاً يعتمد على حاجات كثيرة  كورونا مثلاً، الموضوع بيتاثر  بحركة المعمار ايضاً، والسوق  المصري يوجد فيه زيادة  فى الاستهلاك عن  الطلب، كميات التصدير  إلى بتطلع من مصر للخارج  ليس بنفس حجم  الزيادة الموجودة  فى الإنتاج  عشان ظبط العرض مع الطلب جهاز حماية المستهلك  حدد كميات للبيع، الكميات دى بتفى لغرضين الغرض الأول أنها تحافظ على الصناعة من الخسائر، وتضبط عملية العرض مع الطلب، لا العرض يقل عن الطلب، ولا الطلب يزيد عن العرض  والعكس، ولا العرض يزيد فالسعر ينزل، لا والعرض يقل فالطلب يزيد فالأسعار ترتفع.

 

 

  وانا شايفه انه كان  قرار حكيم، وحسب  لكل شركة حصتها على حسب إنتاجها اى كل شركة على حسب طاقتها الإنتاجية وسنة التشغيل وعمر المصنع وخطوط الإنتاج، وهى تقدر في حوالي 70% من الطاقة الإنتاجية لاى مصنع اسمنت، هذه الشروط لتوزيع فى السوق المحلى، أما بخصوص السوق الخارجي فالأمر مفتوح" براحتك مفيش اى شروط" بالعكس هناك تشجيع  من الدولة لزيادة نسبة التصدير وعايز تصدر كلين كر  إلى هي المادة القبل النهائية صدر، تلك الإجراءات خلقت نوع من  التوازن بين العرض والطلب، وأعطت سماحة لشركات أنها تقدر تقاوم فى السوق وتشتغل ، وبالفعل تم بيع كل ما تم إنتاجه خلال العام الماضي . 

 

وبالفعل التزمنا بالكمية المحددة لإنتاجها  فضلاً عن كمية لتصدير والى لا تزيد على اى حال من الأحوال عن  نسبة الـ 10 %  فى كافة شركات الاسمنت، لان هناك منافسين كتير فى سوق الاسمنت العالمي  ومنافسين  عندهم طاقات إنتاجية هائلة  زى الصين هناك دول بتدعم الطاقة زى إيران والسعودية  عندهم  زيادات، هناك منافسة قوية، وبالرغم من  ظروفنا، إلا إننا أفضل منهم  فى الجودة، وطبيعي إننا نكون أفضل جودة إننا نكون أعلى منهم فى السعر، يعنى بالمقارنة  والمعادلة من الطرفين  الجودة مع السعر  فطبيعي أو ما تشترى حاجة الجودة ابتعتها رقم 1   بتدفع فيها اكتر من الحاجة الى هي الجودة ابتعتها  درجة تانية  الشركة هنا   ليها ظروف خاصة، تلك الظروف أدت إلى أن الشركة تظل لمدة سنتين   و5 شهور  بالضبط نتاج الأعمال بها قبل الحالية مجلس الإدارة أتغير والعضو المنتدب أتغير  ورئيس قطاع الأعمال أتغير، الفترة إلى قبلنا كانت الشركة بتحقق خسائر مش عايزين نخوض  بأسبابها لان أسبابها كتير بس إحنا نركز على النتائج .

 

السياسات التى اتبعتها الإدارة الجديدة فى إدارة الشركة؟

غيرنا نظام الدورة المستندية التى كانت موجودة فى الشركة، و كانت نظام قطاع عام  "نسخة بالكربون من القطاع العام" "يعنى لجان التسعير لجان  البيع لجان لشراء"  كل هذا الكلام كان  يبطئ من سرعة تنفيذ الأعمال، هو بيضمن الشفافية اه،  لكن يبطئ التنفيذ  فإحنا  جبنا نظام معمول بيه من 20 سنة وهو نظام SAB  وده بيتيح لك انك تعمل كل النشاط على السيستم الموجود على جهاز الحاسوب  بتاعك، "عايز تشترى قزازة ميه   أتحطها على السيستم   كل واحد ليه اختصاص هتروح له وتظهرله على الكمبيوتر الخاص بيه هيعمل عليها aprof، هيوافق هتروح  لقسم المشتريات هينفذ   بالمواصفة المطلوبة، الكلام ده بدء تطبيقه من  شهر ديسمبر الماضي وطبقتاه  وكان متعاقد عليه من 4 سنوات مضت، ( SAB ) النظام ده معروف عالمياً  انه هو بيظبط منظومة  الأداء  تبقى كلها كمبيوترز على السيستم ده منظومة الحوكمة.

