ناهد السباعي: "السادة الأفاضل" عمل جماعي متشابك.. والدور بقيمته مش بحجمه
أكدت الفنانة ناهد السباعي أن فيلم "السادة الأفاضل" يمثل تجربة مختلفة من حيث طبيعة الأدوار وتكامل الشخصيات، موضحة أن العمل يقوم على الحكاية الجماعية وليس على البطولة الفردية.
وقالت السباعي، خلال لقائها ببرنامج "الصورة" الذي تقدمه الإعلامية لميس الحديدي على شاشة "النهار": "العمل جماعي، ومهما زادت مساحة الأدوار أو قلت، الحكاية كلها متشابكة مع بعض صح. عمر أهمية الدور ما كانت بمساحته، لكن بقيمته وتأثيره في الحكاية.
وتابعت: “الفيلم مش لفنان بعينه، لكنه عمل جماعي متميز، وكل فنان ليه دور مؤثر في تضفيرة العمل”.
وأضافت: “من ضمن أمنياتي اللي تحققت في فيلم (السادة الأفاضل) هو إني أشتغل مع المخرج كريم الشناوي، لأنه بيحب الممثل وبيخليه يحس إن دوره أهم دور”.
وأكملت: “أنا ماحستش إن دوري صغير أو كبير، لأن الفيلم أحداثه كلها بتحصل في يوم واحد، وفي مكان واحد، وبالتالي مافيش حد دوره أقل من التاني”.
وأردفت: “الناس كلها بتشارك وبتسلم لبعض، والتصوير كان صعب لأن كل مشهد مرتبط بالتاني، كنا بنشتغل كفريق واحد، حد داخل وحد خارج طول الوقت”.
وأشارت مازحة إلى أجواء التصوير قائلة: "كنت سعيدة بكمية الفنانين، كانت هيصة! أول ما دخلنا البروفة وشوفنا بعض جالنا حالة انبهار، وكنا بنقول لبعض: إيه ده! إنت معانا؟ إحنا مع بعض!".
واختتمت ضاحكة عن أحد المشاهد قائلة: "في مشهد الخناقة الكبيرة أنا اللي اتضربت، مش العكس!"
اقرأ المزيد..
