شوبير يُحذر مما يحدث مع وليد صلاح الدين في الأهلي .. ما القصة ؟

حذر الإعلامي أحمد شوبير، مما يحدث مع وليد صلاح الدين مدير الكرة في الأهلي، مُطالبًا محمود الخطيب رئيس النادي بالتدخل.

وقال أحمد شوبير عبر قناة النهار: “هتوقف شوية عند قصة كابتن وليد صلاح الدين، لأنه الفيلم اللي بيتعمل كل فترة على حد يعني مش على الهوا، شغال على وليد صلاح شغال يعني بحذافيره، وبتهمة إن وليد صلاح الدين يفشي أسرار الفريق!”.

وأضاف: “ده هو مدير الكورة، ده بيصرح، ده هو بيتكلم، ده هو بيرد على التليفونات.. والراجل مشكوراً بيرد على تليفونات كل الناس وبيقول ما هو مسموح بيه ولا يخرج أبداً عن النص”.

وأكمل: “هل ده نشر أسرار؟ هل ده نشر أسرار إنه الراجل بيأدي مهمته ودوره؟ وإحنا طبعاً أكتر ناس بينوبنا من الحب جانب يعني، لأن إحنا محبوبين قوي في الحتة دي يعني، أكتر ناس بينوبوا من الحب جانب في الاتهامات إنه يعني كذا وبيخص كذا وبيختص كذا.. إحنا طول عمرنا بتوع أخبار، ده من أيام ما كان وليد صلاح ومحمد رمضان وسيد عبد الحفيظ بيلعبلوا كورة”.

وواصل: “فالحملة على وليد ممنهجة تماماً، زي الحملة على أحمد الجارحي مدرب الباسكت في النادي الأهلي اللي ممنوع منعاً تاتاً نشر أي صورة له داخل أي علاقة بالإعلام في النادي الأهلي! وارجع للصور، ده في مناسبة كان فيها 122 صورة حطوا صور لـ 121 واحد ما عدا أحمد الجارحي!”.

وأردف: “نفس القصة، إياك إنك تخالف، أنت تمشي على هوايا.. اللي بيمشي بيمشي على هوى النادي وليس على هوى أشخاص”.

واستطرد: “دي نقطة مهمة جداً وأرجو من الكابتن محمود الخطيب رأساً أن يتابع الأمور اللي أنا بقولها دي رأساً، يا كابتن خطيب شوف أحمد الجارحي هل بتنزل له صور؟ هل بتنزل له أخبار؟ ده وصلت إن الصور بتتقص عشان ونشوف كوعه ونتغزل في جمال كوع أحمد الجارحي! حضرتك بس راجع هذه الأمور يا كابتن خطيب”.

وتابع:"من يدير النادي الأهلي هي إدارة النادي الأهلي وليست أشخاص، ولا حتى الكابتن خطيب.. إدارة النادي الأهلي هو دايماً كدة يقولك الإدارة جماعية وهو نفسه بيقول كدة".

وأضاف: “فالقصة إيه، شغالة بقى وإن القرار كان فلان وفلان وعلان، هذا الأمر في مدير كورة ولما جه كتب صلاحياته واختصاصاته وتمت الموافقة عليها، كابتن وليد صلاح الدين من حقه يتكلم عادي، دوره مدير كورة وحقه لأن أنت ليس لديك متحدث وليس لديك منسق إعلامي للفريق”.

وتابع: “أنت لما جبت محمد ثابت ولما جبت الدكتور عادل كريم ولما جبت محمد السيسي ما عمروش تلات أربع خمس شهور ودول كانوا متحدثين باسم الفريق”.

وواصل: “لكنه هذا الأمر يعني في النادي الأهلي مبيحصلش، فمدير الكورة هو اللي بيقوم بهذا الدور”

وأكمل: “ما هو كابتن محمد يوسف المدير الرياضي بيطلع في برامج ضيف بيقول تصريحات ولا أنا مش واخد بالي؟ والكابتن سيد عبد الحفيظ وهو مدير الكورة كان الراجل بيقول تصريحات وبيتكلم وبيحكي برضه في نفس الإطار اللي بيتكلم بيه أو بيتكلم عليه كابتن وليد صلاح الدين، لكن وليد صلاح الدين مش على الهوا أوي عند البعض يعني”.

وأتم تصريحاته قائلًا: “لكن القصة حدوتة تانية ماينفعش نتكلم تاني لأنه الأهلي عنده مباراة ضد يانج أفريكانز، وربنا يدينا العمر برضه هنتكلم في التفاصيل بالكامل يعني”.