 

 

 ونجحنا من خلاله فى القضاء على التعامل الورقي فى كافة المعاملات سواء مع الهيكل الادارى أو تعاملنا الخارجي مع العملاء إلغاء التعاملات الورقية بنسبة 90%  يعنى مفيش اى تدخل غير انك بتدخل معلومات وبيانات فقط،  العملية من المحجر والتعبئة لحد الميزان كله نفس الموضوع، شراء قطع الغيار والزيوت  وكافة شي بنفس الشكل وهذا النظام معمول به  ومطبق فى شركات انترناشونال من سنة 2000، ولكن لم يكن مطبق هنا،  فدا يلغى الدورة المستندية الطويلة دى،  حوكمة الموضوع "وان كل واحد ليه  سلطة توقيع لحد  حد معين تروح بعد كدا لحد من المشتريات  والى ملوش السلطة دى تروح للى فوق منه وامتى هتشوف الكلام  ده وطلع تقارير عليه وتقيس عليه" حاجة بنسميها معدلات الأداء  بتاعت  البيزنس بتاعك ككل، فى إدارة معينة فى قسم معين  فى المصنع بالكامل  فى الشركة بالكامل  تشوف الأداء المالي بتاعك شكله إيه،  والأداء بتاع الموارد البشرية عامل ازاى،  إلى بيطلع وإيه إلى بينزل عندك، بقى وتحلل النتائج دى،  وتعمل عليها  خطط تشوف النقط الى محتاجه تحسين فان،  ونت طول مانت شغال ورقى كدا هتغرق فى كوم الورق ده ومش هتعرف  تشوف انت  معدلات الأداء بتاعك شكلها ايه.

 

لما الكلام ده يبقى طلعلك  بمنحنيات ورسومات بيانية   تبقى شايف كل حاجة رايحه فان وجايه منان، ونقط الضعف بتاعتك الى عايز  تقويها  ومناطق الكويسة  وتحسن اكتر فيها  وده افنت مكنش شغال قبل كده، نفس الموضوع فى التشغيل انا كنت فى بعض الطرق نتيجة للخبرات المتراكمة  إلى تقدر بيها تقلل تكلفة المنتج   وتحافظ بردو على أعلى  معدلات الجودة  ده فى قطاع العمليات والتشغيل والصيانة، فى بردو بعض المعدلات العالمية لان انا عشان أوفر استيراد لقطع الغيار بستخدم مواد خام معينه بطريقة معينة بتوفرلى فى الوقود وبتقلل التكلفة عليا بعشرات الألف فى اليوم وتعملك ملايين فى السنة، وده بينعكس على سعر البيع بتاعك فى السوق وعلى قدرتك على المنافسة  لما أنا أبقى عطيلك تكلفة، اقل تقدر أنت تنزل بالسعر شويه تنافس غيرك اكتر وتبيع كميات أعلى سوء  فى المحلى أو فى التصدير، والماركة بتاعتى أعلى الرتبة ابتعتها بخللها تطبيقات أعلى دلوقتى، أنواع اكتر من الاسمنت عشان تلبى  متطلبات العميل فى كل الأجواء بفتح أسواق جديدة فى المحافظات إلى حولينا، وأيضا المحافظات البعيدة  بلبي احتياجاتها.

 

 

 ايضاً المشاريع الكبرى التى تقوم بها الدولة والمشروعات القومية والوطنية  كمشروعات حياة كريمة ومشروعات المحاور، الشركة بدورها تقوم بتوفير كافة متطلبات العملاء ومواصفاتهم فى مثل هذه المشروعات بننتجه، المحاور كلها بتاعت قنا الجديدة، دى كلها إحنا  إلى مساهمين فيها بالاسمنت بتاعنا،  حياة كريمة نفس الكلام،  مدينة الروبيكى  مدينة الجلود بردو،  مستوفين متطلباتهم  وبنبعتلهم اسمنت  فبيديلك مرونة، فهي كلها  سلسلة متشابكة  أنت  قدرت تعمل منتج كويس وبسعر كويس،  هتقدر تنافس فى السوق  كويس وتبيع وتصدر،  دى المنظومة إلى تم خلقها هنا بردو  كان هناك صعوبات لا تتخيلها  فى أول ما الإدارة الجديدة جت كانت رخصة الفحم موقوفة وده الوقود بتاعنا  وذلك لعدم استيفاء اشتراطات جهاز شئون البيئة .

