"الدكاترة رافضين يعالجوني".. إصابة إنجي عبد الله بورم في المخ للمرة الثانية (تفاصيل مؤلمة)
كشفت الفنانة إنجي عبد الله عن إصابتها بورم في جذع المخ للمرة الثانية، مشيرة إلى أن جميع الأطباء داخل وخارج مصر من أساتذة في مجال الأورام والمخ والأعصاب ، رفضوا علاجها، لخضوعها للحد المسموح لها به من جلسات الإشعاع والكيماوي منذ عام ٢٠١٩.
إصابة إنجي عبد الله بورم في جذع المخ
وكتبت إنجي عبد الله، خلال منشور عبر حسابها الشخصي بموقع التواصل الإجتماعي الأشهر “فيس بوك”: “عدى ٦ شهور بحاول اتعالج للمره الثانيه من ورم في جذع المخ … وهو مش سرطان ، هو ورم حميد، لكن موجود في اخطر مكان في المخ”.
وتابعت: “للأسف كل الدكاتره في مصر ؛ وبره مصر، أساتذة في مجال الاورام والمخ والأعصاب ، رفضوا يعالجونى لأنى أخدت كل جلسات الاشعاع والكيماوي المسموح ليا ،، وللمكان الصعب ده سنه ٢٠١٩ وكنت فاكره خلاص انا تمام ،، لكن للاسف رجعتلى اعراض اسوء بكتييير من زمان”.
واستكملت: “أنا فقدت الإحساس بالجنب اليمين، وصعوبة في البلع وكهربا في جسمي كله لما بعمل اى حركه بسيطه حتى لما بحرك عينى، وفي حاجات تانيه كتير”.
وأردفت: “حتى أنا رجعت للمستشفى اللي اتعالجت فيه قبل كده ،، بنصيحه من دكتور ، تامر النحاس ،، اللى هو شخصيا رفض يعالجنى … والمستشفى طلبت منى أمضي اقرار ، انى مسئوله تماما عن كل اللي ممكن يحصلى لو اتعالجت ، طبعا مشيت من الخوف”.
وواصلت: “دلوقتي انا مع الدكتور الوحيد اللى وافق انه يجرب علاجات خفيفه تلطيفيه لمحاوله تحسين جوده الحياه مع انتظار معجزه .. أنا مش بحاول اتعالج علشان متمسكه بالحياه انا بس تعبانه جدا بقالي كتير وبدعى ربنا بحاجه واحده بس … اللهم لا نسألك رد القضاء ولكن نسألك اللطف فيه".
وأضافت: “الشخص اللي واقف جنبي وبيساعدنى ان اعمل ابسط الحاجات اليوميه اللي خلاص بقت مستحيله انى اعملها لوحدى هى اختى اللي عندها ورم في الرئه والمخ مرحله رابعه وكنت فاكره ان انا اللى هخلى بالي منها”.
واختتمت إنجي عبد الله منشورها بقولها: “أنا حالتى بتتاخر كل شويه .. والمره دى شفت حاجات صعب انى حتى اوصفها … انا راضيه بقضاء ربنا الصعب اوى اوى ليا ولاختى … لكن الحياه بجد صعبه جدا ومفاجئتها اصعب … ادعولي”.