شواكيش
> فى بلدنا.. ناس شبعانة.. وناس جعانة.. وناس فى بحور الهجرة غير الشرعية غرقانة!
> نحتفل بيوم الابتسامة العالمى تحت شعار «اضحك كركر.. فى أسواق الغلاء أوعى تفكر»!
> الغلابة بيغنوا فى أسواق الغلاء: بِستك بِستك بِستك ناووو.. دى الأسعار مشعللة الجو!
> الحكومة معندهاش كتالوج..ع لشان كده حكومتنا تعمل بنظرية «حادى بادى»!
> العيب فى الشعب ولا فى الحكومة؟! أكيد فى الشعب علشان «الشعب كل يوم بيصرخ.. والحكومة بتقشفها عليه»!
> بمناسبة التقشف الحكومى.. أنصح وزراء الحكومة بترشيد تصريحاتهم «المضروبة»!
> الحكومة تحب تلاتة وتكره تلاتة.. واللى تجوعه تحبهُ بالتلاتة.. والحدق يبدأ يفكر!
> الغلابة عايشين نوبة «جوعان» فى بلد دماغ الناس الغلابة فى التوووووهان!
> بمناسبة عيشة «الضنك» اللى بنعيشها أنصح وزير الجباية بفرض ضريبة «قلة القيمة» على تصريحات الوزراء المضروبة!
> الحكومة فى «واد» والغلابة الكُحيتى فى «واد آخر».. وطبعًا بينهما سلاسل شاهقة من جبال الأسعار!
> نُصف الشعب ضاع عُمره فى طوابير العيش المدعم.. بينما النصف الآخر فى البحث عن غموس «لقمة العيش»!!
> نحن الغلابة لنا لهيب نار الأسعار.. وعلينا الدعاء: «اللهم صبرنا على حكومة الغلاء وإخرجنا غير جعانين من نفق العناء»!
> الحكومة عوّمت الجنيه.. وطبعًا الجنيه غرق فى بحر الغلاااااااء!
> زمااااان قالولنا: «فتح مُخك تاكل ملبن».. ودلوقتى: «فتح مُخك تاخد قراقيش بحلاوة»!
> بعد الارتفاع الجنونى للدولار، أنصح الحكومة بسرعة إيداع «الجنيه» فى مستشفى الأمراض المستعصية!
> مع بدء العمل بموازنة العام المالى الجديد، سينطبق عليها المثل: «التاجر لما يفلس يبحث عن جبايته الجديدة»!
> الحكومة لا تأكل الشكولاتة فى أسواق الغلاء.. ولكنها تحلى ديمًا ببنبون الغلابة!
> نحذر حكومتنا الرشيدة بنصيحة لقمان الحكيم: ارحمى الفقراء لقلة صبرهم.. والأغنياء لقلة شكرهم.. استرها يارب!
> بعد رفع الحد الأدنى للأجور إلى 8 آلاف جنيه فى الموازنة الجديدة.. موظفو القطاع الخاص يستصرخون: «نروح لمين ونقول: يا مين ينصفنا يا حكومة»؟!
> نِزلت فجأة آخر محطة فى بلدنا «كفر الجميز» لكى أقابل الولد.. لقيت الولد بيُصرخ بالآهااااااات: «رايحة بينا فين يا بلد»؟!
آَخِر شَوْكَشَة
>> من أغانى شعبيات الغلابة: ملعون أبوك يا فقر يا للى حاوجتنى للدعم / آآآه لو لعبت يا دعم وأتبدلت الأسعار / وركبت أول موجه فى سكة الدولار/ روحت لأول بياع إحتجتله فى دولار / كسر بخاطرى ساعتها / وإستكتر عليّا سنت الدولار / ملعون أبوك يا فقر/ ياللى إتذليت م الدولار / وعجبى عليك يا زمن اللى حوجتنى للدولار!!
تابعوا آخر أخبار بوابة الوفد الإلكترونية عبر نبض