 

 ما الذى يمنع المصنع من التشغيل بالغاز الطبيعي ؟

إحنا  نتمنى، وعندنا عقد موقع من 2012  مع شركة الغاز دفعنا خلاله لشركة الغاز تبرع بقيمة 10 مليون جنية، عشان يعدى الخط تحت  النيل وحصل الموضوع  ده، ولكن كان فى هذا الوقت ده، فى فترة ما بعد الثورة 2011 وحصل فى الوقت ده انفلات وكلنا عارفين إيه إلى حصل فى الوقت ده، وكان خط الغاز اساساً كل شويه يحصل فيه عمليات إرهابية ويتعرض لتخريب  وشركات البترول نفسها  الأجنبية كان ليها  مستحقات كتير على مصر  فوقفت شغل ومشيت ومجتش غير فى 2014 لما جاء الرئيس السيسى  والحكومة الجديدة، وبدء يعيدوا تلك الشركات لمصر من جديد وأعطاهم جزء من مستحقاتهم  بداو يشتغلوا تانى، فى الوقت ده مصر كانت ليها توجهاتها أنها تقوم بتوفير احتياجات البيوت واحتياجات  التصدير والكلام ده كله  لان دى عقود طويلة الأجل  فى الوقت ده مكنش فيه غاز فائض للمصانع عشان تاخده، العقد ده وقف تنفيذه  لان انا حتى لو نفذته حتى  أتكلف بـ 125 مليون، جنيه ثمن توصيل الغاز لحد المصنع،  ومفيش تصريح من الحكومة أنى اشتغل غاز،  إحنا  عارفين الظروف وإيه الأولويات بتاعت الدولة، ولكن الوضع تغير بالتأكيد بعد اكتشاف حقل ظهر  وحصلت انفراجة،  وحتى الحكومة زودت من توصيل الغاز للمنازل  ومن حصص التصدير  وفى 2019 حققنا اكتفاء ذاتي  من الغاز بعدما كنا بنستورد الغاز، وحنا بنسعى خلال تلك الفترة لتفعيل العقد مرة أخرى، خصوصاً أن الدراسات مستوفاة وتم تحديد المسار كل شي تم الانتهاء منه،  مصانع الاسمنت فى 2014 2015 كانت عندها مشكله فى الوقود، فالمصانع كلها قدمت طلبات للعمل بالفحم، جهاز شئون البيئة قامت بعمل اشتراطات حينها للاستيراد واشتراطات لنقل  واشتراطات لتشغيل كان من ضمن هذه الاشتراطات حاجه اسمها " الارجى اف"  لمرفوضات القمامة، الحاجات إلى ليها قيمة حرارية فى القمامة كأكياس البلاستك، وهناك مشكلة تحديداً بقنا كانت تواجهنا وهى أن كميات القمامة اليومية بقنا كمية غير كبيرة  لنعتمد عليها فى التشغيل فناتج المرفوضات اليومي قليل،  بالإضافة إلى أن موضوع التجميع ليس المسؤل عنه شركة واحدة  بجمع وفيه مقالب معتمده  وكلام زى كدا، لهذه الأسباب الإدارة اتجهت للاعتماد على الطفلة الزيتية وحتى ألان ليس هناك مكان معتمد أو مصرح له بيع الطفلة الزيتية.

 

أهم الأسواق الحالية والمستقبلية لشركة اسمنت النهضة ؟

السوق المحلى جمهورية مصر العربية بأكملها، ولكن إحنا مركزين فى الأربع محافظات إلى حوالينا زى سوهاج  وقنا و أسوان والبحر الأحمر، واكتر تركيز لينا فى قنا، بنودي القاهرة وبنشارك فى المشروعات القومية، أسواق التصدير الخارجية فى الوقت الحالي السودان، والأسواق التصديرية المستقبلية كل دول الساحل الافريقى، عندنا هنا أتنين ميناء، ميناء أبو طرطور وميناء سفاجا  فنقدر نصدر منهم عن طريق البحر الأحمر وبعض الدول الإفريقية، وايضاً بنطمح لأبعد من إفريقيا لان تلك الصناعة بتندثر فى أوروبا فى الوقت الحالي، وحنا بنطمع  إننا نحصل على "سى إي مارتكن" الخاص بالاتحاد الاوروبى، لنتمكن من تصدير منتجاتنا لدول الاتحاد  ونبدأ نصدر لأوربا  خصوصا التاوزونات إلى بتحدث والى هي بتفيد ناس على حساب ناس، فى مصر هنا تصدير الغاز المسال زاد جداً  بسبب الخلافات الموجودة  بين روسيا والاتحاد الاوروبى، فبدأت دول الاتحاد الاوروبى تأخذ شحنات من الغاز المسال من مصر، وده زود التصدير عندنا  للاتحاد الاوروبى  وده بيزود  العملة الصعبة، وكخطة مستقبلية نطمح إننا نفتح أسواق ليس فى السودان فقط بل فى كل الدول الإفريقية القريبة مننا عن طريق البحر الأحمر وكل دول الساحل الشرقي وهناك اتفاقيات عديدة نجحت الدولة فى إبرامها مع دول افريقية ودول الاتحاد الاوربى سنسعى للاستفادة منها ، وبنسعى للحصول على شهادة الايزو 50001 وعشان نكون مؤهلين لدخول فى تلك الأسواق والتى نسعى للحصول عليها وإتمام اشتراطاتها فى القريب العاجل.

 

أسباب توقف إنتاج الشركة للكلينكر؟

 رخصة الفحم توقفت فأنت متقدرش تستورد فحم فخط الإنتاج توقف عشان  نستوفى الشروط قمنا بفتح صفحة جديدة  مع كل الجهات الرقابية من خلال الالتزام  بكافة الشروط والمعايير الموجودة والمعمول بها، ولم نجد احد يبيع الطفلة الزيتية  فاستخدمنا الزيت بنسبة 10 %  وتم عمل دراسة لتقييم الأثر البيئي على أعلى مستوى، وتوصلت الدراسة أن استخدامه لم يؤثر على البيئة، وتم عودة رخصة الفحم والدولة غيرت القوانين والمحاجر أصبحت غير تابعة للمحافظة، كما كان فى السابق، وجرى نقل ملكيتها لشركة المصرية لتعدين،  بادرنا حينها وكنا من أوائل الشركات إلى وقعنا عقد مع  الشركة ودي أعطتنا صلاحية استخدام المحاجر الخاصة بنا بشكل قانوني، ويتم رفع مساحي جوى كل 3 شهور يقوم برفع المساحات بكل دقه وفقاً للعقد، خلال تلك الفترة، الفترة ديه كان مخزون الكلي نكر قرب ينفذ وإحنا واقفين ورخصة الفحم مرجعتش،  اضطررنا لشراء الكلي نكر من مصنع اسمنت قنا، كان بسعر مناسب لطرفين فى وقتها بعد الصفقة دى ما تمت أسعار الفحم ارتفعت بشكل كبير وقتها اى مصنع شغل كان هيحقق خسائر على طول ودى بورصة عالمية محدش يتحكم فيها، وأسعاره تدخل فيها عوامل عديدة منها توقف عمل المناجم فترة كورونا، ومشكلة النقل بعدها وهى ما عرفت بأزمة سلاسل الإنتاج أو الإمداد، فضلاً عن مصاريف شركات التامين التى ارتفعت هي الأخرى  وغيرها  كل تلك العوامل، أدت لارتفاع أسعار الفحم بشكل يصعب معه استمرار عملية التشغيل وكان الوضع يشبه بقيادة سفينة فى مثلث برمودا، و نجحنا بفضل الله اننا نحصل على حصة مازوت من وزارة البترول، وبناءاً

على ان الغاز لم يصل الينا لظروف إلى كانت موجودة حينها، وبدءاً نشغل والحمد لله،  وطيلة تلك المدة البيع لم يتوقف واستفدنا من المخزون الموجود لدينا.

 

 

ما هو حجم الإنتاج المحدد للمصنع من قبل جهاز حماية المستهلك ؟

مليون و250 ألف طن فى العام  وتلك الشروط تنطبق على السوق المحلى، وفى التصدير الأمر غير محدد ويرجع لشطارة كل شركة فى فتح أسواق تصديرية إليها بالخارج، وإحنا وضعين فى الميزانية بتاعت هذا العام  200 ألف طن تصدير طبعاً بنكون متفائلين اذا نزلت بنقول نزلنا ليه، وإحنا بنراجع شهر بشهر للمستهدف، عشان نبقى عارفين إحنا  بايعين قد اد ايه، وهنعمل قد إيه الخطوة القادمة، المراجعة بتتم من لجنة القيادة ورئيسها العضو المنتدب  وعضوية رؤساء القطاعات ومديري الإدارات المختلفة ونقوم بمراجعة الأداء باستمرار، بتتاخد فيه القرارات التنفيذية إلى هي بتاخد طابع استراتيجي، وزى ما قلتلك ان إحنا فى سنتين و5 أشهر كان الشركة  خسرانه مبلغ كبير جداً  يقدر ب 165 مليون، وهو موجود فى الميزانيات المعلنة ، وبفضل ربنا كان الميزانية المتوافق عليها العام الماضي إن الشركة دى تخسر 124 مليون،  الظروف الى كانت موجودة بالشكل الى كان موجود وده الى كان متوقع.

 

وبفضل الله مخسرناش ولا مليم بل أغلقنا على مكسب فى عام 2021 والحمد لله فى 8 أشهر عمل ألغينا كل تلك الخسائر،  ودفعنا كل مستحقات الموردين  المتأخرة، وسددنا الضرائب المعلقة علينا إلى كان عليها نزاعات، تم تسويتها مفيش اى مقاول أو مورد أو جهة حكومية لها عندنا جنية واحد، رخص التشغيل مجددة، السجل الصناعي، مظبوط السجل البيئي مظبوط وتم تجديده، القياسات بتتعمل فى موعدها الاشتراطات بتاعت البيئة اتنفذت، عملنا تقرير استشاري بالى إحنا هنعمله فى موضوع المرفوضات والحماية المدنية ولجنة الأمن الصناعي وافقت علية، وهنعدل اشتراطات الحماية المدنية ومدخلينها فى الموازنة الجديدة،  وإحنا عايزين مبلغ معين لتعديل كل السيستم الخاص بنظام التعامل مع الحرائق، التدريب الخاص بالأمن الصناعي بيتم، اللجنة الخاصة بالأمراض المتوطنة والأمراض المهنية تقوم بعملها وسجلت صفر إصابات ولا يوجد اى إصابات ناتجة عن العمل، ونسعى فى كل حاجة أنها تتعمل بشكل مظبوط .

 

أهم العقبات التى واجهت الشركة خلال العام الماضي؟

وقف رخصة استيراد الفحم، ودي تم التغلب عليها وتم التجديد ولكن لم نقم بالاستيراد بسبب ارتفاع أسعار الفحم، وحاليا نقوم بعمل مناقصة لاستيراده ونعمل فى الوقت الحالي بالمازوت، والعقبة التانية الموافقة ابتعتنا ليها إطار زمني، فانا عايز بعد الإطار الزمني أجيب فحم، العقبة الثالثة كانت فى ان المحجر معندهوش العقد بتاع الشركة وكان العقد مبرم مع المحافظة والى ينتهي 20/ 6/ 2021 لما القانون أتغير أصبح إبرام التعاقدات مش مع المحافظة، ولكن مع الشركة المصرية لتعدين باشتراطات وأسعار وعقود جديدة، وده كان ضمن سياسة الدولة الرامية لتعظيم  الاستفادة من الثروات المحجرية والمعدنية، بعيداً عن الفردية بتاعت المحافظات كل محافظة كان ليها توجه ونظام معين وليها اشتراطات معينه، وأنا شايف انه ده صب فى الصالح العام، لأنه بيوحد جهة التعامل،  حتى هيئة الثروة المعدنية كنت أن بدفع للمحافظة وبدفع 19 % للهيئة الثروة المعدنية من القيمة إلى بدفعها للمحافظة  بدفعها لهيئة الثروة المعدنية وده اسمها " إتاوة" فى القانون، أنا دلوقتى حتى الإتاوة مبدفعهاش لثروة المعدنية بدفعها لشركة المصرية لتعدين، وهى بتحولها  لحساب الثروة المعدنية، اما ألان فهناك جهة واحدة بتعامل معاها.

 

الرفع المساحي فى السابق كان فيه مشاكل، أنا عندي أجهزة متقدمه وهما عندهم جهاز قديم فييجى فى الرفع المساحي يحدث تضارب، أن دلوقتى معنديش تضارب لان هو نفس الجهاز الحديث إلى أنا بستخدمه، الشركة بتستخدمه ووضعاه باحدثياته فى كاميرا فى طيارة بدون طيار  وييجى بعد كدا كل 3 أشهر،  يقوم بنفس المسحة ليحدد حجم الفروقات بدون تدخل بشرى، الموضوع ده اخذ مجهودات رهيبة عشان ننهى إجراءات العقد مع الجهة الجديدة، وكان هناك ضغط غير عادى على الشركة فى ذلك الوقت، لان كل محاجر مصر تبعيتها انتقلت إليهم فى وقت واحد،  والحمد لله كنا من أوائل الناس إلى انهينا العقد معهم وحصلنا على كارت التشغيل فبنسبة لنا المشكلة دى كانت عقبة وتم حلها،  اما المشاكل الأخرى فكانت تتمثل فى تداعيات ارتفاع سعر الفحم وده إحنا قدرنا بفضل الله وتعاون   الجهات الأخرى مثل وزارة البترول، أنها تسمحلنا  بكمية اكبر من  المازوت، وده إلى خلانا قدرنا نشغل ونحاول نعدى تلك المرحلة لحد شهر مارس، والذي يشهد انخفاضاً فى أسعار الفحم نتيجة لقلة الاعتماد عليه فى أوروبا ودول شرق أسيا.

 

 وهناك جهود جبارة بتبذل، ازاى إننا نقلل التكلفة ونزود الجودة، ايضاً الماليين بيشتغلوا على ازاى يستثمروا الودائع ابتعتنا  وزاي يعملوا دورة مستنديه  مالية سريعة وسهله  وبسيطة ومتخدش وقت، وزاي يحصل كل مورد على مستحقاته والنظام ده بقى موجود دلوقتى فى الشركة ومعروف مواعيد الصرف والمستحقات لكل مودع المورد حسب العقد بتاعه، عقدك أو فاتورتك أنت، بعد ما اجبها  يتم الاستلام بالمواصفات والكميات المتفق عليها بعد ما أتورد  الفاتورة بتعتك هتاخد 30 يوم وتتحولك على حسابك، هناك مشكلة أخرى واجهتنا تتعلق بالفاتورة الالكترونية إحنا الموردين معظمهم أو 90 % منهم  لا يتعامل بالفاتورة الالكترونية وإحنا بتعليمات وزارة المالية  مش هنقدر نصرف لحد حاجة إلا إذا كان مشترك فى منظومة الفاتورة الالكترونية مفيش حاجه اسمها شيكات دلوقتى كلها تحويلات بنكية، وأنا بديلة الإشعار الخاص بعملية التحويل، واول ما بيتم التحويل بطبع الإشعار  بتاعه وقله أتفضل الفلوس بتاعتك أتحولت، كل ده كان خلال عام 2021  وخد مجهود رهيب مننا مع الموردين والعملاء  لتطبيق تلك المنظومة بنجاح.

 

انعكاس منظومة الحوكمه على الاقتصاد وقطاع الاستثمار فى مصر ؟

فى الحقيقة سهل كتير جداً فى موضوع الاستثمار وسهل من موضوع التدفقات النقدية الخارجية  مش بس فى الداخل، لو فيه استثمار مباشر هيسهل التدفقات النقدية من الخارج بالإضافة ان المركز التكنولوجي إلى أتعمل الخاص بوزارة الاستثمار أو ما يعرف بمنظومة الشباك الواحد سهل جداً إجراءات الاستثمار وإنشاء المشروعات الاقتصادية، وايضاً قضى على فكرة الاقتصاد الموازى.

 

كيف ترى سوق الاسمنت فى عام 2022؟

خليني أقول ان الموضوع مليان تحديات وأتوقع موضوع الزيادة والانخفاض فى سعر الاسمنت يحدث فى مدى ضيق جداً، ايضاً موضوع سعر الاسمنت مرتبط بالحديد لان  دول منتجين متلازمين سعر الحديد بيأثر على الطلب على الاسمنت أو سعر الاسمنت بشكل عام الحديد والاسمنت مترابطين ولكن عكس بعض، وسعر الاسمنت مرتبط بالوقود لان سعر الوقود عامل مهم فى سعر التكلفة  وعموماً هامش الربح فى الاسمنت مبقاش زى زمان، زمان كان يوصل 50 % ، رسوم استغلال المحاجر ارتفعت، أسعار الكهرباء ارتفعت ومصانع الاسمنت معروفة إنها كثيفة الاستهلاك للكهرباء، ودعني أقول ان هامش الربح أصبح فى حدود الـ 10 % .

 

تعامل الإدارة الحالية لشركة مع الديون المستحقة ؟

إحنا ملتزمين بسداد كافة الديون المستحقة ونفذنا الكلام ده على ارض الواقع، وزى ما قلت لحضرتك فى بداية الحديث، ان إحنا مع نهاية السنة الماضية مكنش فى جهة فى الدولة ليها  عندنا رسوم  أو عاملين مخالفة ضدنا ومتسددتش أو فى وضع ومحصلش تسويه قانونية  له، ولا فى مورد ليه جنية ولا فى عميل له اى مستحقات علينا،  ونقوم بتسديد مديونيات البنوك فى موعدها المحدد .

 

ظهرت خلال الأسابيع الماضية مشكلة عمال بالمصنع ما تعليقك؟

اولاً هما مش عمال المصنع دول تابعين لشركة خاصة متعاقدة مع المصنع لتشغيل والصيانة وهى الشركة العربية السويسرية "اسيك" وبيننا وبينهم، عقد تشغيل وصيانة  ينتهي فى  نهاية شهر مارس من 2022، إلى حصل ان فى ناس عقودها انتهت لان هي عقود محددة المدة، شركة اسيك حينها أبلغت الناس دول أو العاملين بها عزمها عدم تجديد العقود لهم، وأنهم استغنوا عن خدماتهم، وعددهم 38 عامل، تضامن معهم زملائهم الباقين، أنا عندي 65 عامل تابعين لشركة النهضة دول موجودين مع اسيك بتشغلهم معاهم من 10  سنين عندهم خبرة كريسة جداً هما دول إلى كانوا شغالين فترة إضراب عمال شركة اسيك والى لم يستمر سوى  7 أو 8 ساعات.

 

 وأول ما حصل إضراب الـ 38 عامل، مصنع النهضة انحاز للعمال وتضامن معهم، وقمت بتحرير مذكرة لشركة اسيك، أبلغتهم فيها ان شركة النهضة غير موافقة على الإجراء ده،  ولو ان هذا حتى إجراء داخلي إلى أن هناك التزام عقدي بيننا وبينهم والى من ضمنها إمدادنا بعماله مدربة لا تستبدل إلا بموافقة المالك إلى هو إحنا،  ورد عليا حينها مدير المشروع "انى هستبدلهملك بناس مدربة، وأبلغته ان خبرة خط الاسمنت الحالي مختلفة عن بعضها، فى محاولة منا لتمسك بالعمال ورفضنا استبدالهم، وأصدرت تعليمات بدخول العمال المفصولين للمصنع كالمعتاد تضمناً معهم، وأبلغت شركة اسيك انه فى حالة الإصرار على استبدال العمال لن اسمح بدخولهم من بوابة المصنع.

 

الدور الخدمي الذي يقوم به مصنع النهضة فى محيطة؟

نقوم بتنفيذ برنامج متكامل للمشاركة المجتمعية، أيضا نشارك بمنتجاتنا فى دعم المشروعات الخدمية والقومية التى يتم تشييدها أو تطويرها فى قنا بلا مقابل، هناك شراكة مع جامعة جنوب الوادي لرعاية الطلبة المتميزين بالجامعة وتقديم دعم مادي ومعنوي لهم،  ايضاً الشركة تفتح معاملها وخطوط إنتاجها أمام طلاب الكليات المختصة، ونجحنا فى تدريب 75 طالب من جامعات مصر المختلفة بداخل الشركة خلال الفترة الماضية، وذلك لنقل الخبرات وتدريب طلبة الجامعات على ما يحتاجه سوق العمل، ونستعد لتوقيع  بروتوكول تعاون لدعم مشروعات المبادرة الرئاسية "حياة كريمة" وتوفير احتياجاتها من الاسمنت، ونستعد لتسيير قوافل طبية علاجية مجانية بالتعاون مع الجهات المعنية والتى من بينها جامعة جنوب الوادي وتتحمل تكلفتها شركة النهضة، بجانب دعم الأبحاث العلمية وتوفير كل الدعم الفني المطلوب والمتاح بالشركة لأبحاث مرحلتي الماجستير والدكتوراه المتعلقة بصناعة الاسمنت .